¹ Geilemi tubana Muori na iyya geile a bo'una! Geilemi tubana Muori, ngara dukka ponnu tana! ² Geilemi tubana Muori, deikanage ngara-Na, padukkige ne manumara walina barra-Na iyya loddo iyya loddo. ³ Tekkiwe ne sangadi-Na barrada yidda kadukka tana, ne parawi-Na a kaladana barrada ngara dukkada kadukka tana! ⁴ Oronage, Muori bana Kaladana, mono pa deikaya, da madauta-Ni walina allah a ieka. ⁵ Oronage, ngara dukkada allahda kadukka tana ngiadoyi padeikada, takka Muori ngia a rawige langita. ⁶ Pa akani mono sangadi wa'ige aro-Na; kullisa mono a manadana wa'ige ne'e padou-Na a bisa. ⁷ Waini Muori, ta kadukka tana, wainage sangadina mono kullisana Muori! ⁸ Wainage sangadi mono ngarana Muori, ngiddiwe patagu mono ammigumi ne'e padou-Na. ⁹ Deikaya Muori ne'e sangadi danana a bisa, kadaddakami aro-Na, ta ngara dukkanage tana! ¹⁰ Tekkidage yidda kadukka tana,'Muori a paresa! Ya, ne tana na madduge, dana dikki mawe. Na paresayi yidda kadukka tana waige keadilan. ¹¹ Ga'i ne langita kana maringa mono ga'i ne tana kana maringa, ga'i ne bonnu kana punniwe, mono ngara dukkanage i nage. ¹² Ga'i ne uoma kana maringa mono ngara dukkanage ne'e dana, monoga'i yidda puu wasu kadawu dana kada maringa, ¹³ arona Muori, oronage ba ammi-Ni bana paresawe ne tana. Na paresawe ne ponnu tana ne'e a bia dana, mono yidda kabisu kadukka tana ne'e manawara dana-Na.