1
Ngia a iengana ne'e mawo danana Marobba Allah A Madieta A Majaga, da taddo ne'e mawo danana A Mawuolu A Marawi.
2
Lugguni Muori, 'Padou mawogu mono padou addegu, Marobba Allahgu, ne'e barra-Na baku waini'.
3
Oronage, Ngia a pasellawu walina sirru dana ata a paruoti, mono walina ne karodduka a ammina.
4
Ngia a pa ingngiwu waige kapa-Na, mono kabu kapa-Na, mu kolege ne padou mawo, manawara-Na ngiadowe nobbu mono riddi pamawo.
5
Dou madauta bana ne kapotta, mono ana pana a wurruna loddo dana,
6
mono ne karodduka a kako kapotta dana, mono a mapubbuka a ammina loddo dana.
7
Rata ata a guggila ne'e tidimu, mono kabullu rata ne'e tuba kawanamu, takka dana barra magu.
8
Ngieka dowe bou ieta waidi matamu, mono bou ietayi ba pabalidage barrada yidda ata a buokala.
9
Oronage, ne yemmi bei wai mawoni na Muori A Madieta, padou madakamu.
10
Da'ima a buokala a reggawu, da'ima karodduka a barra guge kariekamu.
11
Oronage, Ngia a patukadi yidda malaikat-Na, ga'i kada dawawu ne'e lara danamu.
12
Da keketawu togo limmada, ga'i yidda wa'imu ka dada katullura kana togo watu.
13
Mu paladi yidda singa mono nippe a bani. singa a bo'u pona mono nippe bonnu mu dekedi.
14
'Oronage, ngia bana manawara-Ga, ngia maka Ku yani kaluoga, Ku pamawoya oronage bana paddegage ngara-Gu.
15
Ne bana kawula barra-Gu, Ku waleya, Ku palolo dengani ne'e mayilla dana, Ku tuluni mono Ku deikaya.
16
Ne rapa muorikana a malou po, Ku pamaringaya, mono Ku ga'ini bana ietawe manumara-Gu'.