Inoe kain etage werek Yosia nen o eloken hanotisike wene ¹ At Yosia ebe eki wam mauge 8 huliba nen inoe kain etage werek hagalaike. At ebe inoe kain etage werek hagalaikesik eki wam mauge 31 huliba o Yerusalem aweama hagasek welaike. ² At en Ninopase Etage pogot eilanem hano nak hagalelaike, nen opase Daud halelaike hagat higit, opalek at mene nen, Ninopase Walowak en weak mene hagatelogeinogo iluk iseke mene higit hogo at halelaike. ³ Ineki wam mauge 8 huliba Yosia ebe inoe kain etage werek hagalaikesik aweama hagasek welaike, at en Ninopase Walowak ane palek higit hogo halelaike, Daud hogoratelaike mene, at opalak mene. Ineki wam mauge 12 huliba at aweam hagasek werekolek, at en tom ukul oba ke ako waretelaukwa mene legetisike, apuni-apuni Asyera ebe hake hagarek, nen tugi hareken inekiba auak haligik apuni hake halogo alake kelagigik o Yehuda nen Yerusalem atoma welaike. ⁴ Wulikin hagarek nen oguluk oasi hano mene hareken Baal mene hesik loletarek obake at Yosia eilanem it en weagarogo laksasukwa. At en halogotik nen e mene apuni apuni hagarek hogoratelaukwa yeleken tagalogo lakesik, apuni apuni inekiba hagarek mene mel, nen apuni apuni hagarek oba opoloake kesalarek mene apuni atoma mene hogoratilaukwasik en arat walaukwa mene salinapukake opoloa pilelogo lakesike ati. ⁵ At Yosia nen hareken Baal esewerek logolik yabu halelaukwa mene inoak wulikin halek oba ke etu lolik laike.Yehuda nen Yerusalem eloken soalusak oba hesik he atinogo halukwa. ⁶ At Yosia nen hagatelaike mene wene eperak higit he o sili Manasye, Efraim, Simeon, den kwe ebela o sili Naftali, we ya kake arat weagarogo hilik wagalaike. ⁷ At Yosia nen wulikin halek obogat nen Asyera ebe ineki nen auak hagare weagarogo laksasike. At en Tugi kaneke halogo hilik hogoratarek mene motok weagarogo laksasike, o Israel obogat en haren Baal ati hesik hogoratilogolik oasi hano mene lolletilaukwa. Anogoba nen at ebe apotke o Yerusalem laike. ⁸ Inoe kain etage werek Yehuda mene nen aweama hagasek werekolek ineki wam mauge 18 huliba kopokogo hagalaike, at en o atoma nen Ninopase Walowak awi wurik arat soalogo hisike, at en Safan lakesike, Azalya aput nen Maaseya, ebe o sili ati eki hago welaike ake Yoah, Yoahas aput, wene hagalaike mene holal suesika oba paluke, Ninopase Walowak awi wurik weak aike mene hanoratik nen wutik usak. ⁹ Ninopase Walowak awi wurikmo nen eka wolok waukwa mene Walowak esewerek ebe yabu huko welaike mene Hilkia ekiba hisukwa. Eka ati ebe apuni Lewi mene kwe ape oba jage welaukwa mene nen atogotukwa. It en eka ati atogotukwa re apuni Menasye, Efraim, nen apuni Israel mene obogat lapukogo ake inebe hamulugat Yehuda mene obogat inom,Benyamin nen inebe ake obogat lapukogo o Yerusalem welaukwa. ¹⁰ Anogo nen eka ati ap Ninopase Walowak awi wususak oba yabu halenem jage logogun mene hesik inekiba hisukwa, at jage welaike mene ati nen Ninopase Etage pogot awi wurik weak aike mene halukwa mene ineki oko supurogo wogosasike. ¹¹ It en eka ap o eba wutarek mene nen helep inekiba auak hagarek mene oko wanarek mene nen e ake Tupai-tupai nen e nukulik lakusak oba mene o wurik inoe kain etage werek Yehuda mene nen haraksasike mene halusak hesik ineki oko hisukwa. ¹² Inawerali lek yabu halarek mene. It mene hesik hagalarik jage hagasek welaikarek mene re Yahat nen Obaja Merari nen tagomake mene ebe a Lewi mene. Jage welaikarek mene inebe ake re Zakharia nen Mesulam Kehat en tagomake mene. Nen apuni Lewi mene Pikon wato inetaiken sekesek mene, ¹³ Nen yabu halokolek jage welaikarek mene ake nen o wutenem inom halarek mene inebe obogat lapukogo nen ake yiyabu tiyabu inom lapukogo halelaukwa. Apuni Lewi mene inebe ake miren hake suesika holal halike halogo hsaukwa, yabu haluke woginapukwa, nen kwe ape oba jage welauke woginapukwa. (Suesika Holal Alep Palek Mene Inekimo Aike Wene) ¹⁴ Ineki ake apuni Lewi mene Ninopase Etage pogot awi wurikmo eka wanukwa, Walowak esewerek Hilkia Ninopase Walowak en Musa oba wogotike mene anogo wanike. ¹⁵ At Hilkia nen Safan mel yogotike, suesika oba holal palerek mene ati, ''Hilkia nen suesika palek ati safan wogetelogolik," Ninopase Etage pogot awi wurikmo werekma an neperak apiago. ¹⁶ At Safan en wolok inoe kain etage werek Yosia oba wolok waike nen inoe kain etage werek yogotilogolik, hat hagoromi nen it yogosegen anogo obogat lapukogo hesik arat hagata. ¹⁷ It en eka Ninopase Etage pogot awi wurikmo mene wanukwasik nen it yage welaikarek mene nen yabu halarek mene wagosasukwa.'' ¹⁸ Anogoba Safan nen inoe kain etage werek