(Pelihat Yehu nNen Inoe Kain Etage werek Yosafat Wenagatike Wene) ¹ At Yosafat, ineo kain etage werek Yehuda mene a'nogo ebe tegelek hano aua o Yerusalem waike. ² At Yehu, Hanani aput pelihat mene a'nogo wulibiwaike hak inoe kain etage werek Yosafat eperak apiaukwasik en mel sisike, "Apuni inoabut weak mene leberisegen ati nenahalok? apuni Ninopase Etage pogot inom inaselei welaikarek mene hat en hetabi isegen ati nanahalok? Ati nen Ninopase Etage pogot en hat wenakate ati. ³ Meneat hat wene ake hoba lek hano ma hebe heluk logogin,nen hat en o atoma mene Asyera ebe hake halek wukogo lakesasigin ati, nen hat hetauken oba nen sikipogo Ninopase Walowak opolik lasak iluk haligin." ⁴ At Yosafat ebe o Yerusalem welaike. Atima nen apuni at mene o sili Bersyebe nen pikit o Efraim punuake werekma it inebe inapotke Ninopase Etage pogot, Inopase Walowak it inopalak hogoratilaukwa mene a'nogo oba wogosek hisawesusak hesik inobake halari lagalaike. ⁵ At Yosafat mene ukum inoba higik kotik igilogousak mene hesik inebe o sili Yehuda inauke welaikareke lopok hisasike, ⁶ Nen ap ukum inoba higik kotik egarek mene inoba yogosigilogolik, 'Hit en ake halusak halok hanorogo halelogeino, hit hinebe yi apuni keangma mene ukum inoba higik kotik uguke lek, meneat he Ninopase Etage pogot mene hesik welagep o. Wene tegetenem At en setigek motok logogin. ⁷ Ati nen, hit en Ninopase Etage pogot oba hinayuk hogo logousak. Hit en yabu Ninopase Etage pogot Walowak ebe elokoma nak hisikerek ati nen hit en higit hogo lalusak, At en apuni ake nak etabi nen ake abit hisikerek motok lek. Nen At en eka ake ineki nilik en wene sikipisigin mene lek asuak en iluk halerek legat.'' ⁸ O Yerusalem he, at Yosafat mene apuni Lewi mene inebe, Walowak esawerek, nen apuni o Yerusalem welaikarek mene ukum inoba aganem ero hitigilogousak hesik ukuloak apuni Israel mene ukum inoba higik kotik uguke hesik hagalaukwa. ⁹ At Yosafat en wene yinogo halelogeino iluk it arat yogosasike, "Hit en Ninopase Etage pogot hinayuk hogo logolik yiwene tiwene hagalasigin halok hinaberali lek hinetauken oba halelogeino. ¹⁰ Nen ake apuni inoatenem, hit en ukum ugun halok, pemerintah, ugun mene, athe ukum ake welek mene hagalaga halok, Ninopase Etage pogot oba weak halenem At en wene palilik apuni at mene ukum inoba heinogo nen hit it inelurogo yogosano. ¹¹ At Amarya ebe re Walowak Esewerek welaike nen at en Ninopase Etage pogot ageinapuri inoba wene sikipitenem usak hesik welaike. Ze baja, Ismael aput ebe re ukuloak inukuloak Yehuda mene inoba wene sikipitenem inoe kain etage werek oba yogotilogousak hesik welaike. Apuni Lewi mene yabu suesika oba holal palogo huke hat hesik welaike. Hinayuk lek hogo nen eberogoat mene halenem! Ninopase Etage pogot en apuni hano halarek mene serisek motok welagarek, "iluk isike.