Allahle Era Hena Bele Romiyea Naei Man Bele (Mark. 7:1-23) ¹ Farisi holona bele ahli Taurat holona bele mekhate Yerusalemne Yesusre hinainye, ² "Rahene Wa una homona yo aei man horaibokhe? Name bhu khuyeikoijea feuw yarate anate!" ³ Yesus yea weumi, "Mayea neai ma rahene Allahle era hena horaubokhe mai man aerene? ⁴ Allah nda wanen mae eleukokhe, 'Anale araitere foijea mokoumile nde nenakhele neakholere olomo roromilena nahibi honaibonde.' ⁵ Nebeibe meyae elaube, "Hokholobeere imamile rambun roukande Allahre ikannele lombe," ⁶ akho nakhere foi moi emokhoiboi nebei kharo, nebei umekhai Allahle era henabe hobaeuboke mai man aerene. ⁷ Mayea romiyea bekho, nahelebe Yesaya yea eleukokhe: ⁸ Nda yoho yonggo Rare euga bunei randa mo buhea haeisele, na khena bae ahau buhau Raeisa. ⁹ Nendongbe Rare buhea haeisele, romiyea neai a usaei be yaraikokhe kelaeimi Reainya ban." ¹⁰ Nebeinye Yesus romiyea khaneumikokhe a weumi, "Borombe isayembe! ¹¹ Euga eise hunande ate rambun onomi honomi hele eugara miose baleimeyate rambun niyea romiyeare bekhore mokhommile." ¹² Na una homona yo mekhate Yesusre wainyele, "Nebei a eleukokhae Farisi holona yo na khena bekho yaeibokhe." ¹³ Nebeibe Yesus yae weumi, "Era meleme Maekho yae emolosai kiyea na khambura raungaibonde. ¹⁴ Ne naeijeane. Nebei romiyea ijokho khumba benen khumba yore yawaimi lombe. Nane merau khumbayo yea romiyea khumbare yaungaimilena nemene abulu einye enai balende." ¹⁵ Petrus yea weunge, "Nebei a eleyea meare kheleimiko." ¹⁶ Yesus yea weumi, "Mayea isayeiboimo? ¹⁷ Mayea mabeaiban eugara hawande rambun ole yarelera ehere baleiboyande? ¹⁸ Eugara baleimeyate yo niyea khena eisabe mele nebei niyea romiyeare bekhore mokhammile. ¹⁹ Khenara ubene bekho naei yakhaibyole, ro hoisoi, yokho kaeimae, ame ame, romiyea naei ahufuw. ²⁰ Nda rambun niyea romiyeare bekhore mokhommile ramang me khuyeikoijea anemale nebei horo maro ya. Romiyeare bekho emokhoijea. ²¹ Nebeisa Yesus Tirus bele Sidon belere fokhe. ²² Kanaanna miyea mbai mekhe Yesusre khaeneunge, "Buhea heisokho Yesus Daudle Khelu! Reai meanggefa na u bulune walobo yea ayeubokhe ya nauga bekho hele bele. ²³ Nebeibe Yesus a mbai faeu mbai nebei miyeare ewei. Nebeinye na una homona yo yea mekhate wainye, "Nebei miyea eune aei moisa nahibimo khaenende bele ya." ²⁴ Yesus yea weumi, "Reyea Israel yoho yonggo nolona domba nundaei bokhe nebeise ukeufe mekhale ya." ²⁵ Benen nane miyea mekhe Yesusle bene be areyea hebele weunge, "Tuhan rikeisobo." ²⁶ Nebeibe Yesus yea weunge, "Bekho mekhai fafa naei feuwbe roumale yokhure haimamikonde." ²⁷ Nebei miyea yea weunge, "Nahele Tuhan, nebeibe nebei yokhu na rowale meja randa balate ramang mohi mohi be anate." ²⁸ Nebeinye Yesus yea weunge, "Miyea, wahila rabo khaban sele ya! Weai khenare khoyea mekhaijea yeubo wa ugane nebei he yea nahibi na meangge onomi rouke. ²⁹ Yesus nebeisa oro moloubokhe Galilea bhu enera ike mokho randanne nuweubokhe. ³⁰ Nane merau erayo buloyo heleng sele keawate mewate. Yesusle bokhone relewaimi Neyea onomi mokhowoumi. ³¹ Romiyea fayea bowate nebei erewatene, amung yo a elewate orora nimaibokhe yo oro orowate, khumba yo ijokho erewate, Allah Israelre buma kholowainye ³² Na una homona yore ukeumi mekhate, weumi, "Reyae khena buhea u buhea Ro. Nda romiyea Reai bele mo, ya name yeubokhe na moni yea enatere nendon hibe nibine hokhonnekonde bele." ³³ Neyea wainye, "Feuw nebei heleng ma makheisa yaromakhonde nda anuwau mon romiyea heleng sele." ³⁴ Yesus yea hineumi, "Ma mena feuw neneng?" Na wainye, "Feuw 7 na kha fele fele bele." ³⁵ Yesus nebeijo ukeumi a ne raibokhe. ³⁶ Nebei kha bele feuw belere mo yaroukokhe, Neakhore helem foi ukenge, nebeisa khayewole iwoumi wahewaimi. ³⁷ Anaikokhe uga raeibokhe nebeisa na khalun arilaikokhe olong 7 hele mea mea khaikokhe. ³⁸ Nebeise anaikokhe yo ro moo 4000 miyea bele fafa bele me beakoi. ³⁹ Nebei romiyea ukeumi ewatera Yesus khakai einye hebeungukhe neaisike Magadanre ewate.