¹ Oh Muori, Marobba Allah a pabalige, oh Marobba Allah a pabalige, mangiewala-Wu! ² Kedde-Wu, oh A Paresawe tana, pabalidage yidda ata a padeika wekkina! ³ Pirra gai kiapowe mado'i nage yidda ata a buokala, oh Muori, pirra gai kiapowe mado'i nage yidda ata a buokala bada maringa? ⁴ Da panewege ne panewe a idda dessa, ngara dukkada a rawige ne a buokala da padeika wekkina. ⁵ Da pamubbukayi ata-Mu, oh Muori, mono da parimadadi dou-Mu. ⁶ Da pamateyi mawinne walu mono ata a mai, da pamateyi lakawa ana lalo. ⁷ Lidda, 'Muori dana ietawe, linna alladowe na Marobba Allahna Yakub dana pa ate mage'. ⁸ Pa atege, ta ata a kabanga tilluda kadukka tana, ta ata a idda padde, pirra powe bei padde? ⁹ Ngia a rawidi yidda katillu, appa maka da Na rengewa? Ngia a rawidi mata, appa maka da Na ieta? ¹⁰ Ngia a pangungadi yidda ata mangieda, appa maka da Na tuawe? Ngia a pa nunganga ata pi'a tubana papangedda, ¹¹ Muori na paddege ngara dukkada pa kabbu atena ata pi'a, yidda mirrika lolo ngau yi. ¹² Na maringana ata pa pangunga-Mu, oh Muori, mono You Mu pa nungadi ne paresa-Mu, ¹³ ga'i kana kadenna ne'e loddo mayilla, dukki ne'e kaliena ba kuodawe tubada yidda ata a buokal. ¹⁴ Oronage, Muori dana duddakamadi yidda ata-Na, Ngia dana duddakamadi yidda dou-Na. ¹⁵ Oronage, ne a didara na baliwe barra nage a bia, mono ngara dukkada ata a lurrusa atena a diekuni. ¹⁶ Garrani a kedde tubagu ba gobbadi yidda ata a buokala? Garrani a dede tubagu ba gobbadi yidda ata a rawige a dirraka? ¹⁷ Na Muori ba da ngiako-Na a tuluga, diewagu iengani ne'e padou a kapottana. ¹⁸ Ba luggu ko, 'na wa'igu na tabirrisa', manawara-Mu, oh Muori, a tuluga. ¹⁹ Ne pangeddagu bana ma tabawe ne'e ate ki'i danagu, Pa maringi-Mu na pa maringi gani diewagu. ²⁰ Na bisawe ne padou ba pubbuka bana pakassa denga-Gu You, yidda a kabbuge a mayilla a linnana pa pieta. ²¹ Da pakassana bada gobbadi muorikada ata a bia, mono a padou dage waige ra'a a idda sala. ²² Takka, na Muori ngiadona padoa mawogu, mono Marobba Allah padou mawo padou addegu. ²³ Na pabali dage parawida a buokala barra douda, mono Na pamoddayi ne'e buokala dana douda, Muori, Marobba Allahda, Na pamoddayi.