Paulus Feliks Bene ¹ Ya mehaembai nekaikokemo, Imam kabam Ananias Yahudina yoyo koteyo yaele Kaisareare ekate, Tertulus Romamaei iteijaelae ro ukenainyele baraumiboke nambele ekate, Feliks bokore ekate Paulus a hinainyekoke. ² Paulus kaenainyekokemo, Tertulus anguke Paulusre aruneungeboke a huba raweuboke eleye. Weyae ikanekeyae hene meyae onomi honomi nekande akubam naubam, reimaimo hubannele. Waei itaihaba maere maei yo yanne meke neke hebeye. ³ Mbene mbene nemene ware buma kolayete helemfoi wayete. ⁴ Heki ba elereleyaelene, weyae mere boroumebonde. ⁵ Meyae erannekoke hubayendekoke rake ro ubulu bumulo mbene mbene Yahudi yo nolone rake ro akumuli neyaemo mokoijeye. ⁶ Allahre imae kabanne meke nikire olennekondere, belene maeye ikilandeboke. Maeye kenakande menaije hamemanggonde. ⁷ Meyae mehininne kolowannele yae Lisias fela falem hebeye kiyae meke maei mera nukeufake. ⁸ Maere ukeume waei bokoreyae mekande wenaeijae hineungekondemo, belera itayeubonde name u mokowoye. ⁹ Yahudi romiyae bele riyare mekate yo Tertulus a elewoyere nehale yee na abulaunge nehale yae elewate. (Feliksre bene Paulusre aerene olewate) ¹⁰ Gubernur Feliks Paulus are elenggondere mekoungekoke Paulus aungukemo weumi reyea iteyeubokale rake ralo yakama koko hekihele meiwande rake kanina romiyae me koloimeyaime. Bele aerene reimai sele hubanale waei roberoyoine raei are alererele. ¹¹ Weyea wenaije iteyeubonde mehinim koloinye ya me bee orone bee yaele reyae Yerusalemre mekale Allahre bumaraisite eiwale. ¹² Ro mbaite ane kilewonde wanem, erenatebondere olo halo. Allah nayoime raloime kabanne a riyei riyai imae ehine meke nayo einye. ¹³ Manaya rake a folou rau ranne hayeitele mokoubu kale hambum bele a eyakalaiboimo. ¹⁴ Ware nehaleye wabene elale wali nibi Yesusre rabo halenale. Belene maei yobenaei kamahae neite reyea ei moloijanale, Musare homofaena, Allah nayenjokayaayo homofaena mololaikoke a nemene hakoyale, ¹⁵ Allahre einye hila rabo halemyelae hilarabo halennele nemene walemabonde foite mokaite nebande mokate yo meyaele. ¹⁶ Belene reyae rau kayaa hebeijale rakena hole molojale Allahre bene namekai romiyae nolone. ¹⁷ Reyae hekihele Yerusalem yo oro eyaleimo nekeukokale benen maei yore beufokale kounga kolona nekate yore roite itemilere mekale. ¹⁸ Allah na imae kabam einye belene rau mokowale fanyeubokatere erekatele. Rabokone romiye helemban, aku anau homale wanem u hele. ¹⁹ Yahudi romiye Asia kanira mekate yo reyae erekamele.Beleyoye naeisele wabene mayeleukeube ra mehilahila koukokale. ²⁰ Naeye elaikoube Yahudi maei hena asasi koukokale. ²¹ Nehale reyae a mbai eleukokale herewateyo nemene benem walenaibonde bele aerene mana ya wabene mekahebale."' ²² Feliks Yesus wali nibi henabona foisele iteyeuboke bele riye he nekeumi, weumi Lisias felafalem kabam mandemo rake kolaungele reyae hokorekonde. ²³ Belene Feliks felayona falemde ukeunge Paulusre kayaa foije hebenainyele. Nakahili wafeu menatena kaeu inyainyele. (Paulusre Hila Rabo Feliksre Weubonge) ²⁴ Mainyekeukoke hekibammo. Feliks namiye Drusilare mekete, Yahudi maenggena belena Paulus ukeumi yawanyehoke meke Yesus rena wali a hena a yakalaomi. ²⁵ Paulus wali himalomambonde, haremambonde moinya yane walihena emayaronde bele nemene elewoyene Feliks buhe hokoungeboke Feliks yae weunge, "Nine eleukoke mana eye ya ikai molombonde hubaitekonde mo kenereukonde." ²⁶ Feliks bene nekewounge Paulus roi yendele a eitake amne benen Paulus rae kenaikeyounge. ²⁷ Ralo yakamabee manyekeukokemo Perkius Festes, gubernur yeunguwouboke Feliksre a bulure Feliks Yahudi romiye nakenare rowenderene Paulusre benen kawa einye hilanyekoke.