¹ Inoe kain etage pogot Yosia nen o Yerusalek Ninopase Etage Pogot hesik isago nasukwa. Ineki 14 atiba tugi alep agik holokogo wam domba warogo isatukwa. ² Ninopase Etage pogot awi wurikmo wesa igilogoluk halusak hesik, At Yosia nen ap wene yogosigilogousak mene hugi wetewerogo menisasikesik it leberisasike. ³ Yosia nen apuni Lewi mene inoba igilogolik apuni Israel yakulisagarek mene nen it inebe ake ninopase Etage pogot hesik tegel hano halogo hisagarek mene hesik. At en mel isike, ''Wene warek tegelek hano mene ari waganogo wolok Ninopase Etage pogot awi Salomo Daud aput, inoe kain etage pogot en wutike oba a'la hikusak, hit en yogotak ya wanusak lek, Ninopase Etage pogot, Walowak hit nen apuni Israel mene hesik yogotak yabu halini. ⁴ Ninoe kain etage pogot Daud nen aput ninoe kain etage pogot Salomo nen yabu halelouagaluk hibe welagasep higit hogo werekma wogisegen. ⁵ Apuni at mene inebe tago higit welek ma mene oguluk tegelek hano halekma, ap esa ake apuni Lewi mene inebe welaigarek higit higit melarik laukwa. ⁶ Wam domba isago oba nen inokawerek en inebe tegelogo hagigilogolik ake inayalak inom inapoke hebelarik laukwa, Ninopase Etage pogot en ane palek hisike mene Musa nen yinogo halusak tinogo halusak iluk igilaike.'' ⁷ At Yosia nen wam kambing Domba apuni Israel mene 30.000 huli oba nen wogosasike, mene re wam domba nen Kambing kulok ket mene hugi, obogat lapukogo waganem yugunat nasak oba hesik watigik hisike. At en wam lembu 3.000 huli oba nen at inoe kain etage pogot ako welaike mene wogosasike. ⁸ At Yosia mene eki esok yabu welaukwa mene pigen pogen natogorogo apuni atoma welaukwa mene,ap Walowak Esewerek, nen apuni Lewi mene wogosasukwa. Hilkia,Zakharia nen Yehiel, ap ukuloak Ninopase Etage pogot awi wurikmo welaikarek mene nen hesik wam 2.600 huli oba wam kambing domba 300 huli oba wam lembu warogo isasusak hesik it ap walowak esewerek mene wogosasike. ⁹ Konaya ake Semaya nen Hasabya, yeiel, nen Yozabad etem wam 5.000 huli oba nen wam kambing domba 500 huli oba wam lembu apuni Lewi mene warogo isasusak hesik wogosasike. It ati inebe re ap ukuloak apuni Lewi mene. ¹⁰ Wesa usak oba hesik arat halogo hisukwa, inoe kain etage pogot ane isike hogot hogo ap Walowak Esewerek mene nen apuni Lewi mene inoguluk welaikarek higit hogo melarik laukwa. ¹¹ Wam domba eak isago mene oba, ap Walowak Esewerek mene nen amep keralek oba kesaluagaluk apuni Lewi mene nen inekim hisukwa,nen apuni Lewi mene nen wam warek mene ogat nokolukwa. ¹² Atiba lagakogo it en Ninopase Etage pogot okawerek mene hesik etu lolesusak oba inebe tago welaikarek higit hogo supurogo wogosasukwa ati Musa nen yinogo halelogeino iluk yakulisasike mene eperak higit hogo halukwa. ¹³ Apuni Lewi mene nen yinogo halono iluk isike higit hogo Okawerek hesik warogo etu oba werago nasukwa. It en hogo Okawerek hesik tegelek hano mene sang hake kuali, huong hake belanga, nen eki hagarek oba isatukwa. Atiba lagakogo it en apuni inukul etage ati mene obogat wogosilik laukwa. ¹⁴ Obogota lapukogo arat halukwasik, apuni Lewi mene hugi it inokawerek lopok halogo hagilik laukwa nen Walowak Eserek Harun nen tagomake mene halogo hisukwa, Walowak Esewerek mene ati nen okawerek hesik amok werek mene weragigik lakeikokolek o huako hagalagalaike. ¹⁵ Apuni Asaf lak ati mene etai watelogousak oba inoguluk