At Amazia Ebe Inoe Kain Etage Werek Menhisukwa Wene ( Raj 14: 1-22) ¹ At Amazia ebe eki wam mauge 25 warogo nen inoe kain etage werek hagalaike. At en eki wam mauge 29 huli warogo o Yerusalem aweama hagasek welaike. Agosa re etage Yoada aua o Yerusalem. ² At Amazia nen Ninopase Etage pogot eilanem wene eberogoat enak hagatelaike, atinogo mene re we etauken oba nen halelaike motok lek. ³ At Amazia ebe inoe kain etage werek ya metek hagalaike. Atiba nen he opase ayabu halelogolik ebe watukwa mene at en inebe motok inoarik laike. ⁴ Amazia nen Musa ane isike mene holal palek welaike mene higit hogo nen ayabu halelaukwa mene inageinapuri ake inoatilek ati. Ninopase Etage pogot ane isike mene oba re, ''Ageinapuri nen weak halugun mene ineki elugun oba opase walasusak lek. Nen opase nen weak haligin mene eki elugun oba ageinapuri walasusak lek. Apuni inebe lopok en weak halugun mene ineki oko inokawerek at walasugun.'' ⁵ At Amazia nen apuni Yehuda mene natogorogo hisasike. Atiba at en apuni inebe obogat Yehuda mene nen Benyamin mene inebe welaikarek higit hogo ukuloak 1000 nen ap 100 en halogo hisilik laike. Amazia nen it inebe eki talaukwa mene wam mauge 20 huli warogo nen abel poke mene apuni inebe 300.000 huli oba nen yihagasusak ti hagasusak inala kagausek weim sige wilik sin ugu igilik weim elok yabusak mene hugi eki wenagainapike. ⁶ At Amazia nen Israel mene inebe weim halusak elok hugi 100.000 huliba nen ineki oko eka 100 perak hisikesik wogoinapike. ⁷ Ninopase Walowak aput ake Amazia oba waike. Wene yogosikerek mene ati nen igilogolik, ''Ninoek kain hetage werek, ap ake Israel weim mene hat hinom lasak'lek nen Ninopase Etage pogot en it Efraim en tagomake mene inebe obogat hanorinabilogo'lek. ⁸ Hat hesik he arat elok nomame werek agegen nen weim haligin, elok hala mea agegen mene re, Nonopase Walowak omame oba leberisigik nen weak halogo hisigik usak ana ri!'' ⁹ At Amazia nen Walowak aput ati yogotilogolik, "An nen eka ap Israel weim mene wogosigirik'mo ati nikinogo halusak?'' Walowak aput ati nen wene oko igilogolik, ''Ninopase Etage pogot mene agarok apik ati nen hat wokosegen mene ake inomat hokorogo wokosuak.'' ¹⁰ At Amazia nen ap esa Efraim mene inom omaket holukwa mene inalik'mo tetelogo hisasike. Anogo halikomo ap esa yi nen inoe kain etage werek oba wenagatik nen apuni Yehuda mene wenagasigik isukwasik, it inaua wene palik laukwa. ¹¹ Atiba at Amazia nen weim halusak mene hugi inebe obogat halogo nen ap esa holok wogosek o toke erang Asin weim awi halukwa. O atoma apuni inaua Seir mene ap weim mene inebe 10.000 huliba nen inoatukwa. ¹² It en hogo apuni inebe 10.000 huliba nen inelukeke kenogotigik haksasukwasik it en wogosek tom helepobake wogosek laukwa, nen it inebe ati helep en yeleken tagalogo inoasuagaluk wugutigik helep uang wereke laksasukwa. ¹³ Ineki ake like halukwa eberak higit hogo, ap esa Efrahim mene Amazia nen weim halusak lek iluk laksasike mene inom en, o sili Yehuda mene inoasikisukwa. It en o Samari huli nen inoarik motok o Bet-Horon laukwa nen apuni Inebe 3.000 huli nen o atoma welaukwa mene nen inagarok nekiabusak en apigat wanukwa. ¹⁴ At Amazia apuni edom mene arat inoatikesik at aua laike. At en tugi hareken apuni Seir mene hogoratelaukwa mene wolok waikesik he o Yehuda hisike. At nen tugi harek ineki nen auak hagarek mene ati hogoratelogolik