YAHUBA MOKOI BELE ALLAHLE YOIMAE RALO IMAE KERENSONDE NAEI BELE AHUBA ¹ Allahle yoimae raloimaera eukuke mo na moisa orowate yo yae mekate Yesusre kelainyele nebei imae na kai hiwa. ² Nebeinye nare jineumi, " Meyae nda nekaumeke ereiboimo? Mare naei nahele ufembere naei kerensonde yaa rukambai ruka hiranne ehonoi sului, nemene ombonde onate." Huba Raweiboi Ahuba ³ Zaitun mokone nuweubokemo, ra moisa orate yoyae hinainyele, "Maere weime nane, makeiseyae nda yoni yoni benate yakanate waei meleyaa rahebe yembonde?" ⁴ Yesus yae weumi yaka habembe romiyae hiwa menate mare mokona yembe nalembombe bele. ⁵ Helensele raetoyae menate ronate, elenate reyae Kristus neyaeya, mare wabenayembe. ⁶ Meyae buloofela iwau borombe, ijoko erembe buhae hokoijae, nebei nemene benate ya nebeibe huba mokokoija naneman. ⁷ Yo hi hi bele, kani hi kani hi bele buloofela anyaibonde konate, moni mai nende hebende, onyeu hinende. ⁸ Nebei hubabe raweuboke, na elee kali miyae fare honondere eokowole wanen. ⁹ Mare eiwe eitasi konayembe, honayembe hanyayembe nda kanina romiyae ikele konayembe raei ro aerene. ¹⁰ Nebei hee yembonde, romiyae helen naleisi konate, ei sure meisure konayembe, aka ikete baeke ikili maisenaise nekembe. ¹¹ Raei yendokayaalo wanen helensele balenai mende, romiyaere wabenaimile. ¹² Beko helen bende, kenabuhae ubuhae, yeiwahei wende bunime yembonde. ¹³ Nebeibe nde kena herawembondekiyae, walihena hubainyekonde. ¹⁴ Nane mekai Allahle a foi faeu foi nda kani kaban kelaakaban hurende nalende romiyae Isaei nyai bonde nebeisa wa hubamokokoi ya menjembonde. Omi Rebabele Kristus Memehaubele ¹⁵ Nebeisa erembemo bekore mokole kiyae yendo kayaalo Danielyae eleukoke kiyae anuwau yolo yolone hebennunde nahale yae eyal isaeimabonde, ¹⁶ Aei Yudeanayo mokore wahale yae hakamakonde imale. ¹⁷ Nde imae ranne nekende kiyae, erambun ana honatere aijae. ¹⁸ Hekena anayo imaere malo roweise habeleimeijae. ¹⁹ Kena buhae hele miyae emaleyobele fa nimene naei mile yobele nebeijane. ²⁰ Ebeli bole nebei hakau bondeyau yaban aluban nane merau sabat yaa ban. ²¹ Rabuhineban nebeisa mahi mahi buhi wahi benate yakanate rambun eme wanen. ²² Nebei yaa aeki helenebae, hiyae hayae wali enekei sului nebeibe elenggonde yo nae aerene nebei yaa nobe yembonde. ²³ Nebeisamo ro hiyae waere ungete ereibo Kristusa ndana nare, ndina nare. Nebei weyae boroijae. ²⁴ Raheneban Kristusle wanen helensele yakanate name u emekai helen mokonate romiyaere wabenaimile. ²⁵ Nebeibe meyae masaei reyae na bemere mare ukamale. ²⁶ Nebeinye nendaemaa horo mare wabenayembe meyae boroijae. ²⁷ Raheneban wili weubyole ralira yoboibyole waise oyowole nebei wanen raei mereleyaa bende ²⁸ Makeinye heufako kafako fate nebeinye ayerote arilele. Yesus Naei Mende Ya ²⁹ Nda yoni yoni hubamanggonderamo, hu wende kebenggonde oko hehe nundembonde findelau yakura balenate, bumana ana nemene kusemmile. ³⁰ Nebeisamo Yesus mendenaei iwau yakune rilende nda kanina yoho yoni yoni rime kali bonate. Naei ijoko yae kanenainyele Yesus menggoranda na one henggobele mende. ³¹ Na buyo ayore wemmile aemim na laekei seleyae ranenate naei romiyae riyane ko bounge arilemmile ralira waisa ebunda robunda nane merau kani huba hira hira. ³² Manae usaei ara none ahuneu bokale hiyae isayembo na minsa akau reu eme hireumi yaetene meyae isaeyeuboyaube yakamare yembondere. ³³ Nebei hului mbai nda yoni yoni baete yakatene meyae isayaeuboke Yesus mendere nobeungeboke foman kelaeunga. ³⁴ Mare nahelebe wamale nda hokolo e weyeimo nda rambun nemene inyaei bonde. ³⁵ Yakubele nda kani kelabele en nundembonde nebeibe raei akoo faeukoo hena bona honobayende." Makei Heeyae Yesus Mende ³⁶ Nebeibe raei merele yaa naeise hiyae hayae isayeiboimo ra buyo ayo naeima isiyam reyae naeimaa isiyam maeko nembai naisaei. ³⁷ Buhle heene yeuboke maa nebei sului mbai raei merele ya yembonde. ³⁸ bu eruweikoi hee ro miyae ufei yaroi bulau eramokoi romiyando nebei humfo wamfonemo kowate Nuh waka eise ewefike. ³⁹ Naei mekai isayeiboimo kowate bu meke ufekoke, romiyae heraiboke nebei hului mbai raei merele yaa. ⁴⁰ Roo bee hekene ane mokonete mbaisemo rowende hikiyaeron nukennebonde. ⁴¹ Miyae bee rukane youbenete hi kayeremo rowende nahi ron nukennebonde. ⁴² Nebeinye yaka hebembe, meyae masaeiban makeijare Tuhan mende. ⁴³ Meyae isayembombe, imae rowa yokolo mende naei isayrei byolene yaka na huwaera ei sebewole nebeinye na imae ekelaiboi. ⁴⁴ Nebeinye meyae mokonnehambe rakembe raei mereleyaa meyae isiyanne. Abu Ako Foi Bele Beko Bele ⁴⁵ Abu ako foi kiyae narowayae mon yennele na imae ei obe einya yore neyae inyale kolom mile? ⁴⁶ Nebei abu ako ma narowa mende erennele bae kaliare hebaen hebaen. ⁴⁷ Nebeinye mare wamale ma rowa nebei abuakore kaembonde naei seyombonde na hoime bahe belene. ⁴⁸ Abu ako beko kiyae na kenara elele, rowa emeijae foi,' ⁴⁹ Na abu ako hiware erahuwae bowole bu elaere anate yobele awai boke nembainye,' ⁵⁰ Na rowa naei mende yare ubene enekei si naei mendeyaa nane merau isaeyeiboi, ⁵¹ Mende na horonen sande, beko yo bele na nembai nye ham mi konde nebeinye eleekali na hera kili kili bele konate.