(Yosafat Aweama Hagasek Welaike Oba Awurep Kopokogo Moab Nen Amon Mene Inomame Aike Wene) ( 1 Raj 22: 41-51 ) ¹ Atiba nen arat, apuni Moab mene, Amon mene, nen apuni Meunim mene inebe miren hake nen Yosafat inom weim yabukwa. ² Apuni inebe miren hake waukwasik Yosafat yogotukwa, "Ap esa hukoba o Edom en hat hinom weim yabugun iluk arat waika. It i laut awolok lek welagarek ke tegek palogo waika nen o Hazezon-Tamar ati halok he En-Gedi yoma jage inelokoma kagalek logouwok. ³ At Yosafat ayuk hagalaike, nen Ninopase Etage pogot oba hinok wokegen iluk isike. Nen at en supuruk nikilek logogun ati iluk apuni Yehuda mene inebe lopok yogosasike. ⁴ Apuni Yehuda mene inebe waukwasik natogotukwasik Ninopase Etage pogot en leberisoak en iluk kino yogotukwa. It inebe o sili Yehuda mene welaikareke lopok en Ninopase Etage pogot kino yogosugun iluk waukwa. ⁵ At Yosafat ebe Ninopase Etage pogot awi wurikmo ket halukwa oba lelukuno soulam welaike. It ebe apuni Yehuda mene Yerusalem mene natogorek werekma inelokoma metek welaike. ⁶ At en igilogolik, "Ninopase Etage pogot, Ninopase Walowak ninovi nonopalak nit mene, Ninopase Walowak pogot oba welagatek mene nen apuni inukuloak etage lopok inebe obogat lapukogo welaikarek mene o yoma hekiba hagasek welagatek. Hat mene hekiba homame werek. Apuni ake omaket halok hat heilanem hangasusak motok elok lek aga. ⁷ Hat hebe Ninopase Walowak Nit mene! Hat en apuni o yoma welaika mene mugusogo wulaksegen yi. Hageinapuri Israel mene ineilanem Hat en hagaten yi. Hat en o yoma Abraham en tagomake mene logouagaluk wogosegen, Hat hayak he, keang hesik esewerek it hagalarik motok logouak. ⁸ Abraham en tagoma ke mene o keang oba werek yi, nen Hat hetage oba hawi wurogo hega. It en igilogolik, ⁹ Ukum ake nit ninowa wesigin ati ebe re ekat kawelek, at he supuruk no asigin, ati nen nit ninebe o okawerek awi wurikmo metek logogun nen hat hoba hetageba hawi wurikmo werek yi nen nit en hat hoba ninane waheto ati nit ukum ninoba werek en, atiba Hat en hasuk holik nen nit teinaime.' ¹⁰ Apuni Amon mene, Moab mene nen apuni tom Seir oba mene yi, yogotak hineileken lagasani, apuni Isarel mene o it werekma atoma kusak lek it apuni Israel mene o Mesir en wulibiaukwa, atiba nen apuni Israel mene nen lagakogo it ake inoasusak motok lek. ¹¹ Yogotak hineileken lagasasni it en oko nit ake ninoata lek ati. It en arat waikasik nit ninaua werekma mugusogo hinawaika ari, Hat en nit arat wonisegen mene anogo. ¹² Ya Ninopase Walowak nit mene, Hat en it ukum inoba higin lek a? nit en ap esa huko holek ari ninom weim yabugun iluk ninoba waika mene ninoane lek. Nit en nikinogo haluhe at ninoake palaga! Nit hat en lebenisan iluk kino yogoheto.'' ¹³ Apuni Yehuda mene inebe obogat lapukogo apuni it mene ake inom, inaugi nen iageinapuri it mene inomat Ninopase Etage pogot eilanem melaukwa. ¹⁴ Atiba lagakogo inebe atogorek logolik wenekak ati mene ikenem Ninopase Etage pogot agoreke Yahaziel, Zakharia aput oba waike. Zakaria, Benaya aput. Benaya, Yeiel aput. Yeiel, Matanya aput. Yahaziel ati re ebe apuni Lewi mene Asaf en tagomake mene. ¹⁵ Yahaziel en igilogolik, "Ninoe kain hetage pogot Yosafat nen hit ake hinebe obogat lapukogo o Yehuda nen Yerusalem welagep mene an nane hinasuk holino. Ninopase Etage ogot ane palek oba an yogonete, 'Ap esa huko holek ati hesik hajuk agun ake hoak awolok ugun nen weim halugun ati hat hinom halugun lek,mene at he weim ati Ninopase Walowak ninom yabugun! ¹⁶ Huen, pierik nen it inebe o aloma loak. It ati tom Ziz obake lauak. Hit en it hinom o eloke leimo auni lekma eluguno Yeruel werekma hisogon anaga. ¹⁷ Hit en weim yi hinom yabusak lek. Hinebe melasugun oba metek kamoino nen Ninopase Etage pogot en telinabigin mene hineileken lakano. Yehuda nen Yerusalem mene yi sani, hinayuk agup nen hinoak abolok ugup, huen halok it hinom yabuageip nen inaweama lagik uagep, nen Ninopase Etage pogot en setarek motok logogin.''' ¹⁸ At Yosafat ecep awi yagasogo elokesogom eloken keang oba hakesike. Nen apuni Yehuda mene o Yerusalem welaukwa amonogo inebe obogat lapukogo nen Ninopase Etage pogot hesik etai oba hogoratukwa. ¹⁹ Apuni Lewi mene Kehat ageinapuri mel nen Korah ageinapuri inebe melarik Ninopase Etage pogot etai oba hogoratukwa, Ninopase