¹ Paulus Yahudi yoyo koteyo ijoko ereumikokemo a raweuboke weumi. Akanaei baeke naei, mehe mana yane Allahre roberoyoinye rawali naei kewate koye mekai na foimo nekeimeyale. ² Bele a wanen eleukokene Imam kabam Ananias. Paulus naukelaunge hebeye rore neuwara mefae yae aruneungeboke. ³ Belemekainye Paulus ukeunge, "Allah ware mefae maungete, wawali nehalere eleyea meyae menguaukoke raei are kolomandere aei Toratne molaikoke. Beleyaere meyae asasi kaukoke ukaimile rare mefaeyae arunaukoboke?" ⁴ Romiye nabokone hebeye ro yae weunge, "Allah re Imam kabande aukekeye kane. ⁵ Paulus beufoke weunge, "Akabaeke reyea raitembam neyea neyea Imam Kabamde nekeye. Homone molaikoke, mai be yu beyebere meyae a haufau eweije." ⁶ Paulus iteyeuboke bele yoyokoteyo arilewoye mekate holo ehi Sadukina, holo ehi Farisina, Paulus aungukena a kabambe yoyo koteyo bene weumi akanaei baekenaei, Reyae Farisina ro. Farisiro maei kekelu.Raei are kolomandere aere romiye herewate yoni-yoni bulera anainyunde ahele ye elalene. ⁷ Bele aremo eleukoke Sadukine Farisine kayee moloukoke holobe yeuboke. ⁸ Saduki holona yo yae elate hereiboyate yo benen eainyui malaikat unule eyeiboi. Farisi holona yae elate romiye hereibeyate yo anainunde malaikat wanen inyaibonde. ⁹ Aku nau kabamsele keteuboke hoiwatene, Farisi holona iteijelae yo ainyuke elate meyea himire mokouboke ehubaikoi. Na uwe, unulu ehi yae malaikat ehiyae weungekoke ha. ¹⁰ Akuu kabansele beiwoyene, fela falem buhe hokoungeboke Paulus naubambe yobonaikonde rew bee re wahenaikonde wahenggonde yaele. Felayore ukeimi Paulus yawanyekoke naei obe kabandeyae ekate. ¹¹ Bele reniaimo Tuhan, Paulus nau kelaunge meufebaunguke weunge, wakena u elaeye nekeye. Yerusalem yone raei Akoo feuko eleye wanem Roma yone naei wanembai eumihuwende. ¹² Ya heubokemo, Yahudi ro riya mbai mokanyehake Paulusre honaibonde a elaikoke, Neyae bu naei hamam naei emaneimo nekenate Paulus honaibonderamo bu hamam anenate, naholo rawainyeboke elaikoke. ¹³ Na roo nanemene a holore kaikoke rorele u bee moi hayeukoke. ¹⁴ Mekate imam falem falem bokore waimile, maeye meumokannehake hamambu emaneimo nekemale Paulus homabondemo hamam anemale. ¹⁵ Belene maeye yoyo koteyo yaele fela falemde homoyae molonggombe riyennehimbe benem kolomanggonde. Maeye nibine hamarakemahande hamaramahinde nekemale. Mende nahibi homabonde." ¹⁶ Belera Paulus nemen de kelufa ya mehinim de kolowainye boroubeke felayo maei obere eke Paulusre yakalaungeboke. ¹⁷ Paulus felayona ro mbai keneungekoke weunge, "Rake hokolofa yaweinyeho felafalem bokore eu naeinya a mbai rouke meke ungembere." ¹⁸ Felafalem bele hokolofa yaweungehoke felafalem kabamde bokore ekete weunge, Paulus, kawane hebeye kiye, keneukoke riyeuke baeke hokolofa waei bokore weire a mbaite ungeitere. ¹⁹ Baeke hokolofa namera ikileuboke enere ebifem keleuke nakeleiboke mo hineunge, "Maka are weukelere meke?" ²⁰ Baeke fa ye weunge,Yahudi yora mokanyehake ware rinyayeufinde wahenare Paulusre yaweungohonde Yahudi maei yoyo koteyo bere wanembe embe nauna are foi foije kolonnekomi. ²¹ Bele yaere, nare eboroije naeinya a ungayete. Haubihinebam, naeinya ro rorele u bee helensolo mokainyehake Paulusre habenainyehande hibine bonaibonde. A mbainye elaikoke nau mokanyehake bu hamam emanaeimo nekenate, rake he waeinya hokoukonde are rakeite." ²² Bele felafalembe weunge, "Raremo nare meke ukare, rohi rohire eyakalaijemo rake kelufa ukeunge eiwoye." (Paulus Kaisarea Yore Yawanyehoke Eiwate) ²³ Belera baeke a ukainyele borouboke felafalem na u kelena ro bee keneumikoke weumi, "Maeye bee ebe felayaele ro nahelem 200. Hu ijoko namehului maeye kulum wembe mana reniai moo Kasarea yore embe. ²⁴ Kuda Paulus hebennunde maei mokonnehambe yawennehombe foije gubernur Feliksre bokore embe." ²⁵ Beleramo homo moloukoke ikeumi. Baeke wanembe moloukoke. ²⁶ Kladius Lisiasrena Gubernur Feliksre, wanene wewe eimolawale. Onomi. ²⁷ Yahudi romiye rake rokilaiboke, honaibondere. Reyae iteyeubokale. Yahudi yoni-yoni honaibondere wokainyele, belene felayo yaele mekande ele molanneboke, mota borowande neyae Roma yona yanna romiye ekande hayemekoke. ²⁸ Aere makane honaibonde a itaeitebondere reyae yaweungehokale naei yoyo koteyo bokore ekande. ²⁹ Maka aerene kawane heleungekokale namekai honaibondere reyae hinewale baeiwale ehubaikoimo. Naei agama maei koimeyate aere bambe Paulusre koimiyainyele. ³⁰ A nunu borokale ro riya mbai mokainyehake honaibonderene reyae nahibi waei bokore yae ukamaele ekate aku-nau hate hokoukonde. ³¹ Are ukamaele ijene Paulusre huwaeyae yawanyehoke Antipatris yore ekate. ³² Ya heubokemo, kuda randa Paulus naeite naimihike eiwate, ehiyo mo yae bukaiboke. ³³ Bele felayo kuda randa eibate Kaisarea yone aibaleke gubernur Feliksre homo ikanyele. Paulus name einye kinyaeinyeboke. ³⁴ Gubernur Feliks homo roukokemo, Paulusre hinewounge Paulus mbele yona ro. Itayeuboke Paulus Kilikiana ro ne. ³⁵ Gubernur yae weunge, "Foi ware arunayete yo manatemo reyae bororebonde ukemile." Herodesre obe kabanne Paulus kayaa hebenainyele.