(Ahab En Ramot Geliad Inopase Etage Pogot Ane Palek Yogosagarek Mene Ake Wene Eberogat Salek Inapeliak En Yakulisagarek Mene inoatike Wene) ( 1 Raj 22: 1-40 ) ¹ At Yosafat ebe agarok eimo wulalak ebe esin hake werekma, atiba lagakogo inoe kain etage pogot Ahab hesik wene hisike mene at ebe hagalaike. ² At Yosafat en wam mauge ake kopokogo Ahab o samaria werekma oba halaike. At Ahab en Yosafat agoromi inom laukwa mene inelokoma inaganeke wam kambing Domba inaweakma warogo hisike. Atiba lagakogo at Ahab en o sili Ramot Geliad welaukwa mene inoasuagaluk ayoko hisike. ³ At Ahab en Yosafat yogotelogolik, "hat neperak o Ramot Geliad inoasilamo elok a?" Yosafat en oko igilogolik, ''hano, an nagoresa hat hagoresa inom esa lapugutuok nen nit ninebe omakima arik weim haluok.'' ⁴ At Yosafat en inoe kain etage werek Israel mene yogotilogolik, Nit en oba halilek logolik Ninopase Etage Pogot tak wene oba hinok wokuok.'' ⁵ At inoe kain etage werek Ahab en ap wene yogosagarek mene inebe 400 huliba atogorinapikesi en it wene inoba hinok wogosasike, "Nit en o sili Ramot Gilead, inoasilasak elok a!' at he mea a?" Ap wene yogosagarek mene amonogo nen wene oko Ahab yogoti'logolik, Ninopase Walowak en Ramot Gilead ninoe kain hetage werek hekiba arat hike.'' ⁶ Anogo meneat he at Yosafat en igilogolik, Ninopase Etage Pogot ageinapuri hesik wene yogosagarek mene ap ake o ati werek a?'' Wene sekek hogo yogonisoak en nit en herarik luok.'' ⁷ Atiba lagakogo at inoe kain etage werek Ahab en Yosafat yogotilogolik, "Wene yogosagarek mene omaket ake hunogoat mene werek o, wene yogosagarek mene ati etage Mikha, Yimla aput. Mene re Ninopase Etage pogot en wene igin mene higit hogo ake usak lek ati nen an nen napit lagigilagi. At en an wene weak mene motok yogonerilogo, ''At Yosafat en iglogolik.'' Ahab hat en wene ari usak lek mene agen ari.'' ⁸ Atiba nen at inoe kain etage werek Israel mene nen Mikha Yilma aput anogo wolok wesuagaluk ap ake ayubu halerel mene watike. ⁹ At Ahab, inoe kain etage werek Israel mene nen Yosafat, inoe kain etage werek Yehuda mene oguluk wabun oba eken holarekma o sili samaria kegareke kwe ape halek oba eperak inasu ap kaintek itarek mene ikogo inoguluk lopok halekma eperak erarogo hurek welaukwa, atem oba ap wene yogosagarek mene inebe obogat lapukogo nen wene hobuk hagalasigin mene hesik ikokolek, 'inougi kaintek inetage werek inebe pire ati hurek werekma ineilanem metek welaukwa. ¹⁰ Ap wene yogosikerek mene etage Zedekia, Kenan aput nen posiemaken oba aik hagarek halikesik Ahab mel yogotike, "Yire ebe wene Ninopase Etage pogot ane, 'Hat en posiemaken aik hagarek ati oba ap esa Aram mene hologotigik inoatenem it inebe walasugun.''' ¹¹ Ap wene yogosagarek mene ati nen wene omaket ati at yogosasukwa. It en igilogolik, "O sili Ramot Gilead lani nen hat en hoane asigin nen ninopase Etage pogot en inoe kain etage werek ekiba higin.'' ¹² Ati sat ap ake Mikha wasiloagaluk yoko lakesuka mene a'nogo nen Mikha mel yogotike, hasuk holin, ap wene yogosagarek mene nen wene oak omaket mene motok ega. It en he inoe etage werek elok hano asigin. Iluk egasikmore, hat en hogo it wene yogosagarek mene ega higit hogo hano asigin at iluk ino.'' ¹³ Ati nen at en wene oko mel isike, "Ninopase Etage pogot eluk mene etaga oba, An nen igin e we Ninopase Walowak en ike mene higit hogo at igin o.'' ¹⁴ Ati nen at Mikha inoe kain etage werek Ahab oba waike. At inoe etage werek en, Mikha mel yogotike, nit en weim o Ramot Gilead inoasilasak elok a?" elok logon mene hat hoane asigin, nen it en hat hekiba hugun." ¹⁵ At inoe kain etage werek Ahab en Mikha mel yogotike, "Hat en wene Ninopase Etage pogot en ike mene halok?'' Eberogoat mene sekek hogo yogo' nenok en nane ake inom at' lagakogo yogohitilagi, ¹⁶ Ati nen lagakogo at Mikha nen igilogolik, "An neileken lagigi mene ap esa Israel mene tom obake lopok wuliba, eperak higit he, Kambing Domba wam konarek mene inebe lek ma yugunat lurogo lagarek ati hake hagala,atiba at Ninopase Etage pogot en wene yogonisigilogolik, 'it ati mene inoe kain ukulok lek mare,inekawerek lnebe lopok en hano tegelek inauake lopok loak.''' ¹⁷ At Ahab, inoe kain etage werek Israel mene nen Yosafat yogotilogolik, ''At Mikha nen wene ake hano hagalasigin 'iluk an hesik yogo neterek lek 'iluk arat yogo heti a'nogo ari, mene at he wene