¹ At Hizkia ebe re wam mauge 25 huliba warogo nen inoe kain etage werek hagalaikesik at en eki wam mauge 29 huliba warogo nen o Yerusalem aweama hagasek welaike. Agosa etage re Abia, Zakharia aput. ² At Hizkia nen Ninopase Etage pogot eilanem eberogoat mene nak halelaike, opa Daud lak halelaukwa higit hogo at halelaike. ³ At Hizkia nen Ninopase Etage pogot awi wurikmo kwe weak aike mene hobuk halike nen oanerogo hisikesik en ninopase Etage pogot awi wurikmo kwe ape hurogo hilik laike ati. At en halike re wam mauge alebagik mene nen tugi alep agik mene holokogo halike. ⁴ At Hizkia nen ap Walowak esewerek mene nen apuni Lewi mene natogorogo hisasike. At en it inom apiaukwa re uguluk huko hilaksekma abel mo yegelogo laiagarek hit akit. ⁵ At Hizkia en it yogosikilogolik,'' An nane holino, hit apuni Lewi mene yi. Yogotak hinekawerek en tegelogo hagigik nen Ninopase Etage pogot awi wurik,Walowak nit ninopalak mene tegelogo hino. Oguluk tegelek hanoma nen ake weak agamene werek halok wulaksano. ⁶ Nit ninopalak en Ninopase Etage pogot eilanem ane hologo halilek nen weak huko mene halik lagalaukwa. It en At opolik lagilek nen Ninopase Etage pogot awi wurikmo ake ineileken higilaukwa lek. It en Ninopase Etage pogot piwagarek oba nenk eralu hekhogo ineloken abel lagalek welaukwa. ⁷ It en ninopase Etage pogot awi wurikmo selepon oba kwe yagarogo hisukwa nen esage wialilek nogolik motok welaike. It en wam warogo dupa obasi hano mene Ninopase Walowak Israel mene, o tegelek hono welagarek oba nen ake lolitilek haraksasukwa. ⁸ Wene yiba Ninopase Etage pogot en apuni Yehuda mene nen Yerusalem mene inoba amage lagilik wene pale. At en it inayuk mene halogo inoba legerogo nen seken woksasike ati eperak higit he' hit hineileken oba nen arat hegep. ⁹ Atiba nen at nit ninopalak weim oba walarik waika, ati nen nit ninageinapuri ninalogomi nen nit ninaugi,arat ineki hele warogo wogosek laika. ¹⁰ Yogotak an, Hizkia nen nane amusu palogo Ninopase Etage pogot,Walowak Israel mene wene pale mene ala hano asuak en ninom nane huli wasigin. ¹¹ Nen, an nageinapuri, yogotak ya hinala we ninoa selek aga iluk akagup, nen Ninopase Etage pogot en wenanapesik melogo hane ati re At werekma metek logouagaluk nen at hesik ayabu halusak. Hit hogore At ayabu dupa obasi hano mene oba Ninopase awi wirikmo etu loletelogousak.'' ¹² Apuni Lewi mene yabu haluogelukisukwasik inetage halukwa mene ebe re ati: It Kehat mene inebe re Mahat, Amasai aput nen yol, Azaria aput. It Merari mene inebe re Kish, Abdi aput nen Azari, Yehalelel aput. It Gerson mene inebe re Yoah, Zima aput nen Eden Yoah aput. ¹³ It Elisafat mene inebe re Simri nen Yeiel. It Asaf mene inebe re Zakharia nen Matanya. ¹⁴ It Heman mene inebe re Yehiel nen Simei. Nen it Yedutun mene inebe re Semaya nen Uziel. ¹⁵ Anogoba apuni Lewi ati inayalak it mene atogorinabukwasik inebe inokawerek en tegelogo hagasukwa. It en inoe etage werek en yogosasike mene hutisukwasik Ninopase Etage pogot awi wurikmo waukwasik en Ninopase Etage pogot ane palek higit hogo soalukwa. ¹⁶ Walowak esewerek mene hugi inebe Ninopase Etage pogot awi wurik higit hogo kisukwasik eloken soalukwa. It en ake weak aike mene obogat wulaksasukwasik wolok Ninopase Etage pogot awi wurikmo soulam hisukwasik wolok o Kidron erangma wolok laukwa. ¹⁷ Ineki ato kigilek welaukwasik atiba nen tugi janoari oba holokogo, apuni Lewi mene nen Ninopase Etage pogot awi wurikmo eloken soalikisukwa nen ineki ake 8 huli atiba it en Ninopase Etage pogot awi wurikmo eloken soalukwa nen it en ineki ake 16 huliba hagalaikomo arat hagalaike, tugi janoari oba. ¹⁸ Anogoba it en inoe kain etage werek Hizkia oba kisukwasik en mel yogotukwa : ''Nit en Ninopase etage pogot wai wurikmo obogat arat eloken soalo nen wulikin halek warogo loleto nen Ninopase Etage pogot awi wurikmo obogat welagarek mene arat eloken soalo, e talek'ma okawerek hesik supuruk Roti werago hegarek oba nen henakit obgat halogo hogo. ¹⁹ Yimene timene obogat welagarek mene inoe kain etage werek Ahas en wugutigik lakesike, ineki ake saat at aweama hagasek werekma yoma logousak lek iluk wulapike mene, nit en arat soalogo nen hobuk ake halusak hagalaga halok halelogogun. Yogotak ya obogat he Ninopase Etage pogot awulikin halek oba elokoma werek.'' ²⁰ Ineki ake oba ohealegat hup siak hogo Hizkia nen ap ukuloak hugi o sili ke mene inebe atogorinapikesik wogosek Ninopase Etage pogot awi wurikmo