(Yosafat Asa Aput Ugulukmo Inoe Kain Etage Werek Hagalaike Wene) ¹ At Yosafat en Yehuda mene oane halogo hisike atiba it en apuni Israel mene inom weim halukwa. ² At opase nen, o sili Yehuda leget nen o sili Efraim sebelike ke atoma at en ap esa obogat leget haleke hisilik laike ³ At Yosafat ebe elege oan oba opa Daud, halelaike hake hano nak hagatelaike atiba Ninopase Etage pogot en at serogo motok welaike. At Yosafat en keangma hogoratarek mene tugi hareken ake herarik lagilek, ⁴ Meneat he we Ninopase Walowak, ibi opala haga welaukwa mene nak herarik laga laike. Apuni Israel mene welaukwa hake halilagilek nen at en Ninopase Walowak ane isike mene hologo higit hogo nak hagatilaike. ⁵ At Ninopase Etage pogot en inoe kain etage werek Yosafat Yehuda mene oane halogo hisike. Apuni o Yehuda mene inebe obogat lapukogo okawerek hesik at wogotenem agorok eimo wulalak logolik etage werek welaike. ⁶ At etaiken hakogotilik Ninopase Etage pogot opolik lagalaike. At en uguluake ako waretelaukwa mene nen apuni-apuni Asyera ineki nen auak halogo hilik o Yehuda atoma hogorati laukwa mene wugutigik lakesike. ⁷ At Yosafat en hagasek welaike higit ineki wam mauge henagan oba hagalaikomo, at en ap inogogi ukuloak hugi o sili lopok Yehuda atoma wene yahulisoagaluk laksasike. It ati inebe re ake Benhail, Obaja, Zakharia, Nataneel, nen Mikha lauwa. ⁸ At Yosafat en he apuni Lewi mene kaintek ukuloak hugi ati inebe miren hake laksasike. It ati inebe re ake Semaya, Netanya, Zebaja, Asael, Semiramot, Yonatan, Adonia, Tobia nenTob-Adonia it ake Walowak esewerek mene Elisama nen Yoram laukwa. ⁹ Ap inogogi kaintek ukuloak, apuni Lewi mene, nen ap Walowak Esewerek en Ninopase Etage pogot ane tegelek hano wene warogo hisike mene anogo wolok o Yehuda mene yakulisuogoluk apuni atoma welaikarek mene inoba wolok laukwa. ¹⁰ It apuni inukul etage lopok Yehuda mene o eraluke welaukwa mene Ninopase Etage pogot inayuk aike, ati nen it Yosafat inom weim halusak inayugat hagalaike. ¹¹ It apuni Filistin mene nen okawerek hesik iluk Yosafat oko wogosuogeluk perak wolok waukwasik wogotukwa. It apuni Arab mene inebe miren hake wam Yosafat hesik wolok waukwa.It en wam kambing 7.700 huli nen wam domba kulok mene 7.700 huli nen wam kambing kulok mene at oba wolok waukwa. ¹² At Yosafat ebe oane aike. At en aua o sili Yehuda atoma supuruk nikilogousak oba leget katogogo wutike. ¹³ At en supuruk nigilogousak hesik o atoma abik hogo halogo hisike. Nen Yosafat en ap ake ekaragun oabut elok mene o Yerusalem yage louagaluk hisike. ¹⁴ Ap weim mene yi inetage halek he it inukuloak mene a'la halek welaike. Ap weim mene inatage halek yi re o Yerusalem welaukwa: Ap inougi kaintek ukuloak Yehuda nen tagomake mene inebe re yi: Ap kain ukuloak weim mene Adna nen ap weim mene esa inebe 300.00 huli nen inoabut elok hugi hagasek welaike. ¹⁵ At Yohanan nen ap esa weim mene 280 huli nen hagasek welaike. ¹⁶ At Amasia, Zikhri aput en ap esa weim mene apuni inoabut elok hugi inebe 200.000 huli nen hagasek welaike. At okawerek en Ninopase Etage pogot ayabu hagin iluk kisikesik a'la hai oba halelaike. ¹⁷ It Benyamin nen tagomake mene Elyada welaike, at ebe oabut elok logolik ap esa weim mene inebe 200.000 huli nen sike, tok eken, nen sin ugu at mene hesik welaukwa. ¹⁸ At Yozabad he inebe 180.000 huli nen ap sike sige hago weim arat halusak oba welaukwa. ¹⁹ It apuni obogat lapukogo inebe yoma re ineo kain etage werek Yosafat hesik yabu haluke welaukwa, it apuni hetakit inebe ato inoe kain etage werek en o it inaua Yehuda atoma obogat yage louagaluk hisasike. 'iluk isike.