¹ Wakge rapana ngara kuwana, monno wakge rapana nengettana ngara kuwana nekabu langita. ² Wakge rapana badadi monno wakge rapana ba mate. Wakge rapana batodaka monno wakge rapana bakoukadi patodaka. ³ Wakge rapana bapamate monno wakge rapana bapaduwa. Wakge rapana balundage monno wakge rapana bapa kedde. ⁴ Wakge rapana bangi'o monno wakge rapana ba ma'ita . Wakge rapana bakatabah monno wakge rapana ba nego-nego. ⁵ Wakge rapana balettona togo, monno wakge rapana bapa kuwadi togo. Wakge rapana bapa wapona monno wakge rapana bapattuwe walina bapawapana. ⁶ Wakge rapana bama elleta monno wakge rapana bapa muwa. Monno wakge rapana bama bondala, monno wakge rapana baka pettidi. ⁷ Wakge rapana bahirrawe monno wakge rapana ba kottuge. Wakge rapana ba kada danna monno wakge rapana bapa newe. ⁸ Wakge rapana bama nawara wekkina, monno wakge rapana dapa beiwi. Wakge rapana bapatauna monno wakge rapana baduwa. MARAMBAH ALLAH NAKUASAGE TANAHNA ⁹ Appawe pa utu wakwe ne pawill a kattona ne parawida? ¹⁰ Yowa ku etawe ngara kuwa papawilli payana Marambah Allah nebarrada ngara anana atapia bapa willi? ¹¹ Marambah Allah napa dadi ngara kuadi aduwa langgu takka dukka rapana. Marambah Allah na tak'a dommo ge dukkana nea nee na ate danada hidda, bage na ata pia danna tabbokakiwe nepapawillina Marambah Allah awali bana tatarige dukkiwe bana bawe. ¹² Yowa ku pandege badaiige arei pandua tubada hidda awalina mori dame monno baraige andua ane tillu toleka. ¹³ Ngara kua na ata engana ba nga'a ba enu monno a podda gea a dua wali ngara kuana papawilli ba akattona. Nenyawe paka nenggana Marambah Allah ¹⁴ Yowa kupandenge ngara kuana nepa raina Marambah Allah mori wali-mori wali, daiki patambana barrana monno daiki padedena walina Marambah Allah naraige gai ata kamadautainya. ¹⁵ Ngindi, waina nebahinna , nea wak'ibana, monno nemme a wak'ina, monno awak'ibana. Monno Marambah Allah na elleta awak'abana nettipona. ¹⁶ Yowa ku etawe ne kabu mata loddo, ne padau pa adil wak'i, neera waige ndadua. monno nepadou abenarra neera waige ndadua. ¹⁷ Yowa napa newe ategu," Marambah Allah engage bana yadi pataguda ata a benarra monno ata bokala orona waige rapana tuba ngara kuana pawukkuna monno ngara kuana parawi. PEINA NA ATA HINNA KAINA RANGA? ¹⁸ Yowa napanewe ategu orona ngara anada atapia," Marambah Allah na nunggawi hidda ne hidda ka eta orona hidda apaigaina ranga. ¹⁹ Bage, tolekada atapia monno tolekada ranga iage, monno iage mate. Nebahinna ia mate heida wakde apadeku mate. Ia ge ga'u monno na atapia danna seipakiwa ranga. Nyaka, ngara kuana danna manoto kiwe!. ²⁰ Ngara kuwa a kako ia padou. Ngara kua walina pa'u tana dana, monno ngara kuwa wali bali pa'u tanah dana. ²¹ Ngarradi apandege nadewa ana atapia napenne neto bodo monno nadewana ranga na burru ne ponnu tanah"? ²² Yowa ku etawe badai ki a seipa ne barrada atapia ba senango walina papawillina orona nawe tubananya. Bage, ngarrai apaetanawe barrana appawe angegana adadi banemme?