wogosek laike. ²¹ It en wam lembu kulok 7 nen wanukwa, wam domba kulok 7 nen ket mene wanukwa, wam kambing kulok 7 nen mene warogo inebe ianele hurek welaikarek oba weak halukwa mene legetsoagaluk halukwa ati, ala tegelek hano mene hesik nen apuni Yehuda mene hesik halukwa. Inoe kain etage werek Hizkia nen ap Walowak esewerek Harun nen tagomake mene nen okawerek hesik hisukwa mene obogat yi Ninopase Eatge pogot awulikin halek opoloake hisukwa. ²² Ap Walowak Esewerek mene nen wam Lembu ati warogo amep keralogo wanukwasik en wulikin halek opolobake pelawik laukwa. Anogoba it en wam domba kulok mene warogo nen amep wilik wulikin halek opoloake kesalukwa. Atiba arat halukwasik it en wam domba okat ket mene hugi warogo amep keralogo nen wulikin halek opoloake kesalukwa. ²³ Anogoba nen ap Walowak esewerek mene ati nen wam kambing kulok mene warogo inoe kain etage werek nen ageinapuri ineilanem weak halukwa mene legetsoak en iluk lolukwa. Ap Walowak esewerek mene ati nen ineki wam kambing opoloba hisukwasik etu loletukwa, ²⁴ Nen wam warogo, okawerek hesik amep keralogo wulikin halek opoloba kesalukwa ati weak halukwa mene legetsik nen apuni Israel mene inom liolusak hesik halukwa. At inoe kain etage werek en igilogolik wam wato aroma apuni Israel mene inebe obogat en weak halo mene hesik terogo legetike. ²⁵ At inoe kain etage werek Hizkia nen apuni Lewi mene Ninopase Etage pogot awi wurikmo pikon Ceracap, gambus, nen Kecapi oba, Gad nen Pelihat inoe kain etage werek ake nen wene yogosikerek mene Natan, Daud en halelouagaluk yogosasike. Yinogo halelogeino iluk Ninopase Etage pogot en wene yogosagarek mene inoba hisikomo it en yogosigilaukwa. ²⁶ Apuni Lewi mene melarik Daud apikon ane wasusak oba welaukwa, nen wene yogosagarek mene nen pikon Trompet anetasak oba metek welaukwa. ²⁷ Anogoba re Hizkia nen okawerek hesik warogo wulikin halek oba etu lolesusak iluk yogosasike. anogoba nen okawerek hesik warogo etu lolesusak oba halelogolik Ninopase Etage pogot hororasusak oba halukwa. Pikon Trompet anetigik nan pikon wasusak mene hetekit inoe kain etage werek Dadud Israel mene apikon anetasukwa. ²⁸ Ageinapuri inebe obogat etai oba hogoratik nen pikon Trompet oba watik isukwa. Atoma obogat halokolek okawerek hesik warogo etu loletukwa mene arat nasikesik al hagalaike. ²⁹ Okawere hesik arat warogo loletukwasik, inoe kain etage pogot Hizkia nen obogat inebe omakima inebe sebek hogo nen hogoratukwa. ³⁰ Inoe kain etage pogot Hizkia nen apuni Lewi mene yabu hukotek welaikarek mene nen Ninopase Etage pogot hesik etai Daud nen Asaf, pelihat ati nen watukwa mene igilogolik hogoratukwa ati. It en Ninopase Walowak a'etai watik nen inala hai aleken agik igilogolik inecep awi yagasogo sebek ilik Ninopase Walowak hogoratukwa. ³¹ At Hizkia nen igilogolik, "Yogotak he arat hit hinebe mene Ninopase Etage pogot wogoni. Hinebe horokogo ya wagik nen Ninopase Etage pogot hesik waretik nen hano hanisek welaga hesik waretep mene wolok weni.'' Nen, it en wareta mene nen etai oba wareta mene nen it apuni ake inebe lopok en inala akaluk warogo lolesusak iluk wolok waukwa. ³² Warogo etu lolesusak hesik Ninopase Etage pogot ageinapuri nen obogat wolok waukwa ebe re yi: wam lembu 70 huliba, wam domba kulok mene hugi 100 huliba,wam domba okat ket mene hugi 200 huliba, obogat he Ninopase Etage pogot hesik warogo etu loletukwa. ³³ Okawerek hesik tegelek hano mene wam lembu wam sapi 600 huliba mel, wam kambing wam domba 3.000 huliba nen hisukwa. ³⁴ Atinogo mene at he, Walowak esewerek warogo ogat nokolusak oba nen okawerek hesik wasugun mene ati palusak oba inebe hamulugat, atiba nen apuni it mene mel, apuni Lewi mene mel, leberisienem yabu ati arat halogo hilik ap Walowak esewerek mene inebe tegelek hano halogo hilik welaukwa. Apuni Lewi mene nen eberogoat mene inebe tegelek hano halogo hagigilaukwa mene re ap Walowak esewerek ati nak he anogo hausak oba we lek negen welaike. ³⁵ Warogo etu lolesusak mene ake nen amok palek hesik mel telinabusak hesik warogo lolesusak mel, amusu opoloake kesalusak mene hesik warogo lolesusak mene ati. Anogo nen hobuk lagakogo Ninopase Etage pogot awi wurikmo hogoratelogousak. ³⁶ Yimene timene Nonopase Walowak en at ageinapuri hesik weke logo higit hagat hogo wogosasikomo Hizkia nen apuni nebe obogat en inala hai aleken aike. Ineki ake welaike arem nogoat obogat hagalaike ati nen it inala hai apik aike! ''iluk isukwa.