(At Asa Nen Hano Halogo Hisike Wene (Raj 15: 13- 15 ) ¹ Ninopase Walowak areagun Azarya,Obed aput oba waike. ² At Azarya nen Asa eparak abiasusak iluk oba laikesik nen mel yogotike,' "Asa, nen hit apuni hinebe Yehuda mene nen hit apuni Benyamin mene obogat lapukogo, an nane hinasuk holino. Hat hagoromi hinom Ninopase Etage pogot en hano hagarek loigin o, hat en At heraksaluk lagen halok, At en hogo hat harakaigin at o. ³ Apuni Israel mene Ninopase Walowak eberogoat mene inom ineki wam mauge yikopok tikopok lagakolek inom hutik legat nen wene yogosagarek mene nen ake yogosilek nen Ane huli warek palek oba legat welaukwa. ⁴ Meneat he apuni Israel mene ukum inoba aikomo,it en hobuk inapotke Ninopase Etage pogot,Walowak Israel mene oba waukwa. It en heratukwa mene nen werekma apiaukwa. ⁵ Ineki atem welaukwa atiba, apuni wuli kigik usak mea welaike ati re o atoma alok iko motok logolik wene huko mene nak hagalagalarik wagalaike. ⁶ Apuni inukul etage omaket ake nen ake lek halogo higik nen o sili omaket ake nen o sili ake lek halogo higik lagalaukwa. Wene yi hagalaike ati re Ninopase Walowak en ukum it inoba abigat hisike. ⁷ Atinogo mene at he hit, hinetauke oane tigik, hinoane lak logosak lek, arat iluk usak lek, hit en yabu hano rogo halugun oba hineki oko helogon!'' ⁸ At wene yogosikerek mene Azarya, Obed aput nen isike mene Asa asuk holikesik at a'la hai akasike. Atiba at en tugi kaneke hogoratarek mene o Yehuda obogat nen Benyamin nen o sili lopok wanukwa ke o tom Efraim weak mene welaike amonogo waganogo wugutik lakesike. Nen at en Ninopase Etage pogot awulikin halek Ninopase awi wurik selepon oba welaike mene hanorogo auak halogo hisike. ⁹ Atiba at Asa nen inebe obogat lapukogo apuni Yehuda mene nen Benyamin mene atogorinapike.At en hogo re apuni Efraim en tagomake mene, Manasye,nen Simeon mene it inom omakike o Yehuda atoma welaukwa mene atogorinapike. Apuni Israel mene inebe abigat o Yehuda waukwa ati re Ninopase Etage pogot, Walowak, en hano mene halenem ineilekan lakasukwa. ¹⁰ At Asa nen apuni inebe obogat lapukogo yi o Yerusalem atogosukwa tugi henagan oba warogo wam mauge 15 huli warogo at aweama hagasek welaike. ¹¹ Ineki ake ati sat it en okawerek hesik wam 700 lembu sapi hisukwa nen 7.000 wam kambing domba kulok mene Ninopase Etage pogot hesik it inekiabusa en wolok waukwa mene hisukwa. ¹² Atiba it en inane huli wasusak hesik Ninopase Walowak oba horogoko herarik lagik nen Ninopase Etage pogot hesik yabu halilogolik it inetauke mel nen inala mel Ninopase Walowak oba logogun iluk inane huli warogo hisukwa. ¹³ It apuni inebe lopok,yekerugi ake nen apuni inalugetek, ap en a hemi nen a ake Ninopase Etage pogot, hesik yabu halusak lek halok Ninopase Walowak Israel mene nen inoasigin. ¹⁴ Atiba at Asa nen apuni inom en inopase Etage pogot oba inane huli hisukwa. It inane huko rogo koisukwa nen pion trompet anetigik nen wam domba oe tago mene aik wanukwa. ¹⁵ It apuni Yehuda mene inane huli watukwa ati oba inala hai apik akasukwa ati. It en Ninopase Walowak opolik inetauken omaket arik, herarik lagik nen inom apiagik isukwa, atiba Ninopase Etage pogot en o atoma obogat hano halogo hisasike ati. ¹⁶ At inoe kain etage werek Asa hogo Maakha hesik holal palike, agosa ebe he aluge mene, at en apuni negen arat etage Asyera halogo hisike. At Asa nen apuni negen Asyerah halek ebe anogo halik halokogo liabikesik etumo o erangma Kidron atoma lolike. ¹⁷ At Asa nen bunu obake warogo lolilaukwa ke ake weagatilek, mene at he at en ninopase Walowak oba awit higilek eperak hutik motok welaike. ¹⁸ Yimene timene opase nen okawerek hesik higin mene mel nen at higin mene Ninopase Walowak awi wurik oba hilaike, ati ebe re emas, eka perak, nen yimene timene ake wolok Ninopase Walowak awi wurik oba hilaike hilaike. ¹⁹ At Asa ekiba hagasek werekolek ineki wam mauge 35 huli oba welaukwa, werekolek o atoma weim age hagalagilek hano motok welaukwa, 'iluk isike.