Ro Mbai Ohaka Heraiwole Ahuba (Mark.4:1-9, Luk.8:4-8) ¹ Nebei yaa Yesus Imeare eukuke bu enene nuweubokhe. ² Romiyea heleng arilewolene Yesus khakai ranne yeunuweubokhe nebei romiyea nemene bu enene hebaibokhe. ³ Ahuba heleng ahunewole huweumi, "Ro mbai ohakha heraeyewolemo, ⁴ ohakha hiwa nibine balewate, aye yea mekhate anewate beaufokhe. ⁵ Ohakha hiwa rukha ranne balewate, wahale hele kitewate. ⁶ Nebeibe rohansan neaukokhene habaibokhe. ⁷ Hiwa isa ranne balekhate, ninggei ha yea awewoimi. ⁸ Nahiwa khani foinye balekhate ani mokhowate, olo wan wan yo rorele u meahembai (100), rorele u name (60) u mbai me bee (30) bewate. ⁹ Nde anggei bele kiyea, Reai A ererele borombonde. ¹⁰ Na moisa orate yo mekhatemo Yesusre hinainyele, "Rahene nda rambun hine hine ahuneubokhea huwamea?" ¹¹ Yesus yea weumi, "Mare isaei haban khetegokembe surgana nene wae wae isayeubokhe nare ekhelekoi. ¹² Raheneban, nde namena yakha bele kiyae nare heleng boleng inyende. Nde name yakha ban kiyae namera rowende. ¹³ Nebeinye a yae nare ahuneubokhale huwamaele, eratebe ereiboi wanen, boretaebe eboroi wanen, nane merau neyae isayeiboi. ¹⁴ Allahle yendo khayalo Yesaya yea nda mayae eleukokhe, 'Anggaeijea borombe horo, ijokho yea erembe horo mayae ubene erowei nane merau esaeyeiboi hului ¹⁵ Raheneban nda romiyea na khena rukha rukha yaeibokhe, anggaei khunkun yaeibokhe, ijokho khunaikokhe. Neyae khena ekhoi, naei anggaeijea boronaibondere Reai be re menate onomi isemile. ¹⁶ Nebeibe onomi honomi hele ma ijokho eraube nane merau ma anggaei boraubokhe Reai akho feukore. ¹⁷ Naei nahele mare ufembere Reai yendi khayalo, romiyea heleng sele khena khate mayea eraube wanende, nebeibe neyae ereiboi hului. Nane merau eboroiboi hului. ¹⁸ "Na mekhai nda wanen borombo. ¹⁹ Romiyea Reai akho feukore isayeaiboi kiyea walobo yea mende nukhensande, nebei niyea romiyea nane ohakha nibi enene balewate wanen na wali. ²⁰ Rukha ranne balewate yo, nda romiyea holo Allah Na akho faeuko boraibokhe na khena rei mai khowate. ²¹ Nebeibe na khambu khani eise eleman eyeisi bifenmo nahibi buleufakhe. ²² Isa kheleau nolone hobo nolone balewate yo nebeijo Reai akho faeuko boraibokhebe na khena wawa nda khanina bekho bakho yea mae mae koumikokhene ani ban. ²³ Nebeibe romiyea na ohakha khani foi khela foinye heraiwole kiyea, Reai akho faeukore isayeubokhate yo. Nebei yo niyea ani wanggang khowate rorele u mae hambai (100) rorele u name (60) rorele u mbai me bee bele. ²⁴ Yesus benen a ahuneubokhe nda wanenmae weumi, "Reai me khele u khelene nekhate romiyea holo na mekhai ro mbai hekhene ohakha herayeibyole wanen mae ahundebondere. ²⁵ Nebeibe romiyea jonggune honowate hee yea yokeijoro yea mekhe gandum nolone hunbe moloukokhe ewole. ²⁶ Gandum anire hirenate hee yea hun waijekhe. ²⁷ Nebeinye hekhe khaliyare mokhate yo yea mekhate mo na hekhe roware wainyele, 'Rowa wa hekhene ohakha foibe herayeubokhaebe ndi hun makheisabe kitekhate?' ²⁸ Nane hekhe rowa yae weumi, 'Yokheijo ro mbai mekhe nda me u re mokhoubokhe. Nebeinye na hekhe khaliyare meyae nebei hun emale raumakhondere ya'. ²⁹ Na rowa yea weumi, 'Kharo ya nebei mekhai mokhoijae nendon hun bele gandum bele nane mbainye rawenggombe bele. ³⁰ Kharo ya gandum bele hun bele nanembainye kitaei ani hokhokoi yare wa ufemile nebei hun hayae rinenggo inye ensayenggo gandumbe