Yosia mel yogotike, "Walowak esewerek Hilkia nen hogo re suesika holal palek yi an wonete.'' anogoba safan en suesika palek ati inoe kain etage werek eilanem en atage sala. ¹⁹ Nen inoe kain etage werek Yosia nen halelogousak mene inane palek ati etage salenem asuk holike, it en asu ogat laberek mene awologotasike. ²⁰ Anogoba inoe kain etage werek en Hilkia, Ahikam, Safan aput, Abdon, Mikha aput, suesika haluke Safan, nen atitigeke mene etege Asaya, arat yinogo halino iluk yogosasike, ²¹ An hesik mel Apuni inebe obogat lapukogo o Israel werek mene nen o Yehuda mene hesik Ninopase Etage pogot en wene ake sekek hogo yogohisoak en''lani. Wene suesika oba holal palek mene herata onogo oba werek mene ati hinok wanino. Nit nopalak en Ninopase Etage pogot ane palek oba higit hogo halilek halukwa oba Ninopase Etage pogot en nit awit lanisike. It en yinogo tinogo halelogousak iluk suesika oba a'la holal palek mene halilek harasasukwa ati.'' ²² Hilka nen apuni inom laukwa mene amonogo Nabiah Hulda, Salum age oba laukwa. Salum Tokhat aput, Tokhat Hasra aput, at ebe wesa halelogolik su inogat oba lebetelogousak mene hesik yabu halelaike. Hulda ebe o Yerusalem horogat eralu welaike. Hilkia nen inoe kain etage werek atitigeke mene inom en wene hagalaike mene Hulda yogotukwa. ²³ Anogo nen Hulda nen it mel yogosasike, "Ninopase Etage pogot, Walowak Israel mene ane palek werek higit hoho: yino yogosano apuni ake nen hat hinom apiano iluk yogoneta. ²⁴ Ninopase Etage pogot ane palek he yinogo,o oguluk yi nen yoma welagep mene An nen weagatinabigin, ake re homan obogat lapukogo suesika oba holal palek werek mene inoe kain etage werek Yehuda mene nen arat etage sale, ²⁵ Apuni Yehuda mene nen An harakana nen it inekiba nen ake hunigat keangma yoma hogoratarek mene oasi hano meneba loleta atiba An nanini namage laike. Atiba re An nen ukum uguluk yi weak halogo higin agigi mene legetigin lek.' ²⁶ At inoe kain etage werek Yosia nen igilogolik o Yehuda nen Ninopase Etage pogot en uagen iluk an lakanugun, mene hat en at mel yogono, Ninopase Etage pogot Walowak Israel mene ane palek werek higit hogo hat hasuk holen mene re yi, ²⁷ Ninopase Etage pogot ane palek oba hasuk holigin he' oguluk yoma mene hesik nen yoma welaikarek mene hesik ikenem hat hala weak agik nen Ninopase Etage pogot aweama sebek igik igin, hat hebe an neilanem hat hebe sebek igik nen hat hasu hogat lawerek mene awologotigik nen ake an neilanem le agik igin. Nen, an hat hesik nasuk holigin, Ninopase Etage pogot Walowak ane palek oba anogo werek. ²⁸ Eberogoat mene an nen hat hopa lak nen hat hebe hesik he wene koge inala hano oba keang a'la salaugun. Weak mene ake an nen lakeiwaganem oguluk yi nen inebe welagep mene hineileken ake motok hogon lek.'' Hilkia nen ap ake inoe kain atitigeke mene wene warek ati wolok inoe kain etage werek Yosia oba waukwa. ²⁹ Anogoba nen at inoe kain etage werek Yosia nen ap inaluetek hugi o Yehuda nen Yerusalem mene inebe obogat lapukogo wirik at inom weneka ake usak iluk wasasike. ³⁰ At Inoe kain etage werek nen ake apuni Yehuda mene nen o Yerusalem welaikarek mene, ap Ninopase Walowak eswerek mene, apuni Lewi mene, nen apuni inebe obgat lapukogo, inaluetek en pikit yekerugi huli o Ninopase Etage pogot awi wurikmo laukwa. Yosia nen it inebe obogat lapukogo mene hesik inane suesika oba holal palek mene anogo Ninopase Etage pogot awi wurikmo werekma arat wanike. ³¹ At inoe kain etage werek ebe melalaikesik en Ninopase Etage pogot eilanem ane huli warogo hisike. An nen Nnopase Etage pogot opolik lagalogogin nen Nopase Etage pogot en halelogouagaluk halogo hisike mene higit hogo hagatelogogin, nen halogo hisike mene netauken oba nen na'la oba nen higit hogo hagatelogogin igirik nane huli palek suesika oba holal palogo higi ati. ³² Atiba nen lagakogo at Yosia nen apuni inebe obogat o Yerusalem welaukwa mene nen Benyamin nen inane huli palek an wanigin iluk isike ati. Nen apuni o Yerusalem welaikarek mene nen Ninopase Walowak, Ninopase Etage pogot it inovi inopalak mene ane huli warek hisike mene higit hogo hagatelaukwa. ³³ Apuni Israel mene nen hogoratarek mene tugi hareken o sili lopok obogat welaike nak, mene re at Yosia nen obogat lapukogo leket sasike ati. At en apuni Israel mene inebe obogat lapukogo Ninopase Etage Pogot, Walowak it mene, hogoratelogousak iluk yogosasike. Nen at Yosia ebe eluk welaike atem oba, it en Ninopase Etage pogot, Walowak it inovi inopalak hogoratarek mene nen ake herakgilek hogorato motok welaukwa. ''iluk isike.