(Yosafat Ebe Arat Walaikomo Opalak Salinapukaba Omakima Kengma Salukwa Wene) At Yoram ebe inoe kain etage werek menhisukwa wene ( 2 Raj 8: 16-24) ¹ At Yosafat ebe arat walaike nen ebe warek opalak inom omakima o Daud awi silimo salukwa. At aput Yoram opase ogulukmo inoe kain etage werek hagalaike. ² At Yoram ayalak inebe re Azarya, Yehiel, Zakharia, Azaraihu, Mikhael, nen Sefaca. it inebe etem he, Yehuda mene inoe kain etage werek at Yosafat ageinapuri welaukwa. ³ At Yosafat en amiminggeke motok apigat welaike mene perak, emas, nen amiminggeke hunogoat welaike mene ageinapuri supurogo wogosasike. At en hogo o sili Yehuda leget waganek mene inomat wogosasike, atonogo mene at he at inebe hubuk hesik hagasek logousak oba Yoram wogotike, nen aput makusa tago ati nen at wogotike. Yoram ebe inoe kain etage werek Yehuda mene hesik hagalaike wene ⁴ At Yoram ebe inoe kain etage werek hagalarik oguluk logousak oba hesik oane hagalaike, atiba lagakogo at en ap kaintek ukuloak Israel mene nen ayalak inebe obogat pisok oba motok inoatike. ⁵ At Yoram ebe talaike oba eki 32 huliba logolik at en aweama hagasek welaike nen at en o Yerusalem eki 8 huliba aweama hagasek welaike. ⁶ At Ahab halelaike hake at Yoram ebe eluk logolik ati higirat'halelaike, Ahab alogo at waganek logolik ati nen. Nen Yoram en Ninopase Etage pogot eileken oba weak'at halelaike. ⁷ Atinogo meneat he Ninopase Etage pogot en Daud ageinapuri mene hugi Ninopase Etage pogot en Daud hesik eperak inane huli warek welaike atiba nen ake weagarinapilaike lek ati. At en esage oak a'la kalogo welagarek mene Daud ageinapuri inom hisogo motok logouagaluk nen wogosigin iluk awok yogotike. ⁸ At Yoram en eki atem oba aweama hagasek werekma, apuni Edom mene Yehuda mene inaweama hagasek welaukwa mene lek iluk isukwasik it mene inoe kain etage werek inalik'mo menisukwa. ⁹ Atiba nen at Yoram agoromi kaintek weim mene obogat inom nen esok hagarek kereta weim yabarek mene oba lagilik i tegek palogo o edom laukwa. Ap Edom weim mene nen Yoram agoromi kaintek weim mene inom walingirogo hisasukwa, mene re o huako Yoram eluk aike, nen agoromi kaintek weim mene inom it inoasuogeluk laukwa. ¹⁰ Atem oba nen motok pikit yogotak yaba o sili Edom en Yehuda mene ninom lapukogo logousak lek iluk heksek weim palek werek ati. Apuni o sili Libna mene nen Yoram inom omakeat logousak inabit at. Yoram en Ninopase Etage pogot Walowak it inopalak hogoratarek mene haraksasikesike ati nen wene yi hake hagalarik waike. ¹¹ At Yoram en o Yehuda warogo loletelogousak oba punu holik oba ke wurik laike. At en apuni Yerusalem mene inebe inetauken oane halogo hisigik nen apuni Yehuda mene Inopase Walowak it inom hekhogo walegat halogo hisasike. ¹² Wene yogosikerek mene Elia nen Yoram hesik wene warogo hisike: "Ninopase Etage pogot, Walowak Daud mene, hopaselak holoat aloma mene' nen hat hebe heluk welagen he hopase, Yosafat, nen Asa, inoe kain etage werek Yehuda mene hesik welaike higit heke lek, ¹³ Nen hat hebe welagen he Israel mene inougi kaintek inetege werek welaukwa hake welagen. Ahab ageinapuri inom en halelaukwa hake hat en apuni Yehuda mene nen Yerusalem mene inetauken oane halogo hisegen. Hat en hogo re hat hayalak inoaten at, hat hano halelagen mare, ¹⁴ Yogotak ya, Ninopase Etage pogot en apuni hat mene inom ukum huko mene hoba higin o. At en hat hegeinapuri, haugi, nen hamiminggeke obogat homan huko mene hoba higin. ¹⁵ Hat hebe halukut oba u ekin mene hoba hikenem u apigat agalogolik hal a'la mene wulibiwagaloigin.''' ¹⁶ Ninopase Etage pogot en apuni filistin mene nen Arab mene o Etiopia eraluke welaikarek mene nen Yoram wasuogeluk waukwa. ¹⁷ It en Yehuda mene inoasuogeluk waukwasik, inoe kain etage werek welagarek oba kisukwasik en amiminggeke obogat wanukwasik wolok laukwa. It en he Yoram ageinapuri ap nen augi wogosek laukwa. We Yoahas,Yoram aput hobuk mene aligat welaike. ¹⁸ Obogat arat hagalaikomo, Ninopase Etage pogot en Yoram ou alukut oba lek asusak mea halogo hisike. ¹⁹ Eki wam mauge pire warogo welaikesik en, alukut wulibiwaike ati nen at ebe ou ekin aikesik walaike.It inopalak hesik agouk hogo hogorinapelogolik halelaukwa hake Apuni nen etu huko rogo halogo higilek herakesukwa. ²⁰ At Yoram 32 tahun huliba nen at ebe inoe kain etage werek hagalaikesik en o Yerusalem eki wam mauge 8 huli warogo aweama hagasek welaike. Apuni ake nen Yoram walaganem hahupi ake watilek Yoram ebe o Daud awi silimo keangma salukwa,atinogo mene re Yoram ebe inougi inetage werek salinabarek oba kengma salilek.