(Hizkia Nen Isago Melagasasike Wene) ¹ Anogoba Hizkia nen wene warogo apuni Israel, nen Yehuda mene wereke obogat lakesike, o Yerusalem Ninopase Etage pogot awi wurikmo, Ninopase Etage pogot, Walowak apuni Israel mene hesik isago nasak oba, Efraim nen Manasye it wesuagaluk suesika oba holal palogo inoba lakesike. ² Inoe kain etage werek ap kaintek inom omakima nen apuni o Yerusalem mene inebe obogat lapukogo nen tugi pire oba hagalaga halok isago nuok iluk awok palogo hisukwa. ³ It en isago nogon iluk isukwa anogo oba isatilek, nen ap Walowak esewerek mene inebe ake tegelogo hagigilek mene apigat hagalaike nen apuni inebe o Yerusalem oan atogotilek welaukwa. ⁴ Inebe obogat lapukogo natogosukwasik inane amusuk katokogo palukwama inoe kain etage pogot Hizkia a'la nen hano ega iluk agasike ati. ⁵ Nen, it en inane amusu palogo hisukwasik Israel mene wereke obogat ilik logon isukwa, o sili Bersyeba nen pikit o sili Dan oba isukwama, apuni o Yerusalem Ninopase Eatge pogot hesik isago nogon iluk waukwa. Isago nasak oba apik-apik lek mene re we suesika oba palek eperak higit hogo halukwa. ⁶ Nen, ap ayabu halarek mene ati nen inoe kain etage werek en suesika palogo hisikomo nen hukoba o Isarel wereke obogat nen Yehuda wolok laike. Inoe kain etage werek ane iske hagat, it en mel isukwa: ''Hai apuni Israel mene, Ninopase Etage pogot, walowak Abaraham, Isak, nen Israel, mene oba hinapoke weni, nen Ninopase Walowak hat hoba hobuk werik eluk werekma nen inoe kain etage werek Asyur oba hebe tegelek hese wulibigin. ⁷ Hat hopalak hinom higit nen hat hayalak en Ninopase Etage pogot, Walowak it inopalak ane hologo halilek welaukwa, atiba At en it inayuk asusak mene hale hat heileken hegen eperak higit it hagalaika. ⁸ Hopalak halelaukwa hake hukuloak helep agun, mene at he hokawerek en hebe abireke Ninopase Etage pogot wogono nen Awi wurikmo weno arat tegelogo hano halogo hike atoma moto logousak hesik nen Ninopase Etage pogot, Walowak hat mene esinetikenem hat weak hoba hagalasigin mene legetigiloigin. ⁹ Hat hebe hubuk wirik Ninopase Etage pogot ane holigin halok, nen hat hayalak nen hat hageinapuri apuni nen it haksaga mene hetawi'lak hagalasigin, nen inebe o it inaua yi inaboke hobuk wesugun, nen Nopase Etage pogot, Walowak hat mene re hebe etawi nen etauken hutik welagarek. Hat en oba wesigin halok At en elo'oken lagalasigin lek.'' ¹⁰ Yoko laksasukwa mene ati inebe o silike lopok o Efraim nen Manasye, ake o Zebulon pikit laukwa, mene apuni o aloma nen ap yoko lasasukwa mene ati inoato aukwasik nen inane sagan woksasukwa. ¹¹ Meneat he apuni o Asyur mene, manasye mene, nen zabulon mene inekawerek en inebe sebek hogo nen o Yerusalem waukwa. ¹² O Yehuda Ninopase Walowak oane oba it inetauken oba hagalaikomo it en inoe kain etage werek aweama welaukwa mene nen ayubu halarek mene Ninopase Etage pogot ane higit hogo waukwa. ¹³ Tugi pire oba supuruk Roti serasap werago mene nasak hesik apuni inebe apik o Yerusalem waukwa. ¹⁴ It en o Yerusalem wulikin halek oba oasi hano mene tugi hareken hesik ako warogo loletelaukwa mene wugutigik laksasukwa. it en wugutigik o Kidron toke erangke lakesukwa. ¹⁵ Anogoba it en ineki 14 oba tugi pire holokogo it