Yesus Ondofolo Pilatusle Bene ¹ Ya heubokemo imam yunyun bele Yahudi akonayo bele raiboke a hokaikoke Yesusre honai bordere. ² Nebeisa Yesusre hayae ekilaikoke yobai boke ondofolo pilatusle bere eke. Yudas Nauga Nenaeijae Houboke ³ Yudas Yesusre naise heuboke kiyae a boroke Yesus honai bondere, na kenara mehi hako folowole, eke nane roi 30 keping perak imam yunyun bele Yahudi akona yebelere nahibi beumihoke, ⁴ Weumi reyae beko helebe mokou bokale, ndaro ikamale beko mokoi boibe mare ikamale hombombere nebeibe neyae wainyele, meyae rahebe mokomabonde? Nebei wenaijaemo kaeubonde!" ⁵ Nebei roisemo keungehike, Allah yo imae ralo imae einye Yudas nahibi aloungekoke, eke haremo maloufike nahorone nauga houboke. ⁶ Imam yuntun nebei roisemo roukate, elate nda roi ro ha bele ri leubokene, eyae eyaroijae." ⁷ Nebeinye nda roi ekate kani mbaise roukate bulei mokaiboke yohi romi yaere molonate anuwaufe yeuboke. ⁸ Nebeinye nebei buleitan naro baeinyekoke niyae "Roha bele rileu boke kani". ⁹ Yendo kayaalo Yeremia yae molouka ke huluinye yeuboke nebei roi 30 keping perak: "Yudas naei yunde nahului mokonaibonde, nebei mayae Israel ro miyae elewate. ¹⁰ Tuhan Allah naei mayae eleukoke, neyae ekate kani mbaise nebei roi roukate. ¹¹ Yesus ondofolo bene hebeungukemo, ondofoloyae hineunge, nahale wa are eleukokae wanen." ¹² Nebeibe imam yunyun bele Yahudi akona bele hinewainye, Yesus amun fawmun hebewole. ¹³ Benen ondofolo hineunge wa boroyae ndi yoni yoni mekate ware ahunayete?" ¹⁴ Yesus amun faeun mun hebewole nahi mahi ahunewainyele hororebae ondofolo Pilatus fanggengge bowole. Pilatus Nahului Ban Yesusre Hayenne Konde Naeise ¹⁵ Paskah ya kabanya meijeiboke, kawane hebate yo rombai ondoloyae hayei koyounge naei kenare kate huluinye. ¹⁶ Nebei hee kawa einye rore rowainye ro mbai naro Barabas. ¹⁷ Ro miyae helensele mekate Pilatusle obene arileufikemo Pilatusyae hineumi, maikena ndebe haisenggondere Barabasbe, Yesus be?" ¹⁸ Pilatus nasaei, Yesusre kena hensen aerene ahaeinyekoke. ¹⁹ Pilatus naei anggen nuwei ranne nu weibo kemo, na miyae a ukeumi ikate wainye, Yesusre mahi mahi mokoijae manaya reyae imene bekohele releyanale naei aerene," ²⁰ Nebeibe imam yunyun bele akona yobele naei kena kaban Barabasre hayennekonde, Yesusbe honai bonde. ²¹ Benen ondofolo Pilatus hineumi, mai kena ndebe haisenggondere? Neyae kaenafe Barabas!" ²² Nebeinye Pilatus yae neumi, Yesus nane Kristusyae wainyele kiyaere rahebe moko rembonde?" Neyae wainyele, "ofalene boiko!" ²³ Pilatus yae hineumi, "rahene? rahe beko mokowolene?" Nebeibe neyae benen kali kekei sele kaenewate, " ofalene Boiko!" ²⁴ Nebeisa Pilatus hubawonge, nda akuunau haite neyae habaiboi sului, nebeinye name bu kuyekokemo weumi, ndaroha rilembonde reyae raei bele ban nebei ehee menaeijae kaembombe!" ²⁵ Nebeijo yae wainye, meyae mae orona mena bele meyae kaemabonde!" ²⁶ Pilatus Barabasre hayeungekoke, Yesusre rahuwae bouko kemo ikeumi ofalene bonai kondere. Pilatus Nafelayo Yesusre A ne Haye Wainyele ²⁷ Nebeisa felayo Yesusre yawainye hoke ondofolo Pilatusle obere ekate, felayo Yesusre eleyae naenyeboke. ²⁸ Yesus naei malo kaenyekoke, benen malo hiyae hiraunyekoke. ²⁹ Fokoma Isabele mokaiboke Yesus na yunne bunainyeboke, naiwaa na meube mene ikai nyele, buma kaeinyele aholo kainyele wainyele, "onomi honomi Yahudi naei ondofolo!" ³⁰ Elei heisere rorainyele, na mena naiwa roukate na yunne nebei naiwa yae bowate. ³¹ Aholo kainye kokera na ugana malo rubainye boke naei maloyae hirainyekoke yobaiboke ikate ofalene baikoke. Yesusre Ofalene Baikoke ³² Nda felayo alainyekoke