Walowak Israel mene ninopase iluk inane hokorogo at isukwa. ²⁰ Ohealegat hup siak hogo, Yosafat agoromi weim mene o leimo apuni lekma Tekoa laukwa. It wulipenem, at Yosafat melaikesik nen mel yogosasike, ''Apuni Yehuda nen Yerusalem mene,an nane igin ati hinasuk holini. Ninopase Etage pogot, Walowak hit mene hinetauken oba hipiritegep halok, nen hit hinebe metek motok kamougun! Ap wene yogohisagarek mene inetauken inoba hipiritegep halok, nen hit hesik hano hagalasigin!'' ²¹ Agoromi inom arat wenekak isukwasik, at Yosafat en Ninopase Etage pogot hesik etai oba hogorasusak mene it yogosasike. It inebe ake wetewerogo hisilik etai oba hogorasusak mene su inogat laberek tegelek hano mene isusak nen ap weim mene inelokoke etai Ninopase Etage pogot hogoraik lasak at. ''Ninopase Etage pogot hoabut hano nen hanisek werekolek' hogotapo motok logogun!'' ²² It atai oba nen Ninoase Walowak hogoratokolek, Ninopase Etage pogot en ap weim esa Amon mene, Moab nen apuni tom ukul Seir en Yehuda mene inoasugun iluk waukwa mene it mawen halogo kwe palogo hisike! ²³ Apuni Amon nen Moab mene nen tom ukul obake Seir welaukwa mene inom weim halukwa, it inebe motok inoarik laukwa. Apuni Seir mene inebe arat inoatukwa, apuni Amon mene nen Moab mene inoatik nen Moab mene nen Amon mene inoatik igilaukwa. ²⁴ Ati nen apuni Yehuda mene o leimo apuni lekma kayoma jage logogun iluk laukwa, it en ap esa huko holek werekma herageinapukwa ati, mene at he it en ineileken lakasukwa hak he ap warek keangma liok lauk sek werek welaukwa. Omaket halok ake ineluk heraksigiklek. ²⁵ Atiba lagakogo, at Yosafat nen ap weim mene waukwasik ap warek amonogo mene yimene timene wanukwa ati. It mene wam, inagarok yimene timene, su inogat laperek, nen inamiminggeke ato inomat milaukwa. Obogat lapukogo it mene hesik enak agilik laukwa, atinogo hagalaikomo it ake wolok wagilek. Yimene timene atoma motok elogat nogo nen he wano kolek ineki henagan oba wanukwa. ²⁶ Ineki ekaminogo atiba Yosafat nen ap weim mene inom o tokwe erangma etai silomo apiaukwa, nen it etai Ninopase Etage pogot hogoratukwa. Atiba nen oguluk ati etage etai silimo iluk' hisukwa, apuni nen oguluk ati etage ilugi, "Etai silimo erangma igilugi mene yogotak ya pikit atiat werek yi. ²⁷ Atiba lagakogo at Yosafat en apuni inebe obogat lapukogo hagasek o Yehuda nen Yerusalem en inapoke Yerusalem laukwa inala hai apik aike nen Ninopase Etage pogot en it arat inebe hano halo hisasike ati nen it inom inaselei mene inomame lak halogo hisike. ²⁸ It o Yerusalem kikilogolik etai pikon gambus, kecapi, nen Nafiri oba watilogolik Ninopase Etage pogot awi wurikmo oba higit laukwa. ²⁹ O sili lopok obogat lapukogo welaikareke atoma mene it inayuk he Inopase Walowak aligat oba logolik inasuk holukwa re Inopase Etage pogot en apuni Israel mene inom inaselei mene inoasigin isike. ³⁰ Ati nen he,Yosafat ebe logousak oba awolok lek hagalaike, Nen Ninopase Walowak en at ebe logousak oba Yiling waling hano hago welaike. At Yosafat en huli atiba aweama hagasek welaike ³¹ At Yosafat en o Yehuda tokwe obogat aweama hagasek welaike. At ebe talaike nen pikit huli 35 tahun oba at en aweama hagasek welaike, nen o Yerusalem at en aweama hagasek eki 25 tahun oba welaike. Agosa etage Azuba, Silhi aput. ³² At opase hake, Asa, Yosafat en Ninoase Etage pogot eileken ma eberogoat mene halusak. ³³ We, ake waretelaike mene weak halogo legetigiklek nen apuni inebe ato wene oba higitik lek logolik! It inopa lak hogoratilaukwa mene Ninopase Walowak hesik oplik lasak mea at. ³⁴ At Yosafat en hagarik lagalaike mene eroma nen pikit erepul oba kopokogo,suesika oba holal palogo hisukwa. ³⁵ Atiba lagakogo, inoe kain etage pogot Yehuda mene Yosafat en Ahazia eperak omakima aukwa, Israel mene inoe kain etage pogot en weak motok at hagatilaike. ³⁶ At Yosafat Ahazia eperak en imake so warogo lauke ogolawi halogo halelaukwa. It eperak en o sili Ezion-Geber lagalogusak oba so i make warogo lauke halukwa. ³⁷ Meneat he at Eliezar,Dodawa aput o meresa mene nen Yosafat yogotilogolik, "Hat arat Ahazia heperak omakima agap atiba, Ninopase Etage pogot nen hat hagaten mene weagarogo higin.'' So ogolawi hagarek amonogo weagarik laikomo o Tarsis lak oba mea hagalaike.''iluk isike.