(At Yoas Ebe Inoe Kain Etage Werek Menhisukwa Wene) ( 2 Raj 12: 1-21) ¹ At Yoas ebe mwam mauge 7 tahun huli warogo nen inoe kain etage werek halogo hisukwa nen at en eki wam mauge 40 tahun huli warogo aweama hagasek welaike. Agosa etage Zibya aua o sili Beryeba mene. ² At Yoas en Ninopase Etage pogot eilanem Walowak esewerek Yoyada ebe eluk welaike atem huli wene hano nak hagatelaike. ³ At Yoyada nen Yoas hesik augi inebe pire nen wogotike, nen it hemi atem en Yoas ageinapuri elege tageinabik nen hemi tageinabik laukwa. ⁴ Anogoba Yoas en Ninopase Etage pogot awi wurik weak aike mene hanorasigin iluk a'la ebetike. ⁵ At Yoas en ap Walowak esewerek mene nen apuni Lewi mene wasasike. At en it yogosigilogolik, ''O sili Yehuda nen ake etake lani nen lilik apuni Israel mene wereke atoma obogat eka atogono. Eka atiba hopase Walowak awi wurik a'lake weak aga mene wam mauge ebe lopok lagakolek wusugun.'' Mene re, apuni Lewi mene nen atiba haluem at he halilek. ⁶ At Yoas en ap ukuloak Walowak esewerek Yoyada watike nen at en yogotilogolik, ''Yoyada, hat en apuni lewi mene yogoselen ma apuni Yehuda mene nen Yerusalem mene inebe lopok en oko hikenem atogosusak mene yogosegen lek ati nahalok? Musa Ninopase Etage Pogot aput nen apuni Israel mene nen eka inebe lopok oko hegarek mene oba o Lese wene warisasike mene hesik halelaike.'' ⁷ Alebat, he Atalya eagi, he oabut weak ati nen, Ninopase Walowak awi wurik arat mesalogo laksasikesik en yimene yimene tegelek hano mene Ninopase Etage pogot awi wurikmo welaike mene it en walowak keangma mene hogoratelaukwa. ⁸ Inoe kain etage werek Yoas en huong ape halogo halilik nen Ninopase Etage pogot awi wurikmo leget apel etake husak iluk isike. ⁹ Anogoba apuni Lewi mene nen o Yehuda nen Yerusalem welaikarek mene it Nonopase Etage pogot hesik oko wogotilogosak iluk inelurogo yogosilik laukwa. Oko wogotelogousak iluk he a Musa, Ninopase Walowak atitigeke apuni Israel mene it o leimo apuni lekma logolik hikilogouak isike. ¹⁰ Ukuloak obogat nen apuni inebe obogat inala hai agasukwa. It en oko husak oba wolok huong ape palekma hetokogo hisukwa. ¹¹ Atiba apuni Lewi mene nen huong esalip halek mene ati ap yabu ake hanoma inoe etage werek werekma halarek mene inoba wolok waukwama ineileken hasukwa hak he a'la eka motok apik mene kalek welaike nen inoe kain etage werek eki omoke holal suesika oba haerek mene nen ukuloak ayubu huko mene Walowak esewerek waikesik he eka ati ebe heselogo wulaiwaike. Anogoba it en ineki ebe lopok halik nen eka apigat en natogotukwa. ¹² Anogo nen inoe kain etage werek Yoas nen Yoyada eperak eka ati it yabu Ninopase Etage pogot awi wurikmo halelaukwa mene wogosigilaukwa. It en yabu halusak hesik inebe hobuk ake herageinabukwa nen e mene oba Ninopase Etage pogot awi wurikmo weak hagalaike mene hobuk haluagaluk inayogo hisukwa. it en hogo re yabu posie maken oba halarek mene nen tembaga mene halarek mene ninopase Etage pogot awi wurikmo haluagaluk ineki oko hisukwa. ¹³ Ap yabu halarek mene ati nen yabu hano halukwa ati nen weak aike mene it ineki nen hanoratukwa. It en o Ninopase Walowak awi ati alep wurik welaike hake at wutukwa nen oane werek yagasogo halukwa. ¹⁴ Yabu ati arat halukwasik, it en eka titelaike mene ati inoe kain etage werek Yoas nen Yoyada inoba oba wolok laukwa. It nen eka amonogo yimene timene Ninopase awi wurikmo logousak mene hesik halogo hisukwa. Yimene timene ati ninopase awi wurikmo yabu halelogousak