¹ Bele yamo, Yesusre holona yo barayeke helem sele yeuboke, a rilibo hayewate Yahudi ro miyae, Yunani afaeuke elate yo yae Ibrani yoho re waimile, yaya hamam waheijaube maei miyae nale nekatere hamam eyeyei nekeijate. ² Bele abu ako nemene arilaisike elate, "Eyae hamam mo umfo wamfo baende, Allah ako faeuke kelemamilere ikai bam yaendeboke, bele na mekai bam!" ³ Ro mehaembai mehine bee yaele elemakom, ro u bene wabene yaele, Roh yae ammibonde, namekai hamam kaliyare foi mokonate. ⁴ Meyae kaliya Yesusre ako faeukore mo huwemamile namekai ebeli Tuhanre bomande." ⁵ Rake u bene roukate foi sele hubawanyele namekai ro elaikokera rei mai sele koubate. Na ro yaraikoke rake niyae, Filipus, Prokhorus, Nikanor, Timon, Parmenas, Nikolaus, ro mbai Antiokia kanina. ⁶ Rake ro riya abu ako bere yawaimiboke makate, Tuhanre helem foi ukanyele, abu ako mekate bele ro riya (7) ranne me kolaimikoke. ⁷ Allah re ako faeuko nahibi kelaeimiyeke, ro miyae Yerusalem kanina helem barayeke, na kabam hele imam-imam barawate Yesusre holona yore yaeiboke. Stefanus kilaiboke ⁸ Stefanus ro mbai Roh Kudusyae aungeboke kiyae, hambum emeha helem mokowoye. ⁹ Belene Sinagogene mokowate ro riya mbai, ro Libertini elewate, Kirene kanina ro, Aleksandrian ro a ro, Kilikia Asia kanina anyukate Stefanus a hinsim, ei beko-meibeko na waere-waere relewainyele. ¹⁰ Stefanus rake a elewoyere onobeikoi hangga, rake ro riyae yaele, mekanebam, Stefanus Roh Allah yae na u benene aungeboke, bele randa a elewoye. ¹¹ Rake ro riyae ekate na maleu-maleuyae ro miyae ehire amoi-moi jae kelai jae nekaimile, rake a re elenaikondere, "Stefanus naei a mekai elewoye borowannele, Allahre namekai Musare aukaka yae kouboumi!" ¹² Ro helem ukaimile, falem-falem namekai Tauratre itayeiboke yo mekate Stefanus kilaiboke, yawainyehoke Sanhedrin bere mekate. ¹³ Rake ro riyae mekate ro ame karebaite wabaite yo ukaimile mekate, waimile, "Stefanus no bam hebam eleweke, rake anuwau maei namekai Taurat here folokoke a neyae horombondere eleweke. ¹⁴ Meyae namekai borowannele Stefanus elewoye, Yesus Nazaret kanina Ro Neyae rake Allahre yo imae ralo imae kelambonde, Musa rena a hena-faeu hena horombonde. ¹⁵ Sanhedrin riyae arilewoye, Stefanus na be erewainyele, malaikatre be mekai jae nekewoye.