Paulus Riyeufike Kaisar Bokore Endere ¹ Ya name nekaikokemo, Festus Ondofolore ranaitike mo, Kaisarea yora Yerusalemde kulum uke eiwoye. ² Imam-imam falembaele Yahudi yoyokoteyo riyana yo yaele Paulusre a nekainyele waeli beiwate Festusre hubainyaikondere. ³ Weiwainyele Festus kena kommikonde weimile Paulus yaunganyehonde Yerusalemre enate, mokainyehake nibinolone enateyae Paulus honaibonde. ⁴ Festus wokoumokoke weumi Paulus Kaisarea nemo nekende reyea ya hekibammo barehonde erele. ⁵ Naei foisele, "Mai nolona yoyo koteyo rombemba barail baranaikekonde rambele nembainye emale, belene rame u himi mokoukokale maei bele yone elenaikonde." ⁶ Festus ya mehini name,me be hangga nekeukokemo, Festus kulum uke Kaisarea yore bukeufike eiwoye. Ya heuboke naei anggengnekeitande huweubokemo ukeumi Paulus yawainyehoke nabene hainyeboke. ⁷ Paulus Festus bere meufebeunguke Yerusalemda yoyo koteyo mekate yo, Paulusre eleye nainyeboke a feuw mbaibam naeite naeite naurenne haiwainyele, bele yaere mbaisambai ijikoye erenaibonde anggeije boronaibonde a elaikoimo. ⁸ Na u aere re Paulus olewoye weumi, Musa moloukoke "Toratna eleye a feu, Allah na yoime raloimere, Ondofolo kabam Roma maei Kaisarre reyea asasi ekoikoi." ⁹ Festus Yahudi romiyae nakenare a rimayeumibokere Paulus a weunge, "Weyea kenakoyae Yerusalem ne rake a emalenggende Kaisarre hokomakonde." ¹⁰ Paulus yae weunge, "Bele he reyae Kaisarre wakundanne hebale rambele mambele rakene kolomanggonde. Reyea Yahudi romiyaere me hila-hila mbai sambai ekoikoisele nekeimeyale. ¹¹ Bele mekainye Musa rena moloukoke honate a reyae asasi koukokalere hoiboite hondebombe maei reyae kena. Rake yoyo koteyo maeinya raure arumatele nehale banna ro mbai sambai Yahudi yoyo koteyo maei me eite rare eikinyeboi. Mana ya riyawale ondofolo kabam Kaisar benne kolomanggonde." ¹² Festus naei are kolaimi yo yaele a elaikokemo. Paulusre weunge, "Weyae Kaisar bene kolonei kotonnekombere riyeufikeue Kaisar bokore weyae eye yaungayeufimde embe. (Paulus Re A Festus Ondofolo Agripa Re Hinewounge) ¹³ Ya hekibam mainyekeukokemo, ondofolo Agripare Bernikere Kaisarea yore Festus be raisite ekete. ¹⁴ Kaisarea yone nemam nekewatemo, Festus Paulusre a kolomeyainyele Ondofolo Agripare yakalaungeboke weunge rakena ro mbai Feliksye kawa eita ehayeikoi hebeye. ¹⁵ Yerusalemle ekalemo imam falem.falem baele Yahudi yoyo koteyo yaele Paulus namehila hila koukoke a nekainyele rare riwaitele eheebukulu kabamsele umandere. ¹⁶ Reyae beleyore ukamaele naeisele maei Roma maei manne honoye ro mbai ehebukulu imamdere namam bae nare urunainyele yo nabene-bene elenaikonde, benen inyainyele naei u aere oleikoyoye. Belera a hokoikoyande. ¹⁷ Bele yoyo koteyo mewarileufikene, ya heubokemo Paulus ubamaele kawa eite yawanyehoke raei bene meufebeunguke. ¹⁸ Naere arunainyele yo maisebeubokebe naei a elewate raei ubenere nekewouke wanembam. ¹⁹ Naei agama kaite a neyae kena mbaibam baeko ro yaele nekale, nawanem ro mbai naro Yesus hereke ra waleuboke. Bele a yae Paulus elae haele beye nehaleyae eleye. ²⁰ Reyae baeke a kolowainyele iteiyeibondere kabewanale hele, Paulusre beufokale hinanale weyae kena koyae waei a Yerusalemne emangkolonggondere. ²¹ Beleyaere Paulus ninaeije kenakoukoke Kaisar bene kolomanggodere Kaisar yae hokongkonderene, reyea ukamale kawane hilonainye konde hebende mende ikairoukelemo Kaisar bokore yaunganyehonde enate. ²² Agripa benem Festusre weiunge, "Reyea kena kale bele ro neuwaro bororenggom. Festus weunge, "Wahenare wenaijae boroungebonde." ²³ Ya heubokemo Agripare Bernikere koije baeye ayeikoke yawaimiboke onggo riya kabamsele kiye, fela yo, yoyo koteyo bele imaeite ayeuboke. ²⁴ Festus aunguke arilewoye yore a melaeyeimoboke Ondofolo Agripa weumi, "Nawanem eyae meufokouboke yo nanemene. Rake ro eraunge Yahudi romiye ye rare erewatele, Yerusalemna nekate yo meke rakena nekate yo nemene kela kenewate rake ro wali heki enekeije enekeije hele. ²⁵ Reyea hineukokale baeko ro mehila-hila ekoikoi. Reyae ereungekokale, rake ro name u himire mokombonde maei u hele. Hoiboite homabonde nibibam. Naei kena koye Kaisar bene kolonainyelerene reaye be insineubokale. ²⁶ Kaisarre homore molorokonde a Paulusrena a nehale mbai ehubaikoi. Belene yaweungehokale mai bere na inyoko waei bere mekare Ondofolo Agripa, Weinye hineungekonde yakalambonde bele a yae homone kunyemabonde. ²⁷ Raei ubenere eyeisi romiye mbai naei aere eyalakaiboi, nasom Kaisar bere eyawei eijae."