mene hesik nen okawerek hesik warogo loletelogousak oba halukwa. It en hogo re i keraluke nen ake hunogoat mene emas nen perak halukwa. Walowak Esawere mene nen okawerek hesik warogo Ninopase Etage pogot awi wurikmo ineki ebe lopok Yoyada eluk werekma warogo loletelaukwa. ¹⁵ At Yoyada ebe arat yaman aike, nen wam mauge 130 tahun huli warogo ebe walaike. ¹⁶ It en Yoyada ebe o Daud awi silimo inougi kaintek walaganem keangma salinaparek oba salukwa. It en Yoyada o atoma salukwa ati re at en apuni Israel mene Ninopase Walowak hesik nen Okawere awi wurikmo wene hano nak halelaike. ¹⁷ Yoyada ebe arat walaikomo, ap ukuloak hugi Yehuda mene nen inoe kain etage werek Yoas oba waukwasik hogoratukwa. Atiba inoe kain etage werek en it inane holike. ¹⁸ Inoe kain etage werek nen ap ukuloak ati nen Ninopase Etage pogot, Walowak it inopalak hogoratarek mene awi wurik herakesukwa. It en Apuni-apuni e mene ineki nen auak halek Asyera ebe hake mene hogorati'laukwa. Ninopase Walowak en apuni Yehuda mene nen Yerusalem mene inoe kain etage werek nen ap ukuloak hugi ati nen weak halukwa oba ukum inoba hisike. ¹⁹ It inapoke Ninopase Etage pogot oba lasak iluk Ninopase Walowak en ap wene yogosagarek mene it inoba laksawaike, atinogo mene at he it inasuk holusak inabit hagalaike. ²⁰ Ninopase Walowak areagun, Walowak esewerek Yoyada aput Zakharia oba waike. Zakharia ebe it inelanem minelokoma melaike ati nen at en igilogolik: 'Ninopase Etage pogot ane nahalok en hutegep lek, ati nen hit hinala weak welagep ati. Hit en Ninopase Etage ogot herakegep atiba nen, At en hogo hit herakeinape!''' ²¹ Atinogo mene at he it en Zakharia wasung iluk inoe kain etage werek ane ike mene hologo halep, it en o Ninopase Etage pogot awi wurikmo olu nen, helep oba ineki lopok watukwama walaike. ²² At Yoas, inoe kain etage werek ati nen Yoyada, Zakharia opase, at oba hano halogo higilaike mene ake oba ebetilek.Atinogo mene at he at Yoas en Yoyada aput, Zakharia ebe motok watike. Zakharia ebe oban walagilek logolik, at en mel isike, "Hat en halenem Ninopase Etage pogot eileken haike mene nen oko huak!'' ²³ Wam mauge age warogo, ap esa Aram mene nen Yoas wasuogeluk waukwa. It en Yehuda nen Yerusalem mene inoasuogeluk wagalogolik ap ukuloak hugi ati obogat inoatukwa. It en yimene timene inekiabusak en wanukwa mene inoe kain Damsyik mene oba lakesukwa. ²⁴ Ap esa Aram en inebe hamulugat waukwa, Meneat he Ninopase Etage pogot en ap esa inebe apik Yehuda mene inoasuagaluk heraksasike. At en halike ati re apuni Yehuda mene nen Ninopase Etage pogot, Walowak it inopalak mene arat herakesukwa. Ati re nenat Yoas ebe ukum oba hisike. ²⁵ Apuni Aram mene laukwama, it en Yoas tok hanoma watukwa mene heraksaluk laukwa. At en Walowak esewerek Yoyada aput Zakharia watikomo at agoromi ayabu halelaukwa mene nen wasugun iluk awok palukwa. It en Yoas ebe nogo egarek oba nen watukwama at arat walaike, mene re inougi kantek inetege werek salinaparek oba salilek, we it en o Daud awi silimo keangma salukwa. ²⁶ Agoromi ayubu halarek mene nen Yoas wasugun isukwa re Zabad, Simeat he aua o Amon mene eak nen Yozabad, simrit he aua o Moab mene eak en wasugun isukwa. ²⁷ Yoas ageinapuri nen halik lagalaukwa, wene yogosagarek mene nen at hesik inane igilaukwa, nen Ninopase Walowak awi wurik a'la suesika oba holal palek mene weak asigin halok at en nikinogo halusak. ati nen Amazia, Yoas aput ugulukmo inoe kain etage werek hagalasusak.'' iluk isike.