¹ Imam kabam yae Stefanusre hineunge, "Rake a nehale yae elate?" ² Stefanus yae weunge, "Aka naei baeke naei, anggaei borondebo, "Aei yobe-yobe Abraham, Mesopotamia Haran yone nekewoye, ³ Allah yae weunge, 'Rake kani kelara, aka baeke nolora etuwe, Reyae kani-kela mbai ware kelereibonde.' ⁴ Abraham, Kasdim kani nukeuboke, Haran yone meke nekewoye. Haran yora, Abraham naeko hereke, benem Allah ukeunge rake kanire meke, nekeimiyaube manaya. ⁵ Allah kani bohi mbai sambai Abraham re eyei, beleyaere Abrahamre Allah a ukeunge, waei orona menayo kani mbai, naeite yembonde nekenayende, mehae mekai horo Abraham kelu ehubayeikoi. ⁶ Allah yae rake mekai ukeunge, waei orona mena yo, yo mei-mei mekai enainekende, iwe taisi konaimile, u wabei-wabenaimile kaliyane mokonayende, 400 ralo yakama hangga nekenaikonde. ⁷ Reyae bele yohore ehe bukulu itemile, belera Reyae yaweremibonde bele yora emabalende, Rare buma enate kolonde.' ⁸ Allah benem Abrahamre ro u huba folonaimile a ukeunge, belene Abraham, Ishak naeko, ya mehaembai mehine name yeuboke, Ishakre na ro u huba nainyehake, Ishak rera Yakub, meke na kelu wa 12 bele mekai mokowoumi. ⁹ Kena hensem koubate aerene, Yusuf naeka naei Mesir yona yore nai haeimiboke. Beleyaere Allah Yusufre hakongeboke, ¹⁰ Yusuf re onomi ikeunge, itaei haba ikeunge, anuwau Firaun, Ondofolo Mesir bene mokongehake, Mesir kanine Ondofolo kabamre yeuboke. ¹¹ Mesir kani namekai Kanaan kani, nemene moni mai meke neke hebewoye, aei yobe-yobe naei hamam ehubayeikoi nekewate. ¹² Yakub anggaei boroke, Mesir kanina gandum mae-mae hele, belene na bere hele aei yobe-yobere Yakub ukeumi gandum reweite Mesir kanire ekate. ¹³ Benem gandum rewete mekate, Yusuf naenaei yakala haukoke, naekae naei itayeiboke namekai Firaun itayeuboke, Yusuf naeke naeijae ohate. ¹⁴ Belera Yusuf a ukeumile ekate naeko Yakub, naei aka baeke nemene 75 hangga Mesir kanire mekate. ¹⁵ Yakub Mesir kanire meke, belene hereke, namekai na keluwa nemene belene heraiboke. ¹⁶ Mesir kanira, na bo nemene hawaikoke Sikemne molaikoke, Abraham yae bele kani Hemor re fafa maeita roi jae rouke. ¹⁷ Allah Naei Abrahamre ukeunge ya nobewounge, Israel ro miyae Mesir kanine nekewate yo helem sele yeuboke. ¹⁸ Ondofolo mbai Yusupre nataeibam, Mesir kani neyae kileuke. ¹⁹ Bele Ondofolo ame karebai, iwe-tasi Israelre kowoumile, wayeu fafa namekai bune-yaunge hayaeyeke, walire enekei mekai hubawanyele. ²⁰ Bele hee yae Musa honggate, fa hokolo hele Allah ei molowounge. Musa naeko, imaene oko name narewainyele. ²¹ Nil wi ne ekate wokate, Firaun na maengge yae rouke nareuboke, naei fa mekai mokowounge. ²² Musa Mesir maei itaeisaba kelewainyele, rore yeuboke, name u Mesir ro mekai mokowoye. ²³ Musa na ro-hu ro-ya ro u bee hangga yeuboke (40), na ubene rouke, naei aka baeke Israel re eremmibondere. ²⁴ Musa roko mbai meke ijoko erewoye, Israel na ro mbai, Mesir na ro yae nebam mokowounge. Israel re ro aerene Mesir na rore houboke ifau nolone moloufake. ²⁵ Musa rabo halewoye, na aka baeke yoho Israel nekate itainyaeibonde, Musare walora Allah yoho Israelre onomi yemmile. ²⁶ Ya benem, Musa meke yoho Israel na ro bee ane kilewote namekai isamne kabulewote, Musa meke mehe-uhe folowoumi, weumi, "Meyae na aka baeke bee ya, mekane a kileube?" ²⁷ Beleyaere na ro mbai are yarewounge kiyae Musare weunge, "Hinye yae ware eleubokete maei beyu-beyebare yeubokae? ²⁸ Weyae Mesir na ro wena houbokae, mana benem rare hotebondere?' ²⁹ Bele mekai borowoungene, Musa hakauboke Midian yone meiko-meikore yeuboke ekenekewoye. Midian yone nekewoye na kelu bee kolouboke. ³⁰ Musa na rohu-roya ro u bee yeubokemo, malaikat mbai meke Sinai homunggaene ifaeu wanem ofae ruku nolora Musare u keleungeboke. ³¹ Musa ijoko erewoye, fayae bouboye, nobere eke ijoko erewoye bae, Tuhan yae a weunge, ³² Reyae, mai yobe-yobe Abraham, Ishak namekai Yakub naite Allah,' Musa ijoko erewoye, na u fe hele kouboye, namekai