nen oasi hano mene at hesik loletelaike. ¹⁵ Ninopase Etage pogot en Amazia hesik wene palike, atiba nen wene yogosikerek mene at oba lakeiwaike. Wene yogosikerek mene ati nen at yogotilogolik, ''Amazia, tugi hareken oba nen apuni hat mene ake hat hoba nen teinapelek meneat he nenahalok hat en Tugi hareken anema wanelagen.'' ¹⁶ Wene yogosikerek mene ati nen aneba igilogolik, Amazia nen at yogotike, ''Ninoe kain etage werek asuk watelogouagaluk nit en hat ake hoguluk halogo haigilek. Hane ikehuk, an nen hat hebe hoasigin.'' Wene yogosikerek mene anogo ane igilek kamoisike, atinogo mene at he hobuk ake igilogolik, "Hat en wene yi haletik an nen hasuk wati mene holilek atiba Ninopase Walowak en hat arat hoasigin iluk ike.'' ¹⁷ At Amazia, ebe inoe kain etage werek Yehuda mene nen inasuk watuke oba yogotike. Anogoba at en Yoas oba wene warogo hisike, Yoahas aput, Yoahas Yehu aput, inoe kain etage werek Israel mene. Amazia nen Yoas yogotelogolik, "Neperak apiasuok isike.'' ¹⁸ Anogo nen Yoas, inoe kain etage werek Israel mene ap ake Amazia, inoe kain etage werek Yehuda mene oba wene warogo higilogolik; "Alok werek o Lebanon mene nen wene warogo e aras o Lebanon mene oba igilogolik: 'Halogo ari an naput age asuak en wonom isike.' Mene re wam maro mene ake e alok awi yako ke lagaike ati nen esok en lilibi warogo hilik laike. ¹⁹ Hat hala ebetelagen he hat en apuni Edom mene arat inoati iluk agigilagen nen ati nen hat hala hai nen ebe eligik halelagen, mene at he hat hebe haua motok welagen. Hat en ukum hunigat mene ake wanusak lek. Hat en an nane watiluk halen halok, hat nen Yehuda mene motok inoasigin.'' ²⁰ Nen, Amazia asuk holilek. Ninopase Walowak en yi mene hagalasuak iluk at en it waganogo inekiba huak, nen apuni Yehuda mene tugi hareken apuni Edom mene halarek mene inoabut waganogo hagarik lagalaukwa. ²¹ Nen, Yoas, Israel mene inoe ain etage werek Amazia,Yehuda mene inoe kain etage werek o sili Bet-Semes o Yehuda eperak apiaukwa. ²² Israel mene nen Yehuda mene inoatukwa'ma it hese o lese wurik ke lopok wolakasukwa. ²³ O Bet-Semes, Yoas, Israel mene inoe kain etage werek en Amzia, Yehuda mene inoe kain etage werek Yoas aput, Yoas Yoahas aput hakesike. Yoas en Amazia wolok o Yerusalem laike nen Leget Yerusalek leget wurik mene kwe ape palek Efraim en motok pikit kwe ape palek esakoma mesalogo hisike, uan wurik agit he 400 huliba. ²⁴ Emas, eka perak, nen yimene timene ato obogat o Ninopase Walowak awi wurik'mo welaike mene atoma Obed-Edom en ekiba aike, obogat wanikesik nen ake noe kain etage werek agarok yimane timana welaike oba mene wanike. Atiba at en apuni inebe miren hake ake ineki hele warogo wogosek nen o Samaria laike. ²⁵ At Amazia, Yoas aput, Yehuda mene inoe kain etage werek eki wam mauge 15 huli warogo welaikesik en arat Yoas, Yoahas aput, inoe kain etage werek Israel mene ebe walaike. ²⁶ Wene ake hunogoat mene Amazia nen halelaike mene, alebat en pikit awurek oba holal palogo hisukwa. ²⁷ At Amazia nen Ninopase Etage pogot ane hililek kamoisike, apuni Yerusalem mene nen wasugun iluk awok palokolek he at hese o sili Lakhis laike. Mene at he it en apuni inebe miren hake o sili Lakhis laksasukwa nen Amazia ebe o atoma nen watukwa. ²⁸ Atiba it en ebe warek wam kuda opoloa liakelik wolok waikwasik en opalak inom omakima o sili Yehuda kweang'ma salukwa, 'iluk isukwa.