Herodes Yesusle A Borokhe (Mark. 6:14-29, Luk.9:7-9) ¹ Herodes nebei he yo ondofolore nekhewole Yesusle a borokhe. ² Na buyo ayore weumi, "Nda Yahones nane bure kholoumi kiyeabe a bulura waleubokhe nebeibe buhi wahi mokhole ya." ³ Yohanesre Herodes yea ekileubokhe khawane heungekokhe, Herodes na akha beakhe Pilipus, na miyea Herodiasle khenane. ⁴ Nebei miyeale khenane Yohanes Herodesre a elea ukeungene. ⁵ Nebeibe romiyea heleng naei ubereyau hayewolene Herodes Yohanesre khabewounge hombondere Yohanes Allahle yendo khayalone. ⁶ Herodes na ralo yakhama eme baraungebokhe yaa eraman bulau mokhoubokhe, nebei khanina romiyea yunre nekhewate yo khanewoumi mewate, nebei rei mai khowate nolone Herodias na meangge aungekhe bea yahewounge Herodes rei mai aungebokhe, ⁷ Ondofolo Herodes yea aholo khole nebei meangge hineunge weai khena rahe rambunde riyeufindere nahibi isetere. ⁸ Nebeibe nenakhe Herodias yea a moi moi mokhoungekokhe nda meangge yea weunge, "Rare nda heyaemo Yohanes bhure khoumi kiyea yun hotene aubonde yeufele." ⁹ Yohanesle yun mae riyeufikene Herodes na khenara bekho hubawounge, nebeibe yun yun hokhowole nolone eleukokhene ehen khokokhe. ¹⁰ Yohanes na yun na khawa einye ekhate naeisakhe. ¹¹ Nebei yun hotene aibokhe rokate mekhate nda meanggere ikainyele, nda meangge nahibi nenakhere ikeungele . ¹² Yohanes na una homona yo yea na uga roukate khanine molaisakhe ekhatemo Yesusre ukainyele. ¹³ Yesus nebei a borokhene, nebei anuwaura khaise efilekokhe a hire yae ekhe akhuban nauban anuwaufe, nebeibe romiyea heleng nebei borokhatene benen Yesus na moisa alainyekohke fowate. ¹⁴ Yesus meukuke nebei romiyea heleng erewoumine khena buhea khowoumi nebeine era yo bulo yo onomi iwoumi. ¹⁵ Be bahewolene bea na una homona yo mekhate Yesusre wainye, "Nda anuwau akhuban nauban nane merau be baheyole, weimi na yore yore ai ramang aiyaroko anenaikonde naei". ¹⁶ Nebeibe Yesus yea weumi, "Rahere enatere mayea ramang yemmile anenaikondere bya". ¹⁷ Ndana bangga hangga ya, feuwmaehae mbai kha bee bele mo ya." ¹⁸ Yesus yea weumi, "Ndare yaronggo mai." ¹⁹ Ndi romiyea wemmi khe ranne anggen raibo, nebei kha bele feuw belere mo yaraikokhe na be bumare weungekhe Naekore helem foi ukeunge nahibi nebei feuw bele kha bele khayewole na una homona yo re wahewoumi nebei romiyeare wahe waimi anewate. ²⁰ Nemene anaikokhe uga raeibokhe, benen na khalun arilaikokhe olon 12 hele mae mae khaikokhe. ²¹ Nda ramangre anaikokhe yo me baeikokhe ro nemene 5000 hele miyea bele fafa bele me baeikoi. ²² Yesus na una homona yore ukeumi khakai sa hawaibokhe bere fonate refine fonainye rakhendere, nebei romiyea mewate ukeumi na yore yore here bowole ewate. ²³ Yesus nembai mokhore ike Naekhore ebeli bokoise reniyai nolo nembai. ²⁴ Khakaisa fate yo alune wiwo khoifoyate nandolo eleakhei yobowole. ²⁵ Ya hewole ebi aimanu rorainyele hee, Yesus bhu randa aloungekokhe na una homona yo nae bokhore fowole. ²⁶ Nebei erainyele khali khaenate, "Enaelo yea," fe wakhu rokeumi. ²⁷ Nebeibe Yesus yea weumi, "Ma khena leayea, Nda Reyae, bhuhea hokhoijea." ²⁸ Nebeinye Petrus yea weunge, "Tuhan, nebei Weyaene weise reyae nebeise bhu randa fore." ²⁹ Yesus yea weunge, "Na meinye!" Nebeinye Petrus khai eisa akhoubokhe bhu ranne hebeungukhe nahibi aloungekokhe Yesusle bokhore fowole. ³⁰ Nebeibe Petrus alu khaban erewolene bhuea hokhoungebokhe nahibi ruwayole, khali kheanele, "Yesus hakhoisobo." ³¹ Yesus nahibi na me nokheunge Petrusre kileungebokhe, nahibi a weunge, "Wa hila rabo leabanne, rahene wa khena wa wa khoyea?" ³² Hokholo bee khai einye haweibokhe bea nane alu nahibi khalaubokhe. ³³ Nebeinye khai einye yo Yesusre bhuma kholainye, buhea haeinyele a wainyele, "Nahele, Weyae Allahle Khelu." ³⁴ Fokhate Genesaret khanine. ³⁵ Nebeinye romiyea Naere ro raimibokhene khaliyea bowole arilewole erayo buloyo yawewaimi Yesusle bokhore mewate. ³⁶ Yesusre riyewainye na malora ikelenaibonde onomi nahibi yaronate. Nebeinye romiyea nebei ma yea mokhowate onomi yarowate.