Nde Surgane Khabanin (Mark. 9:33-37, Luk.9:46-48) ¹ Yesusre na una homona yo yea mekhate hinainye, "Surga yo einye nde na khabanin hele?" ² Nebeibe Yesus fa mela khaeneungekokhe mekhe, na nolone hebeungukhe, ³ Reyae mare wamale. "Mai uga himalembombe nda fa melae wanen yembombere mayea surgare emembombe. ⁴ Nde na khena u ane rannenihinde fa melae wanen yembondena neyae khaban sele surga yo einye. ⁵ Nane merau nde fa melae yawennehonde Reai Ro yea nebei raerebe yaweufehokhe." A Usaei Bekho Emokhoi Naei (Mark.9:42-48, Luk.17:1-2) ⁶ Nebeibe nde fafa melae melaere mokhomibonde nalenaibondena, naei foi sele nebei kiyeare nahorora rukhayea banyaisinde bumokho nolone enainye ruwanbonde. ⁷ Nda khanina romiyea bekho heleng sele! Nebei kharo benate nebeibe bekhore yobombonde mende kiyea nenaei bekho yembonde. ⁸ Bekho wa me bele oro bele yea mokhoubondena nebei me bele oro bele foloukonde hayeukonde. Raheneban, na foi sele me hun, oro wandu yea wali henare ele, nendon wame oro na bhenebe itanne euhukhulende bele. ⁹ Bekho weai ijokho yea mokhoubondene, nebei ijokho wowonde na foi sele wali henare ijokho refiyea ele. Nendom ijokho na bene foibe itanne eu hukhulende. ¹⁰ "Ijokho foijea erem, fafa fele felere ane ehayeaijea. Nebeinye mare wamale surgana malaikat Maekhole Beyoi ereyainye. ¹¹ Rahene ban Reyae romiyea nundaei bokhe yo naei hole moloiboise mekhale. ¹² Meyae nenda eraunge? Ro mbai na domba 100 hele, mbaibe nundeubokhe, nebeinye 99 domba nukeumibokhe mokhone nda mbaise baewekhene. ¹³ Hubayeikokhene rei mai khowole nda 99 domba nolora. ¹⁴ Nebei ma mbai Maekho surgana na khena nda fafa melae bekho enaibendena". ¹⁵ "Wa akha beakhe bekho mokhombondena ele na bekho kheleungebonde, ware boroneibotena, weai akha beakhe neyae. ¹⁶ Ware eboroiboinya ro bee bele yaweumibonde, ro bee name naei eugara belere, a nahele elemakhonde. ¹⁷ Neyae ahi elendena, jemaatre weumile, jemaat bele ahi elendena, neyae yoho yonggo hire yembonde pajakre arilende. ¹⁸ / 18Mare nahelebe wamale, rahe rambunnda khanina ha kilenggombena surgane naeima ekikenaikonde. Nda khanira bulaerennelena surgane naeima bulaerenainyele. ¹⁹ Benen ufembere, ro bee nda khanine a elenaikonde erabuhire rinyeisindere, Maekho surgana ehen khommikonde. ²⁰ Rahene ban, makheinye ro bee name arilensinde Reai Ro einye Reyae naei nolo ukainye Reaibele. ²¹ Petrus yea mekhe Yesusre hineunge, "Tuhan, raei akha beakhe bekho mokhonsebondena, rokho 7 yea buhea herenggonde?" ²² Yesus yea weunge, "Rokho 7 yea ban ya, rokho 70 benen 7 bele yea. ²³ Nebeinye surga yoyan a ahuneubokhe, ondofolo mbai na abhu akho bele a mokhoinyehakhe. ²⁴ Ro mbai ondofolo na roi 10.000 talenta rouke nebeibe ebesoi moo. ²⁵ Nebei roi rouke ahekoimone nebei ro na miyea fafa na rambun imaena nemene yaraikokhe naise henaikondere. ²⁶ Nebeibe nda ro mekhe oro seleng mae roroukokhe ondofolole bene weunge, 'Ondo buhea heisokho, nebei roi nemene aherekhonde ya'. ²⁷ Nebeinye ondofolo buhea heungekokhe weunge niyea ya u baeye. ²⁸ Nebeibe na abhu akho eukuke be benen 100 dinarre rouke kiyeabe hubayeikokhe, nahibi ikileubokhe na norora roroukokhe. ²⁹ Nebeinye weunge, 'Kharo ya rakhei nemene bereisote ya'. ³⁰ Nebeibe ahiyea ukeunge yoboubokhe khawane aheungekokhe aheukokhe wa rawengebokhe meukuke. ³¹ Abhu akho hiwayo nebeima erewatene mekhate ondofolore ukainyele. ³² Nebei kiyea kaenaeinyekokhe mekhe ondofolo yea weyae ro bekhoya Reai roi roukae eyeimone ware khena buhea khokokhalebe. ³³ Rahene weyae hiwayore khena buhea ehekoi, reyae mokhoubokhawale wanen. ³⁴ Ondofolo nahibi ukeumi rahuwae olaeinyekokhe benen ondofolo na roi beungehokhe. ³⁵ Maekho surgana nebei hului mbai mare mokhonembe akhare baekhere ma khena buhea eheikoinye.