en wam isago nasak hesik wam domba watukwa. Walowak esewerek mene nen apuni Lewi mene inelali aluk it en inebe tegelogo hano halogo nen okawerek hesik warogo lolesuogoluk Ninopase Etage pogot awi wurikmo wolok waukwa. ¹⁶ It en inoguluk arat it hesik o Ninopase Etage pogot awi wurikmo Musa, Ninopase Walowak atitigeke nen halelogousak iluk halogo hisike higit hogo hisasukwa. Apuni Lewi mene nen mep ap Walowak esewerek mene wogosasukwa, nen mep ati wulikin opoloa ap Walowak esewerek mene nen kesalukwa. ¹⁷ Nen ageinapuri atoma apik at inebe soaligi lek, atiba nen apuni Lewi mene nen wam domba warogo ineki ake isago nak oba apuni inebe lopok tegeligilek welaukwa mene hesik warogo Ninopase Eatge pogot wogotukwa. ¹⁸ Apuni Efraim mene inebe apik, Manasye mene, Isakhar mene,nen Zebulon mene inekawerek en soaligik lek mene, nen it warogo isatukwa mene inom nasukwa, nen it inom isago nasukwa ati hake nasak lek iluk suesika oba palek welaike mene halukwa. Ati nen it hesik Hizkia nen sapan iske, ''Ninopase Etage pogot Walowak hoabut hano, Hat en apuni inebe lopok weak hagata mene leget sano ¹⁹ Inetauken arat halgo hegen mene Ninopase Etage pogot, Walowak,it inopalak mene hesik heratelouak, A'la sekelek tegelek hano welagarek oba atoma anogo halarek lek ob mene we apuni ati inebe tegelek lek logolik halukwa" ²⁰ Ninopase Etage pogot en Hizkia sapan isike mene asuk holikesik At en it weak halukwa mene anogo sagalogo leget'sasike. ²¹ Apuni Israel mene o Yerusalem welaikarek mene ineki paigoak atiba supuruk roti serasap werago nigilogolik inala hai aleken oba welaukwa. Apuni Lewi mene nen ap walowak esewerek mene nen ninhup nanhup Ninopase Etage pogot pikon oba hogorato motok welaukwa. ²² Inoe kain etage werek Hizkia nen apuni Lewi mene inebe obogat lapukogo Ninopase Etage pogot ayabu halelogousak mene hesik wene hano yakulisigilugi iluk augurinapilaike. Ineki paigoak oba it en isago nigik nen okawerek hesik warogo inom liolik nen Ninopase Etage pogot, Walowak it inopalak mene nen hono hanisek welagen iluk hai watik isukwa. ²³ Anogoba it en ineki paigoak oba isago nogon iluk apok wulagasogo hisukwa. Nen, it ineki paigoak atiba inala hai oba isago nasukwa. ²⁴ Hizkia inoe kain etage werek Yehuda mene nen wam lembu kulok tek 1.000 huliba nen wam kambing domba 7.000 huliba nen ageinapuri ati alokop palogo nen isago noagaluk wogosasike. Ap kaintek uguloak en wam lembu kulok mene hugi 1.000 huliba nen wam kambing domba 10.000 huliba nen ageinapuri wogosasike. Walowak esewerek mene inebe apigat en yabu tegelek hano mene halusak hesik inebe soalogo welaukwa. ²⁵ Ageinapuri o Yehuda mene inebe obogat lapukogo, ap Walowak esewerek, apuni Lewi mene, ageinapuri inebe obogat Israel en waukwa mene, nen ap pok o Israel en waukwa mene nen inau heraksaluk o Yehuda waukwa mene, inebe obogat he inala hai apik agasukwa. ²⁶ O Yerusalem en inala motok apik hai aike,nen Salomo, Daud aput,aweakma hagasek welaike huli atem sat wene yi eperak higit hogo ake hagalagilek. ²⁷ Ap Walowak esewerek mene nen apuni Lewi mene melarik apuni hesik Ninopase Etage pogot kino yogotukwa. Ninopase Walowak oba it sapan ikenem At aua o pogot oba aloma nen asuk holike. "iluk isike.