¹ Saulus kena foi sele hubawounge Stefanusre haibokene. Saulus jemaat Yerusalem yona iwe tasi nebam mokowoumi. Bele ya mbai ro miyae Yerusalem yona nekewate iwe tasi hele kouboimi belena ro miyae herayeuboke Yudea kanire, Samaria kanire hebaelayeke. Yesus Na abu ako mo Yerusalem yone nukaimiboke. ² Ro ne hangga Stefanus hele rimainyekoke, ekate molaisake. ³ Saulus jemaatre nebam mokommibondere, imaera-imaera ohowoye, ro ne miyae ne nemene yobowoye kawa einyemo hilewoumi. (Filipus Allahre Ako Faeuko Samaria Yone Huwewoumi) ⁴ Ro miyae yohine heraeyeuboke nekayeke yo Allahre ako faeuko nahibi huwayeke. ⁵ Filipus Samaria yone, Allahre ako faeuko meke kelewoumi. ⁶ Ro miyae helem sele na kena mbai Filipus Allahre ako faeuko huboumi borowainyele namekai hambum emeha helem mokowoye. ⁷ Ro miyae walobo na u einye aruleibiyate, Filipus weumi balejate, ro oro nimaimikoke yo namekai helem onomi yarowate. ⁸ Samaria yo einya nekewate yo rei mai sele aumiboke koubate. ⁹ Ro mbai Samaria yone nekewoye, naro Simon, walobo boi-boite boumiyeke, ro miyae helem ei molowainyele, namekai ro nehale mekai erainyeke. ¹⁰ Ro miyae, kending kabam Simonre ro nehale yae erainyeke, elate Allah yae hakoungeboke mokowoye. ¹¹ Samaria yona ro miyae na ubene wabene, eha bulore koubate bum-bum Simon yae mo onomi yeuboumi. ¹² Samaria yona ro miyae nemene Filipus, Allahre ako faeuko elewoyere borowainyele, namekai bu kolowoumi. ¹³ Simon namekai hila rabo Yesusre hale wounge, bu rainyehike, Filipusre hakoungeboke ahire-ahire ohoyeke, Filipus hambum emeha helem mokowoyene, Simon ei jae molowounge. ¹⁴ Yesus Na abu ako Yerusalem yone kelewaimile yo, anggaei borokate Samariana ro miyae Allahre ako faeuko boraiboke, Petrusre Yohanisre ukaimile Samaria yore ekete. ¹⁵ Petrusre Yohanesre mekete ebeli Tuhanre boubainyele, Allah Roh Kudus na waline ammibondere. ¹⁶ Roh Kudus na wali einye eyeisi, bu mo yae kolaimikoke. ¹⁷ Petrusre Yohanisre na u ranne me kolaimikoke, Allah rena Roh hubayaeikoke. ¹⁸ Simon ijoko erewoye, Yesus na abu ako me ro miyae uranne helem kolowoumi, Allah rena Roh hubayewate, belene Simon hokolo bee re roi jae yemmilere weuboumi, ¹⁹ Simon weumi, ''Rake elae raei jaele yere, ro miyae me na uranne koloremile, Allah rena Roh hubainyayende.' ²⁰ Bele yaere Petrus yae Simonre weunge, "Wa roi jaele wa u yaele nebam bebe yaele, wa u bene nekete Allah rena elae roi jae nahinggi reweye! ²¹ Waei kena u yolo-yolo bam nekeyaene, Allahre bene weyae Naei holonare eyeiboi hangga. ²² Belene wa nebam mokoyaera osaeibo, ebeli Tuhanre boungele, wa nibi nebam mokoyaera, onomi inyeite. ²³ Reyae ijoko erawale, nibi nebam na eyae, namekai walobore kaliya mae-mae hele mokoyae. ²⁴ Simon weunge, "Ebeli Tuhanre boungele, weyae eleyae mekai raei u ranne ebei-eyakalai jae nekerele." ²⁵ Petrusre Yohanisre, Allahre ako faeuko ro miyaere huweimikoke baeufokemo, beiboke Yerusalem yore ekete, nibi a ne eubote, Samaria ro miyae re Allah rena ako faeuko huweimiyeke. (Filipus Etiopiana Ro Mbai Bu Raungehike) ²⁶ Malaikat Tuhan meke Filipusre weunge, "Anyu, ebum refire eye, bele nibi kabam, bele yaere ro miyae helem bam ohojate!" ²⁷ Filipus aunguke, aloungekoke, na ijoko ereunge Etiopiana ro mbai rowa kabam Sri Kandake Etiopia, roboni-relare keluweye kiyae Yerusalem yore meke, Allahre yo imae ralo imae ei moloi-moloite meke, ²⁸ beufoke na yore endere, na kereta ranne nuweuboke, Yesaya rena homo faene roye. ²⁹ Roh Allah yae Filipusre weunge, "Eye, nembainye kereta einye ehawebo!" ³⁰ Filipus meke bele ro re ereunge hineunge, "Rowa, weyae itaeyeubokae, mekayae bele homone molaikoke?" Etiopiana ro yae weunge. ³¹ "Mehae mekai reyae itaeyerebonde, ro mbai jae rare ewei eyakalaiboina. Filipusre waengehike, na kereta eite ike nembainye nuweikoke. ³² Etiopiana ro rake homo fae yae rouboye, "Yesus yawangehoke, dombare folate anuwauke ate, domba kelu na mare folonaikondere mekai abam-faeubam yeibiyoye nekeye mekai. ³³ Ro bam, ro miyae wanem bae, na mare folonainyekondere ayende, namekai ro miyae walire hangga koloijaimile, Nare enainyekolonde? Rake, kanina Na no enaiterewende, hinye yae na orona-mena Naei nou enaisenggonde." ³⁴ Sida-sida benem beufoke Filipusre weunge, "Reyae hinawale, hinyere ahuba yae Yesaya eleye, Yesaya naei u maeije eleye, ro ehi maei jae eleye?" ³⁵ Filipus yae ahuba raweuboke huweunge, Yesusre a foi-faeu foi jae sida-sidare huweinge. ³⁶ Nibine euboite, bu yaele anuwau mbai hubayeikoke, Sida-sidayae Filipusre weunge, "Ijoko erei yae, rake anuwau bu yaele, weya kena koyae rare bu rauke hindere?" ³⁷ Filipus yae weunge, "Rowa, nehale waei hila rabo Yesusre halaenae na, mekane reyae nahinggi bu rareufinde!" Sida-sida yae weunge, "Nehale, reyae hila-rabo halaele, Yesus Kristus Allah Naei hinafa hoifa!" ³⁸ Sida-sida na kereta ukeunge yauboke, hokolo bee akoikoke, bure eyeuboke, Filipus sida-sidare bu raungehike. ³⁹ Hokolo bee bu ra meibalekemo, Roh Tuhan meke Filipusre yaweungehoke ete, Sida-sida na ijokoranda nundeuboke, sida-sida rei mai sele aungeboke euboye. ⁴⁰ Filipus meke na u Asdot yone yakalauboke, bele yone namekai yo ehi-ehi, bele kelaunga nekate yo nemene, a foi-faeu foi huboumi eke Kaisarea yone Filipus neke woye.