Yesus Musale Eliale Nembainye (Mark.9:2-13, Luk.9:28-36) ¹ Mon mbaimo Yesus Petrus naei Yakobus naei, nane merau Yohanes naeise yaweumibokhe mokhore kitekhe. ² Ikate mokhone, Yesus na u rabauka mahi yeubokhe, na be yoi wili halaman, na malo wili wili bowate. ³ Nebeise erainyele, Musale Eliale mekhate Yesusle bokhone hebaibokhe ane elate. ⁴ Petrus yea weunge, "Tuhan, weyae khenane naei foi sele ndane fale name hemakhondere ya, mbai Weai, mbai Musale, mbai Eliale". ⁵ Petrus anemo eleleyea manggo okhe feleumibokhe, nebei manggo nolora a borate elele, "Nda Reai Khelu (Fa) khenare khanale niyea. Neare boronne." ⁶ Nebei a borowatene Petrus naei be are ainyekhe, buhea hokhowoumi. ⁷ Yesus yea mekhe yenggeumikokhe, weumi, "Annu buhea hokhoijea." ⁸ Na ijokho waijekhe Musale Eliale oloo, Yesus nembaimo erainye hebele. ⁹ Mokhora okhate Yesus yea weumi, "Mokhona erekhaube rambun hire hire eweijeamo, rakhembe Reyae abulura walerebondemo." ¹⁰ Nebeibe, "Rahene ahli Taurat yea elate Elia bhere mende?" ¹¹ Yesus yea weumi, "Nahelebya Elia bhere mende, onomi mokhombonde. ¹² Reyae mare wamale, Elia na bhere mekheya nebeibe neyae onewainye nebeinye u mekhai bekhoyea khelewainye naei khena huluijea. Nebei ma mbai Reyae naei me ne bekho mokhowaise." ¹³ Nebeinye neyae isayaeibokhe nda Yohanesle a bhe Weume. ¹⁴ Yesus Naei romiyea heleng nolore mekhate bele, ro mbai mekhe oro selen selen yea roroukokhemo weunge, ¹⁵ "Tuhan, buhea heisokho ra faa boiboijea bate i ranne ruwele, bune ruwele. ¹⁶ Wa Una homona yo naei bokhore mekhendebe nahului ban onomi erowei." ¹⁷ Yesus yea weumi, "Mai bele ae, hilaban raboban hokholo, heki hele mai nolo ukhainyemo Nekheimeyalebe mayea raboban sele ya. Ndare yawennoho meu nebei faa." ¹⁸ Yesus nebei faa na ugana walobore okhu nekheunge eukuke nebei faa nahibi onomi yeubokhe. ¹⁹ Nenaeimo nekhewate hemo, Na Una homona yo mekhate Yesusre hinainye, "Rahene meyea walobo romiyea uganare hukheisi hului?" ²⁰ Yesus yea weumi, "Mai rabo halei anahele. Nda nahelebe mare wamale, mai rabo halei sesawi kho huluijea , ndi mokho nahului waungele ahire euge, nahului yeugoge ya. ²¹ Nebeibe nda holo kiyea, hila rabo elaeyae nane merau puasa bele yaere nahului walobo hukhennehimbe." ²² Galileane Yesus Naei arilaisikemo Neyae weumi, "Rare romiyea naei meranne kinyenaisebonde etufele, ²³ nebeisamo honaisebonde, ya namenen kiyeane Reyae walerebonde." Nebeinye na una homona yo na khena bekho yeaibokhe. ²⁴ Kapernaumne ekhate, pajak dirhamre arilate yo mekhatemo Petrusre hinainye, "Mai khulube elande pajak dirham mokhole?" ²⁵ Nebeinye Petrus yea weumi, "Yo mokhole." Imea eise ayeubokhemo Petrusre Yesus yea hineunge, "Ndelera ondofolo ondofolo nda khanina pajak yarate? Na fafa neaisa, romiyea hiwa neaisa?" ²⁶ Petrus yea weunge, "Romiyea hiwa neaisa," Yesus yea weunge, "Nebeinye na fafa pajak emokhoi. ²⁷ Nebeibe kharo ya, mana elemo khaigwa bhure wowondemo kha bena yobougonde kiyea, na euga weungendemo roi 4 dirham rowele, elemo weai bele Reai bele naei pajak niyea yeumile."