Paulus Yerusalem euboye ¹ Bele yoyaele a melae yendebokera, hawandeboke kulum ukande Kos yokobare eubande, yaa heubokemo Rodosre ekande, Patarane nokande. ² Patara yone kayi mbai Fenisiare enderene meyae bele kayi ra ekande hawandeboke. ³ Meyae Siprus yokoba erekandemo meli reufine olendeboke Siria kanire nahibi eibande Tirus yone ekande akandekoke kayi einya hambunre kolonaterene. ⁴ Tirus yone ekande yawande Yesusre hakainyekoke yo maei bokore ekande.Yaa mehine bee nekandekoke. Allahre Roh yae yakalaboumi afaeu Paulus ukainyele Yerusalem re eijae. ⁵ Beleyone meyae nekewande yaa u yeuboke, kulum ukande eubande. Romiyae na kelu omi yaele yawaimeboke yo moite mekande orohele menderorouke Allahre ebeli bannehike, ⁶ a melayammibokemo, kayine mendehawauboke bele yo naei imaere bukaiboke eubate. ⁷ Tirus yora nandihike Ptolemaisne andenoke. Bake yone maei nibi meibande riyau wanneboke.Yesus hilarabo halewainyele aka-baeke mekate maere yawaimeboke ekande ya mbai nekandekoke. ⁸ Ya heubokemo kulum ukande Kaisareare, a foi faeu foite kelaeimile naei imaene ekannekewande. Yerusalemne ro mehinebee yaraikoke Pilipus na ro ehi neyae. ⁹ Neyae namaengge hokolo keli Allahre Roh, yeweumi are meliyaele mekaijaele. ¹⁰ Pilipus bokone nekewande hekibam Yudea kanira ro mbai naro Agabus Yerusalem ra meke. ¹¹ Maei bokore meke Paulus na u yolu roke noro me nenaei ikilewoye, Allahre Roh yae eleye, '"Bake u yolu ikileyae ro naei mekai mbai Yerusalemne Yahudi romiyae inyaimile, romiyae ehire inyaimile."' ¹² Bele a wanem borokandene bele yona romiye nembainye Paulus Yerusalemde yende re ahe kolowannele. ¹³ Paulus yae weumi,makane helee rimaube,mokaukele rakena himi hubanale, "Reyea mokoungehakale nekale Tuhan Yesus aerene ikilenatebonde maei here maei." ¹⁴ Maeinya weiwannele maere eboroiboinye maeye kohobam yendeboke elande, "Tuhan naei kenarekoye wanembe yembonde." ¹⁵ Maeye mokoisa-mokoisa nekewande Yerusalemde emalere. ¹⁶ Kaisareana ro ehi yaele maere baraimekoke ekaneiwande, Siprusna ro Manason naei imere ekande. Manason Yesusre nabenahele hakoungoboke. (Paulus Yakobus Bokore Eke) ¹⁷ Yerusalem yore ekande Yesus einya aka baeke maere foisele meram u ranne koibaimele. ¹⁸ Ya heubokemo Paulus nambele nembainye Yakobus bokore ekande belena penatua-penatua Yerusalem yone nekewate nemene mekate arileufike. ¹⁹ A melaeyeumibokemo Paulus huba raweuboke Allah na umekai Yahudi bam ro miyae nolone mokowoye yae huboumi. ²⁰ Paulus eleukoke beufokemo, ro miyae nanemene Allahre buma kolowainyele. Paulusre wainyele, "Aka baeke Paulus Yahudi ro miyae helem kelewame itayaeiboke Tauratna eleye mekai hubara haeita ekaimokate. ²¹ Rake he bele ro miyae borokate weyae Yahudi ro miyae Yahudi ro miyaebam nolone ekainyekate yore Taurat Musarena eleye mekai emokoijae na fa-fa na ro u ela efoloijae aei Yahudi maei mam hena honoye wanem. ²² Mana mekayae mokomabonde