na u onyeu isineuboke. ³³ Tuhan Musare weunge, 'Oromemalu hireukokae kulaiko, bele anuwau orore hebeyae yolo-yolo rendem. ³⁴ Reyae, nehale Ra yoho yonggo Israel iwe-tasi, meyaya-u yaya, moni-buki Mesir kanine kaimile ijoko eramaele. Reyae mekale onomire itemilere, belene ware ukete Mesir kanire eyere. ³⁵ Rake Musa mbai jae yoho Israel ahiyae elaikoke, wainyele, "Hinye yae ware eleuboke maei beyu-beyaere yeubondere, rake Musa mbai jae malaikat Tuhan meke Sinai homunggane Naei u Nenaei jae yakalungeboke. ³⁶ Rake Musa mbai jae, Israel yaweumiboke Mesir kanira maibaleke, Laut Merah ra foubate, ifau a kala-kalane ralo yakama ro u bee meubate namekai igwau mehi-mehi Mesir kanine mokowoye. ³⁷ Rake Musa mbai jae Israelre weumi, 'Allah ro mbai raeinya mekai walennebondemo, neyae mare yawenembombe.' ³⁸ Rake Musa mbai jae, mare yawembokembe ifau kala-kalane, malaikat mbai meke Sinai homunggaene aei yobe-yobe yaele Allah Na ako faeuko meke ikembe. ³⁹ Aei yobe-yobe Musare kenabam yaeiboke, benaibonde Mesir kanire enatere koubate. ⁴⁰ Harunre wainyele, 'Maere walobo mbai mokoimobo, bele walobore ei molomande, namekai neyae be nembonde yawemmibonde emale, Musa yae yaweumiboke Mesir kanira mandebaleke, bele yaere mekayae na u ne yeuboke bam.' ⁴¹ Israel yoni-yoni nenaei jae patung lembu mbai mokaiboke, akauha haubainyele namekai rei mai sele koubainyele. ⁴² Allah Na be Israel yohora weke, rokoumikoke Israel bee patungre ei molowainyele, Allahre yendo kayaaro naei mekai homofae molaikoke, 'Meka akauha yae Rai bere rokaube mekaube, Israel yoni-yoni, ifau a kala-kala nolora yawemibokamale meubaube, obo foro yaele-kembo yaele yae roukaube mekaube? ⁴³ Meyae Molokh faleyaele walobo Refan, ma meyae mokauboke roukaube mekaube, ei molaungele, Reyae mare karensimbe Babel kanire embere.' ⁴⁴ Yobe-yobere ifau a kala-kalane Allah Nenaei jae a ukeumi, rake fale mekai jae mokombombe, ⁴⁵ Bele fale mokonaibonde mekai aei yobe-yobe rokate namene meubate, Josuare heene mekate, Allah Nenaei jae kani kela yohi maei nemene yarowoye, Israelre hayewoumi, meke Ondofolo Daudre heene. ⁴⁶ Daudre hee, Allah ehe koungekoke Allah Na yo imae ralo imae mokombondere. ⁴⁷ Bele yaere Daud na kelu Salomo yae Allah Na yo imae ralo imae heuboke. ⁴⁸ Bele yae homofae molaikoke honoye, Allah bele imae ro miyae yae mokaiboke einye enekei, ⁴⁹ Yaku buma Raei anggem nekei, kani kela Raei oro hebei. Mekae imae mekai jae Rare hendebombere?' Allah yae weumi, 'U no re itebonde maei imae?" ⁵⁰ Bele nemene Rame yae mokale ya?' ⁵¹ Israel yoni-yoni falem elaekaeite kaube yo, mai yobe-yobe naei mekai nekayeke, anggaei eboroyei nekayeke, namekai Roh Allahre moijae bulewainyele nekewate. ⁵² Allah Naei yendo kayaaro hinye naei jae aei yobe-yobe iwe-tasi ekoi nekayeke! Bele yendo kayaaro yae, Wali Ondofolo mende maei eyem kolowaime, mana eyae mekande a nebam faeu nebam bae, Wali Ondofolo homabondere kelai nibi mekammokande. ⁵³ Meyae Tauratna malaikat molaikoke emokoi namekai meyae bele Taurat mbai kayaa ehebei!". (Stefanus haibokete) ⁵⁴ Yahudi falem-falem, bele a mekai borowatene Stefanus weumi, na kena nebam hele yaeiboke, namekai itebeu akewate. ⁵⁵ Stefanus Allahrena Roh aungeboke, na be bumare weukike, erewoye, Yesus, Allahre kendang-wame ranne Allahre meube refine hebeunguke. ⁵⁶ "Stefanus yae weumi, "Anggaei borombo, ijoko ereale, surga wewe koukoke, Yesus Allahre meube refine hebeunguke." ⁵⁷ Bele yaere Yahudi falem-falem kelae hebainyekoke kaenewate, na anggaei meyae roraikoke, Stefanusre hebaelekainyele. ⁵⁸ Stefanus yowainyehoke yo moite aibaleke, belene ruka yae hayaeinyekoke. Ro amekarebaite huwaimile yo, Saulusre bene Stefanus na malo kulainyekoke. ⁵⁹ Stefanus nahibi rukayae hayewainyele, ebeli Tuhanre bounge, "Tuhan Yesus, ra no reweite." ⁶⁰ Stefanus oro hele rorokoke, ebeli elae hele kaeneye, "Tuhan, rake u mekai mokate, na u rannda weinye!" Bele are mo eleukoke, no yobouboke, hereke.