(At Uzia Ebe Inoe Kain Etage Werek Menhisukwa Wene) (2 Raj 15: 1-7) ¹ Atiba apuni Yehuda mene nen Uzia ebe re wam mauge 16 huliba warogo nen inoe kain etage pogot opase Amazia ugulukmo men'hisukwa. ² At Amzia ebe arat walaikomo nen ebe warek opalak salinabukwa oba omakima salukwa. Uzia nen o sili Elot hobuk wutikesik en Yehuda mene inokawerek wogosasike. ³ At Uzia ebe talaike wam mauge ineki 16 huliba warogo nen at ebe inoe kain etage pogot hagalaike nen at en o Yerusalem eki wam mauge 52 huli warogo aweama hagasek welaike. Agosa etage re Yekholya aua o Yerusalem mene. ⁴ Ninopase Etage pogot ei'lanem Uzia nen wene eberogoat mene halelaike, ati re at opase, Amazia halelaike eperak higit hogo halelaike. ⁵ At Uzia nen Ninopase Etage pogot ane hologo halelaike ati re Zakharia ebe eluk werekma. At Zakharia nen Ninopase Walowak hogoratik nen ane hologo halik igilogousak iluk yakulisigilaike. At Uzia Ninopase Etage pogot, Walowak ane hologo halelaike atem sat, Ninopase Walowak en lebetikokolek hano nak hagalarik lagalaike. ⁶ At Uzia nen Filistin mene inom weim haligeluk homisek inoba laike. At en leget wurik Gat, Yabne, nen Asdod, oba leget lakulogo lakesike. At Uzia nen o sili horogat o sili Asdod nen o apuni ato welaikareke o Filistin atoma wutike. ⁷ Ninopase Walowak en Uzia apuni Filistin mene inom weim halik, apuni Arab mene o sili Gur-Baal, nen apuni Meunim mene inom weim halik uagaluk lebetasike. ⁸ Apuni Amon mene nen Uzia oko wogotukwa. Etage apuni nen obogat ilu motok pikit o Mesir huli welaike. At ebe inelu welaike ati re o atoma at etage esin poksek o atoma at ekiba hagasek welaike. ⁹ At Uzia nen kayo o Yerusalem telik laike, kwe ape palek opoloa esakoma telik, kwe ape palek oba abpel poke Lebak oba telik, nen telik oba, ake eki alip halogo hisike. ¹⁰ At en kayo o leimo apuni lekma halike. At ako apigat ati nen At en i poke hetak'seke hawulik tokwe erang kwe hawulik isike. At en apuni yabu wanusak oba halogo hisigik nen e anggur eken abi yago ke jage logousak hesik halogo hisigik nen bunu obakwe nen keang ake mulimo at yabu halusak elok welaike ati nen halogo hisilik laike. ¹¹ At Uzia mene ap weim halarek awerugi sikik sekek hogo inelu aike mene we weim arat halusak oba welaukwa. It inebe re ap esa obogat suesika wanuke Yeiel en halal halogo hisike, nen Maaseya at ayubu haluke mene, ebe ati re Hananya ukuloak weim mene inoe kain etage pogot aweama welaukwa. ¹² Apuni inebe 2.600 huli nen ukuloak ap esa elok mene hugi welaukwa. ¹³ Ukuloak it mene hasik halelaukwa re 307.500 huli ap esa weim arat halusak oba inebe motok apigat hagalaike. Ap esa yi re inoe kain etage pogot inaselei mene wasuogoluk waganem lebetasak oba welaukwa. ¹⁴ At Uzia nen agoromi weim mene sin ugu inogot oba lapetik, sige inekim wanik, su inogat laberek itik, sike wanik, nen elep eken alep agik lagugun mene wanik isukwa. ¹⁵ Uzia nen o Yerusalem atoma apuni ake inala kagalek mene nen weim halelogousak mene hesik haluke halukwa mene ati wolok kayo telik ugut hetake-hetake hikenem sike tok nen helop huko tek lakuguke halogo hisukwa. Apuni nen Uzia ebe inelu motok welaike nen apuni wake mene nen Etage inelu. At ebe inoe kain etage werek hagalaikomo apuni nen apigat lebetigilaukwa nen oane apigat hagalaikesik welaike. ¹⁶ At Uzia ebe umame hagalaike, at okawerek en hogonauak halogo wene ake hunogo mene halelogolik Ninopase Etage pogot, Walowak ane hologo halilek hebisike, at ebe Ninopase Etage pogot awi wurikmo laikesik en dupa obasi hano mene wulikin habulik oba etu loligeluk halike. ¹⁷ Atinogo mene at he Ninopase Walowak Esewerek Azarya nen inebe ato 80 huliba inayuk lek elok mene hugi Ninopase Etage pogot hesik yabu halarek mene ake Uzia opolik Ninopase Etage pogot awi wurikmo a'la kisukwa, ¹⁸ Atiba it en "Hae, Uzia dupa obasi hano mene Ninopase Etage pogot hesik etu loletuke hat nogo. Iluk wenagatukwa. Ati mene etu lolesusak he Ninopase walowak Esawerek mene nen Harun en tagomake mene nen dupa obasi hano mene Ninopase Etage pogot hesik etu lolesusak. Uguluk tegelek hanoma yi oba nen wulibilan, nen hat he arat ane hologo halusak lek hagalaga. Wene yi halen oba nen Ninopase Etage pogot Walowak en hat augutausak oba lek hagalaga.'' ¹⁹ Ineki ake atiba at Uzia nen obasi hano mene dupa oba werasigeluk mangkuk ekim wanike hak he' wene huko at palike. At en Ninopase Walowak esewerek mene inoba wene apigat palike, atiba nen u henako isa ei'laken oba aike. Wene ati hagalaike re Ninopase Etage pogot awi wurikmo o wulikin oguluk halekma dupa obasi hano mene weratarek oba nen hagalaike. ²⁰ At Azarya, ebe Ninopase Walowak esewere mene hesik uguloak werekma, nen ap Ninopase Walowak esewerek inebe obogat en ineloke Uzia oba ine'ileken lakasukwa. It en u henako isa ei'laken oba werekma lakasukwa. Ap Ninopase Walowak esewerek mene ati nen Ninopase Etage pogot awi wurikmo nen mukogo wulaksasukwa. At Uzia aligat he Ninopase Etage pogot en ukum oba hisike ati nen mukogo wulakesukwa. ²¹ At inoe kain etage pogot Uzia ebe u henako isa oba aike mene lek agilek motok werekolek ebe walaike. At ebe o Ninopase Etage pogot awi wurikmo ake kusak lek iluk o ake alekma kekhogo hisukwama welaike. At aput Yotam en ukuloak inougi kain tek inetage pogot welaikarek oba nen o atoma apuni hagasek welaike ati. ²² At Uzia nen wene ake hunogoat mene alep at en pikit elugun oba kopokogo halik waike mene, wene yogo sikerek mene at Yesaya, Amos aput en holal palogo hesike. ²³ At Uzia ebe arat walaikomo ap inetege pogot salinaparek oba eneralu salukwa ati it apuni ake nen he, "Uzia ebe u henako isa oba agama isukwa.'' Ati nen he at Yotam Uzia aput ugulukmo inoe kain etage werek ket menisukwa. ''iluk isukwa.