weak mene motok ikerek.'' ¹⁸ At Mikha nen igilogolik, "Ati nen Ninopase Etage pogot ane palek ike mene yi: An neileken lagigi hak Ninopase Etage pogot ebe at mene e talekma hurek welaga higi, werekolek ap inasike werek pogot oba mene eki peike welaika nen ake eki eboke welaika. ¹⁹ At Ninopase Etage pogot nen ane palek oba Ninopase Walowak en yogo pelaksawagarek mene yogosigilogolik,' Hinebe ya sanen inoe kain etage werek Ahab a'la kagalumo nen at weim ap Aram mene o sili Ramot Gilead haliloak, halilaganem at ebe o aloma nen motok wasuak?' Ap Ninopase Walowak en yogo pelaksawagarek mene nen inala agasuka mene lopok wene oba liabuka. ²⁰ Atinogo halenem omakeat ake agoreke nen Ninopase Etage pogot oba laikesik nen mel yogotike, 'An nen erogat yogosigik!' At Ninopase Etage pogot en anema wokasike, 'Hat en ebe kino haligin?' ²¹ Agorek ati nen wene oko mel isike, 'An nen ap wene yogosagarek mene inebe obogat Ahab oba laksawesigin nen ap wene yogosagarek mene atoma nen inoe kain etage werek Ahab ati wene inapeliak en yogosuak. Atinogo isikomo At Ninopase Etage pogot ane palek oba'Hanomotok. Wene ebe ati halino. Hat en hano haligin.' ²² Nen, ebe ati arat hagalaike. Ninopase Etage pogot en at mene wene yogosigilauka mene amogo wenakak inapeliak en lalinaparek mene yogosuagaluk areagun inapeliak en egarek mene Ninopase Etage pogot en it inapeba hisike. At Ninopase Etage pogot en arat weagasuak iluk isikesikmo at oba arat weak hagalaike.'' ²³ Atiba lagakogo wene yogosikerek mene Zedekia, Kenaana aput waikesik Mikha eloken lapuk hogo lakesike. At en igilogolik, Ninopase Etage pogot agoreke nen an yogonitilek he hat hoba nen yogohete ati kinogo?'' ²⁴ At Mikha nen wene oko mel yogotike, Lakan, an nen igi hagalasigin ana. Nen ineki ati oba at hagalaike, hat hebe hesik lilik haua o oguluk ake a'la negen hinalasilano.'' ²⁵ Atiba nen lagakogo at inoe kain Ahab en ap ake eyabu halerek mene nen Mikha ebe hagilik walok wesuak iluk isike, "At ebe hele warogo wolok ap o sili atoma inaweakma hagasek welaikarek mene Amon nen ake Yoas, inoe kain etage werek inoba wolok wauka. ²⁶ At nen it yogosigilogolik Mikha ari ebe ineki hele warak hisagarek oba ati kelakeino. Supuruk Roti hamuluk hogo ake nen i ake inom wogono, wogorik werekma an weim halelogopik nebe tegelek hano wesigin.'' ²⁷ Anogo mene at he at Mikha nen wene oko mel isike, Ninopase Etage Pogot nen wene an ake yogonete, hat hebe tegelek hano wesigin! Ai apuni obogat lapukogo, an nane igin yi hinasuk holino!'' Ahab ebe o Ramot Gilead en wasugun ²⁸ At inoe kain etage werek aua Israel mene nen inoe kain etage werek Yosafat aua Yehuda mene nen o sili Ramot Gilead weim halilaike. ²⁹ At inoe kain etage werek Ahab en Yosafat mel yogotike, "Nit wein haluok en weni. An nen nebe inoe kain etage werek negen halilek we welakme negen haligin, iluk isike, iskesik en ap esa holek amonogo inom esa holuka, mene re hat su ap inougi kain labetarek mene labenok. "At ahab hogo lek lebegen halikesik nen ap esa holek atoma inom weim haluka. ³⁰ At inoe kain etage werek Aram mene ukuloak weim kereta oba halarek inebe 32 huli. At inoe kain etage werek en igilogolik it en weim apuni hunogoat mene ake oakeba hagasogo yuguneke halusak lek. Mene at he inoe kain etage werek Israel mene ati alagat hasak. ³¹ Ati like Weim arat halokolek, ap ukuloak weim mene ati nen eileken inoe kain etage werek Yosafat lakasike. It inala nen at ebe apuni Israel mene inoe kain etage werek 'iluk agasukwa. It en oba horogorok waukwasik nen ebe moto wasuogoluk isukwasik en eluk hebisuka, mene at he at Yosafat ane koisike nen koisikomo Ninopase Etage pogot en lebetasike. ³² It en ineileken Yosafat hasukwa hak he at ebe inoe kain Israel lek hunogoat en, it en watilek hebisukwa. ³³ Ap weim mene ake sike litenem eki weak mene nen tok weleke pising hogo laksasike. Togeken ati ebe Ahab at mene, su weim hagarek mene elugun oba higit halek. Atiba at Ahab en kereta oba lagelik wolok weim lagalaukwa mene mel yogosasike, "Hinaloke hebelogo nen weim halugun yiba, an noasuk hagalaga wonarek wulibini.'' ³⁴ Ineiki ake atiba, wein motok huko mene halukwa. At Ahab apoke hebelaikesik kereta weim halarek mene oba nen apuni Aram mene eileken lakasike hak weim halokolek o arat homanoke mo liok isike. Atiba nen o homanoke at like at ebe walaike. iluk isike wene.