bam? Neyae boraiboke, weyae nehale mekae. ²³ Naei foi sele maeinye a elande ijene maere hakoimobo. Maei nolona ro keli Allahre ijene aholo kaikoke. ²⁴ Bele yo yaele yaweumibombe nembainye membe, na roi-ninggi mokomikombe, na ungare folonaimilere. bele u mekai wanem ro miyae nataei inyaibonde, na ame karebai mare ukayembe, bele yaere weyae Paulus, Taurat einye wali nekeyae. ²⁵ Hila rabo halaeinyele yo, Yahudi bam ro miyae a hinenaimindena, mainya a hokandekoke homone molandekoke, walobore kolaimile hamam emanawe oki emanajele oboyoku okine heikoyounge emanalije yoko kaime ekoije. Paulus Ikilaiboke ²⁶ Ya heubokemo Paulusnaei ro keli yaele ekate naure onomi mokaiboke Allahre youmeraloime eite erulaiboke menainye kenkonde yaa. Na heki nekenaikonde naei u mbemba okuihte oboyoku mbemba yaronaikonde bonainyaele. ²⁷ Ya mehinebee be rainyehike Yahudi romiye Asia kanira mekate Paulus Allahwa Allahre yoime raloimene erekainyele, ²⁸ Kelaa kenewate elate, "Israel romiye baeko ro yoran yoranda keleumiyeke aei mokande mekai foi bameyae Yahudi romiye, Allahre yoime raloime nanemene nafoibam. Meke Yunani ro miye yaele yaweumiboke imae kabam eite ekate niki olaikoke!" ²⁹ Namam haberoholo Trofimus Efesusna ro erekainye Paulus neai nembainye mekete bele a mekaije kenewate. ³⁰ Yerusalem yo ei aku nau aunguke romiye ahira ahira balaimeke mekate Paulus ikilaiboke, yobaiboke imaera moite ekate, mau kabam nahibi hilaikoke. ³¹ Honaibonde merau hawerainyele Romamaei felafalem a iteyeinyeboke na ukelene Paulusre habewaite yo boko yeiboke. ³² Fela falem na ukelena yo yaele hasalemo ekate romiye felayore erekaimilene Paulusre habewaite yo boko yeiboke. ³³ Bele felafalem Paulusre ikileubokera, felayo ehi yore ukeimi rantai raka bee ikilainyekoke, belera hineunge Paulus naeisele hinye makahaye naiye mokouboke. ³⁴ Romiye helem naeite naeite waheikoke kenewate holo ehi rike yae kenate,holoehi rake yae elate akure yeuboke huba hinewoye eyeteiboi mo ne ukeimoi Paulus yawanyehoke naei obeko kabande ye ekate. ³⁵ Felayo maei obe kabam nobenyekoke orowalo ijene akure muli yobaiboke yo Paulusre kunyenaikonde koiwainyele,bele fela yo Paulus name bumane keibokate. ³⁶ Bele yo naholone balane namoita eiwate kenate, "Hombombere ya!" ³⁷ Obe kabam eite orulenaibonderemo Paulus fela falemde weunge nahinggi wambele ahuba huwakonde felafalembe weunge wo koungekoke weunge wayae Yunani afew waitei? ³⁸ Bele mekainya weyea Mesirna robam aku mulire yobaiboke manemfa manemfa ro 4000 (empat ribu) yaweumiboke a kala kalare hakaikoke?" ³⁹ Paulus mo kounge weunge, reyea bele yona bam reyea Paulus Yahudina Tarsus yona Kalikia kani na beleyone honggatele,Warae riyawale baeke romiyere a ebifam ukemi." ⁴⁰ Belene felafalem be insineuboke paulusre kew u ukeunge eke orowalono hebeungeke me yae koumokoke romiye akubam yeiboke.Akunau are habauboke okemo Paulus naei Ibrani afeubae weumi.