(Inoe Kain Etage Werek Manasye Welaike Wene) ¹ At Manasye eki wam mauge 12 huliba nen at ebe inoe kain etage werek hagalaikesik eki wam mauge 55 huliba o Yerusalem aweama hagasek welaike. ² At en Ninopase Etage pogot eilanem a'la walok lek mene hagattelaike, wene weak mene apuni etake mene Ninopase Etage pogot en apuni Israel mene ineilanem enarat mogusogo wulaksasukwa. ³ At Manasye nen ukul abake warogo loletarek obake mene at opase, Hizkia nen weagarogo lakesike. At en wulikin Baal hesik halik nen apuni-apuni Asyera ebe hake Ahab, inoe kain etage pogot Israel mene nen halelaike hake eperak higit hogo halike. At en hesagal pogot oba mene hogoratelaike. ⁴ At en walowak keangma yoma hogoratarek mene hesik Ninopase Etage pogot awi wurikmo wulikin halike, Ninopase Etage pogot ane palek oba isike mene werekolek at, "O Yerusalem, An netage esok motok logogin.'' ⁵ Nen at en ap inase werek pogot oba mene hesik wulikin Ninopase Etage pogot awi wurikmo pire nen weitek halike. ⁶ At aput mene warogo okawerek hesik o Ben-Hinom en etu lolike. At en we mera nen hagalasigin iluk halelaike,awerugi eluk mene,kinogo hagalasigin wene yogonisoak en iluk hatale inoba wene hinok apuni walaikarek mene wasigilaike. At en Ninopase Etage pogot a'la abit oba anogo halik motok lagalaike,halelaike onogo elugun oba weak hagalaike. ⁷ At Manasye nen apuni hake tugi hareken halogo Ninopase Walowak awi wurikmo a'la hisike, Ninopase Walowak ane palek oba Daud nen Salomo, aput eperak Okawerek awi wurik hesik arat isike mene at, ''An nen o Yerusalem arat wetewerogo higi ati o sili obogat Israel nen an netage Ninopase Etage pogot awi wurikmo higi atiba esok motok logogin. ⁸ An nen apuni Israel mene keang an nen inopalak wogosasigi mene hewiluk welekma wulibinogo iluk an nen serisek motok logogin, meneat he it en An nane igin mene hologo halelogouak. Apuni Israel mene nen yinogo hagatelogeino iluk wene palek werek mene higit hogo halelogouak, halelogousak mene,nen yinogo halino iluk An nen Musa wogotigi mene it wogosoak.'' ⁹ At Manasye nen apuni Yehuda o Yerusalem welaukwa mene weagarogo hisasike,atiba nen it en weak mene motok hagarik laukwa. It apuni Israel mene Ninopase Eatge pogot en mukogo walakesasike atoma inoabut elok hake mene re it ake ati inoabut motok weak welaukwa. ¹⁰ Ninopase Eatge pogot ane palek oba hat Manasye nen apuni hat mene hinom, meneat he hit hinasuk holusak mea hagalaga. ¹¹ Ati nen Ninopase Eatge pogot en ap ukuloak esa holarek mene inoe kain etage werek Asyur lakewesigin,Manasye hesik ebe hakelik eki hele posiemaken tembaga mene oba warogo wolok o Babel logon. ¹² Wene ati at oba nen hagalaikomo, Manasye nen Ninopase Etage pogot Walowak en lebenean o iluk isike. At ebe Ninopase Walowak at opalak hagoratelaukwa mene awean oakwerek en sebek isike, ¹³ Nen Sapan Ninopase Walowak oba halike.Ninopase Walowak en at sapan isike mene ane holike. Ninopase Walowak en wolok o Yerusalek, at ebe weagaike oba apoke laike. Anogoba at Manasye nen Ninopase Etage pogot Walowak eberogoat higi iluk hutasike. ¹⁴ Atinogo obogat arat hagalaikomo, Manasye nen leget abel hetake Daud awisilimo mo eileken kopogoko kikerek oba Gihon wutike, o toke erang, oba nen motok pikit ikan ape palek oba, tom ukul ofel yiling waling. at en leget ati esiale uang wutike nen ap kaintek weim mene hugi o Yehuda obogat leget waganek obake hisasike. ¹⁵ At Manasye nen apuni etake mene hogoratarek mene nen tugi hareken Ninopase Etage pogot awi wurikmo welaike mene etage lek halogo hisike. At en tugi hareken Ninopase Etage pogot awi wurikmo welaike mene wulakesike nen wulikin Ninopase Etage pogot awi wurikmo halukwa mene ake ukuloake nen o Yerusalem welaike mene wulaksasike. At Manasye nen wulikin halek obogat welaike mene o sili Yerusalem en weleke wugutigik laksasike. ¹⁶ Anogoba at en Ninopase Etage pogot awulikin halike nen okawerek hesik inom liologo waritik nen hano hagalaga iluk warogo apolowa lolitik isukwa. At en apuni Yehuda mene inebe obogat lapukogo Ninopase Etage pogot, Walowak Israel mene hogoratilogousak iluk isike. ¹⁷ Meneat he apuni atoma nen okawerek hesik punuh ukul obake mene wogotik nen it en okawerek hesik Ninopase Etage pogot, Walowak it mene wogetelaukwa. ¹⁸ At Manasye nen obogat halike, wesa halike mene Ninopase Walowak oba pikit lagesike. Nen ap ineleken lagagarek mene inane isukwa mene at oba Ninopase Eatge pogot, Walowak Israel mene etageba isukwa, obogat lapukogo suesika a'la palek werek oba halukwa. ¹⁹ At Manasye nen sapan ikenem asuk holike mene suesika a'la holal palek werek. Nen at weak halike mene obogat lapukogo nen at aweak ati at ebe okawerek en aweama sebek igilek logolik, nen at ebe logousak oba wutike mene punu ukul obake warogo loletilaike mene nen apuni-apuni Asyera ebe hake hagarek mene suesika a'la palogo hisukwa. ²⁰ At Manasye ebe walaikomo opalek salinabukwaba salukwa. It en Manasye ebe okawerek welaikeba salukwa. Amon, Manasye aput ogulukmo inoe kain etage werek ket mane melisukwa. Amon ebe inoe kain Yehuda mene hesik hagalaike ²¹ At Amon ebe eki wam mauge 22 huliba warogo nen at ebe inoe kain etage werek Yehuda mene hesik hagalaike. At ebe inoe kain etage werek o Yerusalem mene hesik hagalarik eki wam mauge pire huliba warogo welaike. ²² At Amon en Ninopase Etage pogot eilanem weak enak halelaike,at opase, Manasye halelaike eperak higit hogo at halelaike.Amon nen Manasye apuni-apuni halike mene wam warogo haogoratilaike, at opase nen apuni-apuni halek ati hogoratilaike. ²³ At Amon ebe Manasye Ninopase Etage pogot aweama sebek isike hake sebek igilek, at opase okawerek en sebek isike, Amon mene aweak motok apigat hagalaike. ²⁴ Amon atitigeke mene nen wene palikesik nen okawere ebe welaike oba wasigin iluk a'la ebetike. ²⁵ Apuni Yehuda mene nen atitigeke mene inoe kain etage werek Amon wasugun isukwa mene amonogo inebe obogat inoatukwa. Anogoba it en Yosia,Amon aput wetewerogo hilik inoe kain etage werek ket mene melilisukwa, ''iluk isukwa.