moise aibaleke bae Kirenena ro mbaibe hubayaei koke, naro Simon nebei kiyaere ukainyele Yesus na ofale kaeuboke. ³³ Ikate anuwau mbainye naro Golgota, " royunde honate anuwau", ³⁴ Yesusre anggur manimmoyae ikainyele anensindere nebeibe Yesus hubaisisemo hubafike ahi elewolene aneisi. ³⁵ Ofalene baikokera, namalo wahewate. ³⁶ Nane felayo nebeinye raiboke yaka hebewate. ³⁷ Nebei ofalene Yesus nayun ranne molaikoke na aere, "NDA NIYAE YESUS, YAHUDI NAEI ONDOFOLO." ³⁸ Nebeija robee Yesus naei nembainye ofalene baikoke nahi Yesus na meube refine na hiron meli refine baikoke. ³⁹ Ro miyae helen elemale kowate olomo roro wainye na yun we we beleyae kowate, ⁴⁰ Na a ndama yae elate, " Weyae nane Allahle yoimae ralo imaere kelaubondemo na ya namene heubondere elewoyae kiyae wauga hole moloibone, weyae Allahle keluna, ofale randa oyakoibo!" ⁴¹ Nebei hului mbai, imam yunyun bele, ahli torat nane merau Yahudi akona yo bele raiboke a we we ne kainyele wainyele, ⁴² "Romiyae hiwahole molowoumibe, naei ugare bae nahuluiban, Israel naei ondofolo lombe ofaleranda owa koubone, nebeisa meyae naheleyae elema konde naere. ⁴³ Neyae Allahre bahue heungene Allahyae hakoungebone mana Allah kena konggondena, nenaijae elewole reyae Allahle kelu." ⁴⁴ Na ne ro bee nanembainye hilate beeyae naei mekai Yesusre awewe koinyele. Yesus Hereke ⁴⁵ Hu hului mehini mbaisa ike mehin kelibelene nebei anuwau ouben yeuboke hono woke. ⁴⁶ Nebei heyae Yesus kali elae hele kaenele, " Eli Eli lama Sabakhtani?" ,"Arai arai rahene nukare?" ⁴⁷ Nebeinya hebate yoyae elate "Eliare kaeneungeya." ⁴⁸ Rombai hakauboke ike bu manimmo lombe naiwane rileuboke Yesusre naeungehoke. ⁴⁹ Nahiwa yoyae elate, "mana ereman Elia mende hakonnebonde." ⁵⁰ Nebeisa benen Yesus kali nokombai kaeneukoke nebeisa ninae nano hokoukoke u yeuboke. ⁵¹ Nebeimo eratebae Allahle yoimae ralo imaena Ambelae bere bohina kayeukoke owole reubere moloukoke, oinyeu hinewole ruka reu beere molowate. ⁵² Bulei romau wewe molowate, romiyae hilarabo bele yo walewate. ⁵³ Nebei walaeibo keyo, Yesus waleubokera, Yerusalem yo eise ayeuboke nauga romiyaere kelewaimi. ⁵⁴ Fela yun nebei yakare hebewateyo, nebei erewole buhae hokoungebokene elele naheleya, nda kiyae Allahle kelu!" ⁵⁵ Nebeinya miyae miyae helen Yesusre hakainyeboke Galileare mewate ei hawainyemeke. ⁵⁶ Nebeinolona, Maria Magdalena, Maria Yakobusle Yusufle nenake nane merau Zebedeusle fafabee nenake. Yesus Molaisake ⁵⁷ Be bahewolemo Arimateana ro mbai eba bele hebele ro naro Yusuf, naei mekai Yesus na homora orowaitero meke. ⁵⁸ Neyae eke Pilatusre weunge, Yesus na noo roufelereya Pilatus yae weumi kaembo yenne. ⁵⁹ Yusuf nebei nooremo kaeuboke ambelayae bukuneufike ⁶⁰ Eke bulei nemene eu molofake, naei bulei nenaejae waeuboke, ruka kabandemo okungekoke bulei romaufe aheu koke. ⁶¹ Nebeinye Maria Magdalena na miyae hiwa bele raiboke nebei bulei bene nekewate. Yesus Na Bulei Yakayae Hebewate ⁶² Yaa heubokemo, sabat yaa naei henggelen re nanai sinde yaa, imam yunyun bele Farisi holona yobele, Pilatusle bere mekate. ⁶³ Pilatusre wainye, ondofolo,meyae bene nekaimele nane ro ame amere wabewole kiyae, na waline nekewole heyae ugoumi reyae hererelera yaa namemo walere bonde.' ⁶⁴ Nebeinye felayo weimi ai na abulu ranne yaka ai sebe mende yaa namenen kiyaene nendonna moisa orowateyoyae menate kaenai bondebe romiyaere waleubokeyae ungaimile ,"nda ame naei bekohele bena kiyaera." ⁶⁵ Nebeibe Pilatusyae weumi meyae mai yakoyo belebya wemmi yaka aisebe mai kenare kaube ma yae." ⁶⁶ Nebeinye ekate nebei buleitan nemene ahaei koke yaka hebewate.