¹ Ngia a iengana ne'e mawo danana Marobba Allah A Madieta A Majaga, da taddo ne'e mawo danana A Mawuolu A Marawi. ² Lugguni Muori, 'Padou mawogu mono padou addegu, Marobba Allahgu, ne'e barra-Na baku waini'. ³ Oronage, Ngia a pasellawu walina sirru dana ata a paruoti, mono walina ne karodduka a ammina. ⁴ Ngia a pa ingngiwu waige kapa-Na, mono kabu kapa-Na, mu kolege ne padou mawo, manawara-Na ngiadowe nobbu mono riddi pamawo. ⁵ Dou madauta bana ne kapotta, mono ana pana a wurruna loddo dana, ⁶ mono ne karodduka a kako kapotta dana, mono a mapubbuka a ammina loddo dana. ⁷ Rata ata a guggila ne'e tidimu, mono kabullu rata ne'e tuba kawanamu, takka dana barra magu. ⁸ Ngieka dowe bou ieta waidi matamu, mono bou ietayi ba pabalidage barrada yidda ata a buokala. ⁹ Oronage, ne yemmi bei wai mawoni na Muori A Madieta, padou madakamu. ¹⁰ Da'ima a buokala a reggawu, da'ima karodduka a barra guge kariekamu. ¹¹ Oronage, Ngia a patukadi yidda malaikat-Na, ga'i kada dawawu ne'e lara danamu. ¹² Da keketawu togo limmada, ga'i yidda wa'imu ka dada katullura kana togo watu. ¹³ Mu paladi yidda singa mono nippe a bani. singa a bo'u pona mono nippe bonnu mu dekedi. ¹⁴ 'Oronage, ngia bana manawara-Ga, ngia maka Ku yani kaluoga, Ku pamawoya oronage bana paddegage ngara-Gu. ¹⁵ Ne bana kawula barra-Gu, Ku waleya, Ku palolo dengani ne'e mayilla dana, Ku tuluni mono Ku deikaya. ¹⁶ Ne rapa muorikana a malou po, Ku pamaringaya, mono Ku ga'ini bana ietawe manumara-Gu'.