(At Ahas Ebe Inoe Kain Etage Werek Hagalaike Wene) (2 Raj 16: 1-20) ¹ At Ahas ebe eki talaike huli nen wam mauge 20 huli kopokogo at ebe inoe kain etage werek menhisukwa. At en o Yerusalem eki wam mauge 16 huli kopokogo warogo aweama hagasek welaike. At he ebe re opalah alep mene 'Daud eberak higit hogo lek, ati re at en Ninopase Etage pogot ei'lanem wene eberogoat mene ake halilek, ² At Ahas ebe elik logolik he inougi kaintek inetage werek Israel mene halelaukwa hake ake halilek weak mene nak halik lagalaike. At en keangma mene apuni-apuni inekiba auak halogo hilik hagoratarek mene etage Baal ati mene halologo lakekilaukwa. ³ At Ahas en obasi hano mene dupa oba at aput mene okawerek hesik o toke erangma Ben-Hinom atoma nen warogo etu lolitike. At en apuni Ninopase Etage pogot weak halenem apuni Israel mene inoba nen mugusogo wulaksigilake mene atoma inom higit arat halelaike. ⁴ At Ahas en okawerek hesik wogotilaike nen dupa bunuh oba, o bunuh obake nen e eka apik werekma warogo etu loletelaike. ⁵ At en atinogo halike ati nen, Ninopase Etage pogot Walowak en inoe kain etage werek Aram mene nen inoasuagalauk herakesike ati. Inoe kain etage werek agoresa inom en Ahas wasuagalauk halike nen apuni inebe apigat ineki hele warogo wogosek o sili Damsyik laukwa. It hetakit he'inoe kain etage werek Israel mene arat ekiba hisasikomo arat inebe hukoat ati re Israel mene inougi kaintek inetage werek mene inoatukwa. ⁶ At Pekah aput, Ramalya, inoe kain etage werek Israel mene nen Ahas watike. At Pekah agoromi weim mene inom inoatukwa re inebe 120.000 huli ap weim inanini weak mene hugi o Yehuda mene ineki ake like omaket oba inoatukwa. At Pekah nen apuni Yehuda mene inoatike ati re it en Ninopase Etage pogot, Walowak it inopalek mene heraksasukwa atiba nen inebe motok inoatukwa. ⁷ At Zikhiri, ebe wein anini weak aua o Efraim mene nen Maaseya, inoe kain etage werek Ahas aput watike. At en hogo re Azrikam nen Elkana inougi kaintek inetage werek welaikarek oba ukuloak welaukwa mene inoatike, it inebe re inopolike it inoe kain etage werek aweama hagasek welaike atem oba higit welaukwa. ⁸ Ap inasike werek Israel mene nen apuni it mene o Yehuda welaukwa mene inebe 200.000 huliba nen ineki hele warogo wogosek laukwa inebe re! hemi, hekerugi, nen it en he yimene timene oko huko mene o sili Samaria welaike mene inekiabusak en malaukwa. ⁹ Atinogo mene at he at ap ake wene Ninopase Etage pogot ane yogosikerek mene etage Obed o atoma welaike mene nen ap esa Israel mene o Samaria nen laukwa hak inom apiaukwasik at en it mel yogosasike, ''Ninopase Etage pogot,Walowak hit hinopalak mene nen arat eki kopologo herakhinapomo apuni Yehuda mene inoatep ati nen at en it wene hokoat wenagasasike. Atinogo mene at he hit en it inoatep atiba wene palike mene ane pikit pogot oba lagesike. ¹⁰ Yogotak hit en hinala agigilogolik he apuni Yehuda mene nen Yerusalem mene ap lek hemi lek hinatitigeke halogo hisogon. ¹¹ Atinogo mene at he hit hinokawerek en hogo re Ninopase Etage pogot Walowak ei'lanem weak hagatep.'' ¹² Anogo nen ap ukuloak Efraim mene ake inebe re Azarya, Yohanan aput, Berekhaya Mesilemot aput, Yehizkia Salum aput nen Amasa Hadlai aput, melaukwasik ap inasike werek Israel mene weim yapelaukwasik laganem ineileken hisasukwa, ¹³ Nen it en igilogolik, ''Apuni Yehuda mene ineki hele warogo wogosek yoma wagup, hit en ake wogosek wagep halok he, wena ati nit en Ninopase Etage