1
Ammigu! Mai kata deikaya Muori! Mai kata kawula barrana letena watu, manumarada.
2
Mai kata kako aro-Na kata malangi-Ni, mai kata kawula waina geileda.
3
Oronage, Muori ngiadona Marobba Allah a kaladana, mono Tokko a kaladana walina yidda allah a ieka.
4
Ne'e limma dana-Na, madalenage tana, lawi letena ngiadoyi dou-Na.
5
Ne bonnu ngiadowe dou-Na oronage ba Ngia a rawige, mono limma-Na a rawige ne tana mara.
6
Ammigu! Mai kata kawodo mono deikaya, mai kata rukkudi koddoda arona Muori, a Rawida.
7
Oronage, Ngia ba ngidaona Marobba Allahda, mono ne itta ngiadona ata padawa-Na, mono bebe limma dana-Na. Ni'i loddo, bei rengekowe li'i-Na,
8
'Dei pakattokage atemi, a linnana ne'e Meriba, a linnana ne loddo ne'e Masa, ne'e tillu maredda dana.
9
Yidda inna kawiedami bada nunga-Wa, lakka da ietakowe ne parawi-Gu.
10
Pata kabullu dou nage ba daku beidi netti ata, mono lidda, 'Yidda ngiadoyi ata a sillira atena, mono dada padde mage lara-Gu'.
11
Oronage, ne bani dana-Gu baku aura, 'Dada tama pongu bana ne'e padou ngau-Gu'.