arilensimbe na honoi honoi anuwaunge enggolonggo. ³¹ Yesus benen a ahuneubokhe weumi, "Reai me khele u khelene nekhate romiyea holo sesawi hakha hekhene ate herayeiboyate wanen. ³² Sesawi hakha na bikensele ya, nebeibe moloisayate kitelera khabansele yeibyole oreu ha reu hiware, naei khabanselene mensa akhau rorole ate aye bumana mate nebeinye nale meikolate." ³³ Nebeisa mo Yesus benen ragi neai ahubabe huweumi, "Reai me khele u khelene nekhate romiyea holo nda wanen miyea mbai ragi rouke tepungne aleungebokhe nahibi ohuleubokhe. ³⁴ A usaei wasaei nemene Yesus ahumbo humbo yea mo ahunewole huwewoumi. ³⁵ Nebei ahuba ahunewolera Allah Neai yenjo khayalo yea, "Yesus naei ugare nulainyekokhe a faeu na hului yeubokhe. Yesusle naeise nda ma yea molaikokhe, Reyae nda yore ahuneiboijea ahunerebonde ufemilere rambunde yakharemikondere." ³⁶ Nebei romiyea heleng nolora Yesus imea eise eweufike, Neai u na holona yo yea mekhate wainyele, "Nebei hun bele hekhe bele ahuba maere yakhaimibo." ³⁷ Yesus yea weumi, "Ohakha foise herayeubokhe kiyea wa nebei Reyae, ³⁸ hekhe wa nda khani khela. Ohakha foi kiyea wa Rare hilarabore halaiseleyo, ³⁹ hun wa yokheijo, hokhoikoi yo wa Reai merele ya. ⁴⁰ Hun na bomone inye ungayonde wanen nebei ma mbai nda khani khela Reai mereleyane bende. ⁴¹ Reyae Reai yebaei bubaei ufemile nda khanina bekho yoni yoni riyane arilenate, ⁴² Nebeisa itande hainyate nebeinye rime a khonate hera kili kili bele khonate. ⁴³ Romiyea foijo naheleremo nekheyate yo nauga hu nukhui wanen wili halaman bonate Maekhole Yo Hena Yan Sena einye. Nde anggaei bele kiyea borombonde." ⁴⁴ Surga Yo Hena Hoime bahe khanine moloisayate wanen, romiyea hubayaeikokhebe benen nunne raisike rei mai sele hubawongene ekhe na rambun nemen naise heukokhe benen nebei ajen roijea rouke. ⁴⁵ Surga Yo Hena rambun naise haete ro wanen mutiara na roi bumana hele wanen. ⁴⁶ Nebei mutiara wanen hubayeikokhene ekhe na rambun rambun nemene naise heukokhe, nebei mutiara rouke. ⁴⁷ Wau nau bhune woyate kha buhi buhi mae mae khoikoyole Surga Yo Hena nebei wanen. ⁴⁸ Nebei wau woyate kha heleng selene yabare yea yoboiboyate mele rouboyate na isounge elaete hawate foi foi yoremo bekhoyo hayaete. ⁴⁹ Nebei ma mbai nda khani na huba mokhoikoi ya ne yembonde. Allah na yebaei bhu baei menaibalende romiyea foijo khayee molonaimile bekho yo nolora. ⁵⁰ Romiyea bekho yo i nolore hekhelenate enate. Nebeinye elekhali bonate hera kili kili khonate. ⁵¹ Mana nda yoni yoni meyae isayaeubokhe? Nebeijo nare wainyele, "Yo, isayaendobokhe." ⁵² Yesus yea weumi, "Ahli Taurat Reai yo ho yonggore yaeibokheyo, neyae imea rore yembonde na eba he neme bele male bele nemene yaronde kholonde. (Yesus Naei Yo Ne Hukhewainye) ⁵³ Nebei a usaei weumikokhera Na yo re ekhe. ⁵⁴ Oro moloubokhe ekhe naei yo ne benen Yahudi naei ei mon mon imeane ekhe khelewoumi romiyea fa yea bowate, elate, "Makheisa be nda wanen isaei haban isayewole mokhowole. ⁵⁵ Nda nae Naekho bulau eramokhoise mokhole kiyea? Nenakhe Maria, Na akha beakhe Yakobus, Yusuf, Simon, Yudas? ⁵⁶ Na emaeng wa aei nolo ukainye nare nekhate, nebeibe Nda Isaei Hebaen, makheisa be isaeyewate?" ⁵⁷ Nebeinye Yesus Na yo ra hukhewainye. Yesus yea weumi, "Yendo khayalo na yo ne buma ekhaeiboi huluija na imeane obenere." ⁵⁸ Nane heleng kae kaouw foi yoni yoni mana emoloijea.