pogot eilanem weak halumo nen weak halugun mene ati hukoat hagalasinogo. Nit weak motok huko mene hagalasusak, nen Ninopase Etage pogot en apuni Israel mene inoba wenagasanogo!'' ¹⁴ Nen apuni sike hisogo mene ati nen ineki hele warek wogosek waukwa mene nen yimene timene oko huko at mene nen it apuni ati inebe inomat it mene ukuloak wogotukwa ati. ¹⁵ Arat atiba nen he Azarya, Berekhya, Yehizkia, nen Amasa melaukwasik apuni ineki hele warek mene leberisasukwa ati. Apuni Inebe ekaminogo ati nen inasu nokolek wanukwasik ake su nokolek waukwa mene wogosasukwa. Ap ukuloak mene su inoga lawerek wogosasukwa, inesok agot labetarek mene, supuruk, i hinago, it en amusu keralek inenenake watik nen inomo lek asuagaluk wogosasukwa. Anogoba nen he ap ukuloak Efraim mene nen ineki hele warek inoane lek aike mene wam Keledai opoloba liaksasukwasik it inebe wogosek o Yerikho sili e palem yago oba wogosek laukwa, atiba nen ap ukuloak inebe ekaminogo ati o Samaria laukwa. ¹⁶ Ineki ake apine, inoe kain etage werek Ahas en ap ake inoe kain etage werek Asyur mene oba ake lebetoagaluk yoko lakesike, ¹⁷ Nen apuni o Edom mene nen inapotke weim wagalogolik apuni Yehuda mene inomame lek halogo hisasukwasik apuni inepe haksilik laukwa mene ineki hele warogo hisasukwa. ¹⁸ Apuni Filistin mene ho nen o sili tom amake o Negeb, Yehuda ke mene o mugusasukwa. Apuni Filistin mene nen o sili Bet-Semes, Ayalon, Gederot, Sokho, Timna, nen Gimzo sebelukwa. It en ho re o sili atoma eraluke magatek mene sebelukwasik o atoma welaukwa. ¹⁹ Ninopase Etage pogot en ukum Yehuda mene wogosasike ati, inoe kain etage werek Ahas oabut oba nen Yehuda mene weak halukwa. At ebe Ninopase Etage pogot hogorasusak he abit welaike. ²⁰ At Tiglat-Pileser, Asyur mene inoe kain etage werek waike re leberisagalok hama nen he ukum inoba higeluk waike. ²¹ At Ahas en yimene timene oko huko mene o Ninopase Etage pogot awi wurikmo welaike mene mel, o ap inougi kaintek inetage werek welaikareke mene mel, nen o ap yabu hukotek halerek mene inauake mene mel, nen wanikesik he inoe kain etage werek Asyur mene wogotike, atinogo mene at he atiba ake lebetigilek. ²² Ineki ake atem oba re we horogat agakolek, Ahas en weak at hagatelogolik nen Ninopase Etage pogot oba hogorasusak he legat hagalaike. ²³ At en okawerek hesik apuni inukul etage Damsyik mene hogoratarek oba okawerek hesik wogotike mene atarat mawen halogo hisukwa. Nen, at okawerek en okawerek at mel isike, ''Apuni Aram mene hogoratarek mene nen it leberisike. Nen, okawerek hesik an nen at wogosumo it en an lebenoak'at.'' Atiba nen it apuni Israel mene weak halukwa. ²⁴ At Ahas en Ninopase Walowak awi wurikmo welagarek mene atogorogo nen halok palok hogo lakesike. Anogoba at en kwe ape Ninopase Etage pogot aua mene nen wulukin o Yerusalek kwe laikarek oba esakoke halek mene kwe yagarogo hisike. ²⁵ O sili lopok Yehuda atoma, Ahas en tugi hareken ako warogo etu loletelogousak hesik oguluk halik laike. Anogoba at Ahas en, Ninopase Etage pogot, Walowak inopalak mene wene palike. ²⁶ At Ahas en obogat halike mene, alebat en pikit hobuk awurep oba, suesika oba holal palek werek. ²⁷ At Ahas ebe walaikomo nen opalak salinabukwa oba omakima salukwa. Apuni nen o sili Yerusalem salukwa, atinogo mene at he it en inougi kaintek inetage werek Israel mene salinaparek oba omakima salilek. Hizkia, Ahas aput ebe inoe kain etage werek opase ugulukmo menisukwa.'' iluk isukwa.