inoe kain etage pogot Daud en halago hisikeba laukwa. It atire Asaf mel, Heman mel, nen Yedutun mel, Pelihat ati, kwe apeba heraksaluk lagilek jage kagalek motok welaikarek oba it inayak inebe yi! Apuni Lewi mene nen yihake tihake isago nasak oba arat higit hagat halogo higilaukwa. ¹⁶ Nen, ineki ake atiba yihake ilihake arat halukwa ati isago nikik nen okawerek hesik Ninopase Etege pogot warogo etu loletik usak iluk halukwa, inoe kain etage pogot ena isike hogot hogo at halukwa. ¹⁷ Ineki ake atiba, inukul etage Israel mene waukwasik isago nasukwa nen ineki ake inoe etage pogot awi supruk Roti serasap werago ineki paigoak oba hesik halukwa. ¹⁸ Wene yogosikerek mene Zamuel welaike atiba higit Israel mene nen yi eperak higit halelaukwa lek mene hukoba isago nasukwa. Apuni ake omaket halok inougi inetage pogot Israel mene nen hukoba isago nasukwa ati eperak higit ake halilagilek mene, inoe kain etage pogot Yosia nen halike,ap Walowak esewerek,apuni Lewi mene, nen ap inukul etage Yehuda mene nen Israel, Nen apuni obogat lapukogo Yerusalem mene. ¹⁹ It en ineki ake like tahun 18 huli oba kopokogo Yosia aweama hagasek welaikeba isago nasukwa. Yosia ebe walaike ²⁰ A'nogo nen, arat obogat lapukogo ati nen Yosia nen Ninopase Etage pogot awi halogo hisike, inoe kain etage pogot Mesir mene weim halusak iluk agoromi wogosek o Karkemis i Efrat esakoma laukwa. Yosia nen inoasigin iluk inoba siak hogo wulipike. ²¹ Mene re, at Nekho nen ap ake Yosia oba wene warogo yogosilan iluk lakeiwaike, ''Inoe kain etage pogot Yosia, weim ati hat en halusak lek. An nen neperak weim haluok iluk hoba wesigin lek. selei mene ninom weim haligeluk an wagi. Ninopase Walowak en lan hepok hapok halin ikomo halik. Nopase Walowak en an hanonabilogo mene ati heperak weim halusak lek, hat en weagarogo husak lek.'' ²² At Yosia ebe walegat lek nen at en Nekho eperak weim halugun iluk isike. At ebe eloken neanogo iluk hunigat halogo nen Nekho eperak weim haligeluk oba laike. Nekho ane isike mene Yosia asuk holilek heraksasike, Ninopase Walowak ene isike mene higit hogo,Yosia o tokwe erang Migido weim haligin iluk laike. ²³ Atiba at inoe kain etage pogot Yosia weim halelogolik tok watukwa, nen at en ap atitigeke mene ake mel yogotike, an tok noata mene akoke ou motok mea!'' ²⁴ Ati nen, at atitigeke mene ati nen at yosia ebe kereta oba werekma lisogo walakeiwerik kereta ake hunogoat mene oba liakesikesik wolok o Yerusalem waike. At inoe kain etage pogot Yosia anogo ebe arat walaikomo warek at opalak salinabukwa oba salukwa. Apuni Yehuda mene nen Yerusalem mene inebe ogota lapukogo Yosia walaike ati nen hupi watukwa. ²⁵ At Yeremia nen le wuni mene suesika oba holal palike. Palike mene anogo yogotak yoma ap hemi etai le wuni mene anogo iko motok werek ati nen it en atimene o Israel atoma halogo hilik yogotak ya mene hogore iko motok werek yi. Etai ati ebe suesika a'la holal palek werek. ²⁶ At Yosia ebe inoe kain etage werek hagalarik logolik arat obogat lapukogo halike mene,alep agik aweama hagasek logolik halilaike mene nen pikit awurep oba halik waike oba mene hesik suesika oba a'la holal palek werek. ²⁷ Atiba halik wagalaike mene re alep en motok pikit hobuk awurep huli oba, atoma obogat lapukogo re suesia Alkitab Inetage pogot Israel nen Yehuda mene oba a'la palek werek,'' iluk isukwa.