(Paulus Makedonia kanira Yunani kanire Eke ) ¹ Efesus yona okunau kateuboke u yeaubokemo, Paulus namorta ohate yo keneumikoke mekatena kena u hara rorumikomo, a melayeumibokemo Makedonia kanire kulum uke eiwoye. ² Belenayo honate Paulus eleisi akoiboi kowene uteihelen bumbum weumiyeke, eke Yunani kanine ewewfike. ³ Oko nane Paulus beleyono eunge keukoke Yahudi romiye merau rainyehike honaibonderene nunaije hokoukoke befoke Makedonia ramo Siria kanire ende. ⁴ Paulus namoita ohate Sopater Bereana ro Pirus kelu Aristarkhus sekundus Tesalonika, Gayus Derbe naro,Timotius, Tikhikus Trofimus Asia kaninaro. ⁵ Neyae bere hawaiboke maere Troas yone rakenaimele. ⁶ Maeye filipira nendehike ragi bam few anewate he eiwande ya mehaembainye Troas yone andenoke, bele yone ikai mbai 7 nekandekoke. (Paulus Troas Yone) ⁷ Sabtuya bele mom einye, maeye arileufike hamamre nembainye anemakondere, ya hembondemo kulum wende enderene, ahuba heki hele huwewoke reniyai nolo yeuboke. ⁸ Raka bumana kiyaene i helensele roraiboke beiwate maei nekewande anuwaunge. ⁹ Hokolo fo mbai naro Eutikhus, jendela kelaunge nuwewboke yoku fefeungekoke nanggwoye. Paulus ahuba hekihele elewokene baeke hokolofa ejoku kabam sele feleungekoke umae raka namen enela bumara ruke eke-ekete keibokeba nune hereke. ¹⁰ Paulus owakouboke nau ranne feleufake, areungekokemo, weumi, "Aku ohoije baeke fa nawali numare yeukete kemo few, kaiwoye wanewoumi anewate, a uteinyemo weumi woke ya mefeu boke belera kulum uke eiwoye." ¹¹ Bumare yeuketekemo few kaiwoye wahewoumi anewate, a utaeinyemo weumiweke ya meufeu boke belera kulum uke eiwoye. ¹² Romiyae mekate hokolo fa waleuboke kiyeremo yawainyehoke naei imaere ekate na kena reimaisele hubawainyele. (Paulus Troas Yora Miletus yore Eke) ¹³ Meyae bu kayi kabanda Asos yore bere ekande Paulus naei are eleukoke mekai Asos yore yaunga nibira ara eiwoye. ¹⁴ Maembele Asos yone hubayendekoke, hawandeboke Metilenere eiwande. ¹⁵ Belera benem nandihike ya heuboke mo Khios yokoba bena yandeboke, ya benem Samos nobennekoke, eiwande ya heuboke, ya benem Samos nobaennekoke, eiwande ya heubokemo Miletus yone andenoke. ¹⁶ Paulus eleukoke Efesus ne ebaraijae Asia kanine hikihele nekemale yaelene hasaleyae Yerusalem yore emalere, ya kabam ragi bamfew konate ya ende. Paulus Efesusna penatuare a weuboumi ¹⁷ Miletus yora, Paulus ro eleuboke Efesusre eke, belera Penatua riya ukeumi na bokore mekate. ¹⁸ Na bokore mekatemo weumi, "Raei wali meyae mataei mo, Asia kanina mekale hee, mai u nolone mekale nekewale rei mai sele rakenane koubale. ¹⁹ Rakena Allahre kaliya mokorelere ara iseungehikale Yahudi ro miyae na kelai rare mokowatele, ijoko bu balewatele, ra ure u mali hubawaukele. ²⁰ Meyae mataei mai aerene foi nekembe maeina ro miyae bere mai imae ehira-ehire ohowale kelewamale. ²¹ Yahudi ro miyae yale Yunani ro miyae yaele kelewamale Allah ukeuke nei huwenaibonde na wanem Tuhan Yesusre hila rabo halemannele. ²² Manahe eraube Allahre Rohyae keleukebokene Yerusalemre erele, reyae itiyam makayaere ra u rande enjembonde bam. ²³ Rayae rataei yoran-yoranda ohowekale Allah naei Rohyae ayakala hele keleuke himi mokowekale nahele maei kawane hilenatekonde maei. ²⁴ Tuhan Yesus ukeuke a romiyaere ukemile Allah kena buhae henggokembe wali he molonembombe nibi mokoungehake. Bele a foi mbai ro miyaere keleremikondere na hubane-haeinye erensalenggonde raei u rebae reyae nou ehei, buhae ehokoiboi Naeremo bororende naei ijenemo nekerende. ²⁵ Mana erebu reyae maibokore reniyai rai ohowekale Allah roukeuke afoi-faeufoi are huwamale borokaube yo nemene mambele mbainye nekemande. ²⁶ Reyae nehale mare wamale mana yaa raebaka randa ruboungobokale. ²⁷ Reyae nehale mare wamale mana yaa mare u eherawei hangga, Allah Naei haraungeboke mare ungembe. ²⁸ Mai ure kayaa hebembe namekai Allah Roh ikembe jemaatna romiyae kayaa hebemmile, naei okiyae rileuboke aeraene. ²⁹ Reyae itayeubokale kulum ukele erelera yoku isanggele yoni-yoni mai u nolore menate here ware wanaimehinde ame-karebai u wabei wabenayembe. ³⁰ Ehiyo maei u nolora enainunde mare bulenayembe afaeu ro miyaere yobonaite maei a moyae hungayemembe. ³¹ Bele earene, kayaa kayala hebembe reyae ralo yakama name nobam hebam wemekamale male ya ehi ijoko bu yae eibalatele. ³² Mana ya Tuhanre me einye kinyamale, Naei wembe a ijene nekembe mai hila rabo annunumbe wali hena enjaronggombe. ³³ Mai unolo nekeumekale perak emas malo foimoi ehirena yo roukelere reyae kena okoi. ³⁴ Maye maitei nekaube rau maei ranoita ohate yo maei kru kalo raei me yae nou hewekale. ³⁵ Nemene mare kelewamale kou nakalona yore rukema mile Tuhan Yesus are eleukoke wanem, yeisi imami yende wahemami yende, 'Onomifoka hubainya yende."' ³⁶ A eleukoke baeufokemo Paulus bele ro miyaele oro helee waitorokoke Allahre ebeli bainyehike. ³⁷ Romiyae helemsele Paulusre hari anyoboke hele rime wainyele. ³⁸ Ehubaikoi nekenayende a eleukokene nakena himi hele hubawainyele, belera Paulus bu kayira hebeunguke eiboye.