(Riyaa Kabam Yerusalem Yone) ¹ Ro miyae mbemba Yudea kanira mekate Tuhanre, "Hila rabo halaeinyele yore kelewaimile, Musa yae kelewoumi hene, huba efoloikoinya, meyae wali hena ehubaikoi." ² Paulus Baranabasre bele yo yaele akure yeugoke houbate, belene yae, Paulus Barnabasre eleuboke na ro miyae ehi yaele bele Jemaat na yoyaele Yerusalem re rasul-rasul yaele hubanyaikondere a yeuboke elewatere elenaikondore.. ³ Hokolo bee, re Jemaat yae yawaimiboke bele yo mote aibalekemo alainyekoke Feniasia kanira Samaria kani re eubate, wali henaa kele waimile ro miyae eyitaeiboi yore rei maisele koubawaimile. ⁴ Yerusalem yone mekate he bele Jemaat na ro miyae Tuhan namota ohowate yo beyu-beyebare hebate yo ahuba hubaimile, Allah na me nibi anibi nabaka ranne keleumi huweimiyande. ⁵ Beleyaere Farisi holona ro miyae Tuhanre hakainyekoke yo anyukate waimile, "Yahudi bam ro miyae maei huba folonayenggombe re, makanebam Tauratre hakombombere na!" ⁶ Beleneyae Tuhan namota ohowate yo yaele nembainye a elenggombe. ⁷ Heki hele itaei ehire-ehire elaikoke belera Petrus afae anguke weumi, "Aka naei baeke naei, meyae mataei sele na bena hele Allah yae mai nolora rare eleukoboke, Tuhan na ako faeuko yomoi yam monya yore keleremile boronate na kenane nahele yae elenate nekenate. ⁸ Nawanem Allah ro miyae maei kena ei nataei, Roh Kudus meke eweufike, aere ikeume wanem mbai, ⁹ Nawanem Allah Neyae be ijokore erei, nahila rabo halaete, nanebam fanyeumibonde. ¹⁰ Mana makane Allah re umali yae hubaungele nawanem Allahre hakanyekoke yo ehe bukulu na uranne hayejaumile nawanem aei yobe naete eyae nanemene ekaeiboi? ¹¹ Beleyeare eyae Tuhanre nahele yae elandekokene, wali hena Yesus Kristus re eita ikeume, bele yore nameakai wali hena ikeumi." ¹² Bele a wamem hokole bee elewotene, naneme a bammo nekewate, Barnabas Paulusre Allah yohi-yamsire mokowoumi mehi-mehi yae ro miyaere yakalaumile. ¹³ Hokolo bee ahuba huweimike uramo, Yakobus yae weumi, "Aka naei baeke naei, rare anggaeai borondobo. ¹⁴ Simon yae weumi Allah nabere hele yomoi-yammonya yore eleuboke Naei ro miyaere yaeibokate, bumare kolonainyelere. ¹⁵ Allah ne yendo-kayayo bele mbai jae elewate, ¹⁶ Beleramo, Reyae benem berohonde merele, Daudre yo imae ruke honoye benem elaeyerembonde arunnunde, ¹⁷ belena ro miyae nukaimiboke nekate yo arileremibonde, Tuhanre buma kolonainyele, Allah Naei kerane koye wanembae mokonayende, ¹⁸ neyae na bena hele itaeyeuboke nekayeke. ¹⁹ Beleneyea reyea obene nekeuke, eyea yomonya romiyeare orohalum eyejea makanebam Allah re hakayekoke neyea. ²⁰ Beleneye mebu eyea rake awuteai homone molomakonde neare imamile mo nau hului jeale kolonainyele hoimerebahere emokojea nawanem Allah nibi are ohonate eyea orohalum eyeijea. ²¹ Makanembam eai yobe neate kamehe neate hera Musa wali herefolokoke, hera ahne-ahine huwaimiyeke nawanem Tuhande. "Yomea ralo imeane mate rokiyate. (Yahudi Bam Romiyea re Homo Molaikate) ²² Yesus na abu ako bele jemaat na beyu-beyeba yaele bele jemaat na ro miyae elaeikokate ukaimile Paulus, Barnabasnaei nembainye Antiokia yore eubate. Namekai Yudas, Barsabas yae wanyele, Silaire hokolo bee ro re raimile bele yona, ²³ homolo riya, homo mbai name yae molaikokatemo ikaimile, na homo rake wanem: "Aka naei baeke naei Yahudi ro miyae bam, Antiokhia na, Siria na, Kilikia kanina ekau nekaube yo, mai foi moi sele: ²⁴ Meyae anggaei borowande ro ehiyo maei nolora mai bokore mekate naeinya a utaei-waitaei kelewayembere onei-oneijae onewaube, ²⁵ beleneyae meyae riya nekandekoke a mbainye elandekoke maei nolona ro elaendekoke, ukammile mai nolore enatere Barnabas Paulusre hakonaimibonde, ²⁶ Hokolo bee, na wali buhae ehokoiboi Tuhan Yesusre aerenemo releinyeke. ²⁷ Belene yea Yudas re Silasre yea homona molandekoke bele a mbai more ungayenggombe. ²⁸ Allah Rohkudus yea rake a meare yakalaume maurane ehewanembea ehubajea hakonggombe wali holonayore em mokombe, ²⁹ mau koya yeale buhenele hoimere bahere atee molonaimilena na hamam aki yeale emea neijae nawanem yokokyea mea-mea koumikoke belene yea mau kayafoi jea hebembe bake hene onomi foka. ³⁰ A elayekera Silasre Yudasre kulum ukete Antiokhia re ekete. Na jemaat arilaimihikemo bele homo na mene ikaimile. ³¹ Bele homo raikokatera bele jemaat nakena rei mai sele hubawanyele, habuhinebam, bele a nakere harare boumine. ³² Yudasre Silasre, yaebai-bubaeine, jemaat re ela ikaimile, ako faeuko helem weubaimile. ³³ Belehera hokolbe beleyone ya mehea-mehea hangga nekeikokete mo bele yona romiyea haimiboke beiboke. Neare hayeaai mike yo pore. ³⁴ [Beleyeare Silas neaikena bele yone nekendere hubawonge.] ³⁵ PAulus Barnabasre Antiokhia yone nekewote romiyeare Allah na ako feako kelewai mile romiyea ahi hakaimikoke nambele ohowate. (Paulus Barnabas re Kaye Moloikoke) ³⁶ Ya maehae-maehae nekaikokemo, Paulus Barnabasre weunge, "Mei eyae baebonde elere aei aka baeke bokore alere, Tuhanre hakainyekoke yo bokore wali nibi a kelaemiyendere yona-yana kelejate ale ijoko ramibon de, na foi mo ekainyekate." ³⁷ Barnabas Yohanis Markus yae wanyele kiyae re yawanyehondere kena koiboye. ³⁸ Beleyaere Paulus na kenara eleye Markus aere ehakoijae, habuhine bam bele kaye bere aere Pamfilia yone nukeumiboke, namekai rake kaliya mekaite neyae nekeu. ³⁹ Hokolo bee are yeuboke kilewote, kaye moloiboke naeite-naete eubote. Barnabas Markus re yaweungehoke Siprus yokobare ekete, ⁴⁰ Paulus Silasre eleuboke ekete, aka-baeke nolora elaeiboke Tuhanre nibi-are eneimokondere. ⁴¹ Paulus, Siria kani yaele Kilikia kani yaele ohoyeke belena jemaatre keleimiyeke.