(Asa Adam Eperak En Inane Huli Palogo Hisukwa Wene) ( 1 Raj 15: 16- 24 ) ¹ Ineki ake wam mauge 36 huli warogo nen at Asa aweama hagasek werekma, Baesa, inoe kain etage werek Israel mene nen Yehuda mene inoasigeluk isike. At ebe o sili ake Rama atoma laike nen apuni ake waganem iluk haliesik nen hobuk at inoe kain Asa aua Yehuda mene oba laike. ² At Asa nen perak nen emas Ninopase Etage pogot awi wurikmo welaike mene nen ake ap inogi kaintek welagikarek oba welagarek mene inomat wanike. Ati nen at en ayabu halarek mene ake Benhadad oba lakesike, apuni Aram mene inoe kain etage pogot o sili Damsyik atoma welaike, mene wene warogo oba hisike, ³ ''An ho hat ho wene ninane huli palogo huok, ake an nopase ho hat hopase ho. Heileken han,an perak nen emas hat hesik higi ama. Yogotak Baesa, apuni Israel mene inoe kain etage werek heperak hinane huli palep anogo legetsan, at en an noba hesik ike mene lek asuak'' ⁴ At inoe kain etage werek Asa nen wene warogo hisike mene anogo Benhadad asuk holike, nen ap weim mene inoe kain anogo o sili Israel werema inoasuak en 'iluk lakesike. It en o sili Iyon, Dan, nen Abel-Maim motok o larogo inoatukwa. It en hogo re o sili ato obogat lapukogo o Naftali supuruk welaike oba weim halelogolik lek halogo hisukwa. ⁵ O sili Israel werekma arat inoata iluk at Baesa asuk holike, atiba at en o Rama leget wutilaike, nen yabu anogo arat harat eki kopokogo hebisike. ⁶ Atiba nen at inoe kain etage werek Asa nen apuni Yehuda mene inebe obogat lapukkogo wasasike. It o sili Rama atoma laukwasik helep e Baesa leget wutilaike mene wanukwasik leget hobuk wutukwa. At Asa apuni Yehuda mene inom en helep e atoma ba o Geba nen Mizpa hesik oanero iluk halukwa. ⁷ Ineki ake ati sat Hanani nen Asa hagaluk waike,inoe kain etage werek Yehuda mene nen at yogotilogolik, "Asa, hat he! Ninopase Etage pogot, Walowak hat mene oba hakogo tegen nogo' we inoe kain Aram mene oba hakogo tegen agigi, ati nen hat en ap esa Aram mene inoasusak mea aga nen it arat hat heraga'aga. ⁸ Apuni Etiopia nen Libia mene ap esa motok apigat nen inoane werek? esok hagarek weim halare mene nen ap wam kuda oba lagilik weim halarek mene inebe motok abik. Nen hat he Ninopase Etage pogot oba hokogo tegen, ati nen Ninopase Etage pogot en it inebe hat hekiba hike. ⁹ At Ninopase Etage pogot eileken o keangma yoma lanisek logolik apuni At inom hutik welaikarek mene hugi it inoane wogosikerek .Asa, hat he wene wagaten, ati nen hat yogotak weim halinok.'' ¹⁰ At Asa nen Hanani ane wene weak isike ati nen Hanani eki hele warogo a'la kelakesike. Atiba nen at ebe hogo apuni o atoma mene nen tugi warogo hisukwa. ¹¹ At Asa nen obogat halike mene, alebat en pikit hobuk wurep oba halike mene re, holal eka oba palo hisukwa. ¹² Wam mauge 39 huli kopokogo Asa nen hagasek welaike ba, at ebe esok oa u aike. Ebe oa u weak at logoligat, at en Ninopase Etage pogot en lebenean iluk igilaike lek, meneat he we inoa hano agarek mene oba kino igilaike. ¹³ At Asa ebe re wam mauge 41 huli kopokogo at en hagasek werekma walaike, at ebe re opalak salinabukwa ba omakima salukwa, ¹⁴ Nen apuni Asa salusak oba o keangma arat habulukwa mene re at aligat hesik he o Daud awi silimo salukwa. It en ebe warek anogo re nogo egarek oba halekma yimene timene nen ake owasi hano mene hisukwaba weinogo hisukwa, ati nen Asa hesik etu huko mene wialogo hisukwa, 'iluk isike.