¹ Arat isago naluk, apuni Israel mene waukwa, o sili Yehuda mene werek laukwa. Anogoba it en atuli telik tugi hareken nen apuni-apuni Asyera hake halek welaike mene weagarogo lakesukwa, it en ukuloake warogo loletareke nen wulikin halek obogat o Yehuda, Benyamin, Efraim nan Manasye, pikit welaike mene obogat lapukogo etage lek halogo hisukwa. Anogo arat halukwasik en ageinapuri Israel mene inaua welaukwa ke lopok laukwa. ² Walowak esewerek nen apuni Lewi mene inebe supurogo awi tugigik it yabu wogosasukwa ke lopok hisasukwa. Nen, Walowak esewerek nen apuni Lewi mene nen okawerek hesik warogo etu loletik nen inom liologo waretik igilaukwa. It en he yabu ake halusak hesik ake yi Ninopase Etage pogot awi wurikmo nen At awi lese wurike kwe ape paleke etai oba Ninopase Walowak hogotilaukwa. ³ At Hizkia agarok worogo lolesusak hesik hisike, ohealegat hup siak hogo warogo loletik nen homaganoke warogo loletik, ineki paigoak oba warogo loletik, tugi ket holokolek isago nigik nen ineki ake inebe wetewerogo apiagik igilogousak hesik halogo hisike. Ati ebe obogat halelogousak mene Ninopase Etage pogot en ane suesika oba palek werek eperak higit hogo werek. ⁴ At Hizkia nen it o Yerusalem welaukwa mene okawerek hesik ap Walowak esewerek mene nen apuni Lewi mene wogosasak hesik yogosasike, atiba it en obogat halogo kesalogo pelagigik nen halusak oba hit hagalaganem it en Ninopase Etage pogot en wene wago hisike mene ati halelaukwa. ⁵ Arat atinogo halelougun iluk isukwama, nen apuni Israel mene nen abi yatukwa mene eken palek alep agik mene gandum, anggur, minyak amusu, kin amusu, nen abi yatukwa mene obogat wogotukwa. It en he okawerek hesik ineki wenagasogo 10 oba hagalaike mene motok abigat huli wolok waukwa. ⁶ Apuni Israel mene nen Yehuda mene o silike lopok welaukwa mene nen ineki wenagasogo 10 oba hagalaike mene nen wam lembu sapi nen wam kambing domba it en wolok waukwa. Atoma mene wolok wagalogolik ake yimene timene tegelek hano mene Ninopase Etage pogot, Walowak it mene aligat mene halogo hisukwasik wolok waukwa. It en awi wutigik hilik laukwa. ⁷ It en ama mene awi wutuka ati tugi henagan oba nen pikit tugi paigoak oba hisukwa. ⁸ At Hizkia nen ap uguloak kaintek waukwa,it en awi wurik ati ineileken hasukwasik it en Ninopase Etage pogot hogoratukwa nen At ageinapuri Israel. ⁹ Anogoba Hizkia nen ap Walowak esewerek mene inoba hinok wogosasike nen apuni Lewi mene awi wurogo liapukwa mene ati anogo hesik hutasukwa. ¹⁰ At Azarya Walowak esewerek uguloak ebe it Zadok lak ati mene nen Hizkia mel yogotike, "Alep agik apuni nen Ninopase Eatge pogot awi wurikmo okawerek hesik wolok waika. Nit ninapuruk nasak mene apik werek, nit supuruk arat ninalabut ekin hogo nokosik nen ato titelek herakogo.'' ¹¹ Anogoba Hizkia nen Walowak esewerek mene hesik Ninopase Etage pogot awi wurikmo a'la sekeleke lopok wekeligik huagaluk yogosasike. Nen arat a'la sekeleke ati wekelogo hisukwa, ¹² anogoba nen ap Walowak eswerek mene nen okawerek hesik, ineki wenagasogo 10 oba hagalaike mene, nen okawerek hesik tegelek hano mene wolok Ninopase awi wurikmo a'la sekeleke wolok waukwa. Konanya, apuni Lewi mene ati yabu re yimene timene natogorogo hisukwaba serogo welaike. Nen Simei, Konanya ayak ebe eki eboke mene welaike. ¹³ Anogoba Yehiel, Azazya, Nahat, Asael, Yerimot, Nahat, Eliel, Yismakhya, Mahat, nen Benaya it inebe atoma re Konanya nen Sinei ukuloak werekma aweama jage welaukwa, inoe kain etage werek Hizkia nen isike higit hogo Ninopase Walowak awi wurikmo Azarya ebe ukuloak welaike. ¹⁴ Kore, Yimna aput, apuni Lewi mene, yabu re kwe ape abel mo yegelogo laiagarek akit welaike, Inopase Walowak inala akaluk wogotarek mene hesik serogo welaike. Ninopase Etage pogot aligat wogotenem wulaparek mene hesik nen okawerek hesik tegelek hano mene wogotarek mene at en halelaike. ¹⁵ Eden, Minyamin, Ysua, Semaya, Amarya, nen Sekhanya nen ap Walowak esewerek mene o sili ke werekma inaberali lek yabu leberisigilaukwa. It en yimene timene notogorogo hegarek mene ati it ukulok hugi nen ap Walowak esewerek mene inebe welaikarek lopok,apuni inaluetek mene inom ake yekerugi mene inom wogosigilaukwa, ¹⁶ It en he yimene timene natogotukwa ati yekerugi ineki wam mauge henagan huliba talaukwa mene ake abel poke inomat wogosaukwa, ati re apuni ake Ninopase Etage pogot awi wurikmo a'la kusak elok mene hugi, it inebe lopok omakima yabu halelogousak higit hogo halogo hisasukwa. ¹⁷ Ap Walowak esewerek mene it inebe tagomake higit hogo inetage halogo hisukwa. Apuni Lewi mene inebe wam mauge 20 huliba nen ake abel poke talarik laukwa mene inetage halek higit hogo nen it halelogousak oba hisasukwa. ¹⁸ Inetage halek it ati mene nen tagomake inebe obogat inaugi werek enak, inageinapuri ap nen helemikirugi apuni ati, it yi inoabut inawerali lek tegelek hano welaikarek atiba nen yabu arat elok halusak oba wogosasukwa. ¹⁹ Harun nen tagomake mene ati re walowak esawerek aukwa, it inebe o welaukwa re o leimo wam konarek oba welaukwa. Nen apuni inebe Harun nen tagomake mene re o sili ati welaukwa. It en ap hugi wetewerogo hisilik inetage higit hogo o sili lopok ap hugi ukuloak walowak eserek welaikarek higit nen apuni Lewi mene ineyabu lopok supurisasukwa. ²⁰ At, Inoe kain etage werek Hizkia nen arat o Yehuda toke hano nak hagatelaike. At en wene hano, higit mene nen eberogoat Ninopase Eatge pogot, Walowak at mene eilanem halelaike. ²¹ At en yabu obogat haligin iluk halenem hano nak hagalagalaike. Yabu Ninopase Walowak awi wurikmo halik nen wene warek oba hologo halik ake anepalek Ninopase Walowak at mene ane opolik higit hogo halik igilaike. Hizkia nen obogat atoma halelaike ati etauken oba nen halenem hano agalaike.'' iluk isike.