¹ Yotam ebe talaike wam mauge 25 huli warogo nen at ebe inoe kain etage pogot men'hisukwa. At en o Yerusalem hagasek werekolek eki wam mauge 16 huliba warogo hagasek welaike. Agosa etage re Yerusa,Zadok aput. ² At Yotam en Ninopase ei'lanem wena hano nak halelaike. At en Ninopase Walowak Ane hogo Uzia, opase, halelaike hagat eperak higit hogo halelaike,atinogo mene at he at Yotam ebe Ninopase Etage pogot awi tegelek hano wurikmo obasi hano mene dupa etu lolesusak hesik opase halelaike hake'halelaike lek, nen apuni ati mene nen weak at hagatilaukwa. ³ At Yotam en Ninopase Etage pogot awi wurikmo kwe ape abel poke mene halike. At en Ofel leget apigat mene wutike. ⁴ At nen o sili Yehuda tom ugul obake wutik, nen ake huli tigik higik nen kayo ekake menigik hilik waike. ⁵ At Yotam en hogo re inoe kain etage pogot Amon mene inom weim halelogolik it inebe motok inoatike, Atiba nen wam mauge ebe lopok warogo apuni Amon mene nen Yotam oko eka 100 perak mene mel, 10.000 kor gandum eken mel, nen 10.000 jelai amusu keralek eki wam mauge 3 huliba warogo nen wogotukwa. ⁶ At Yotam aligat en aweama hagasek welaike ati at oabut hano nen Ninopase Etage pogot, Walowak ane hologo halelaike. ⁷ At Yotam en wene hunogoat mene hagarik lagalaike mene nen weim halelaike mene obogat suesika oba a'la holal palek werek. ⁸ At Yotam ebe talaike wam mauge 25 huliba warogo at ebe inoe kain etage pogot melhisukwa. At en wammauge 16 huliba warogo o Yerusalem aweama hagasek welaike. ⁹ Anogo nen at Yotam ebe walaikomo opalak salinabukwa oba omakima o Daud awi silimo salukwa, 'iluk isukwa.