¹ Lawiti. Geili tubana Sabat. Na dessawe ba pamalangini Muori, mono ba geileni na iyya geile tubana ngara-Mu, oh A Madieta A Majaga, ² ga'i katekki waige ne manawara-Mu kabu gedde, mono manawara-Mu ne gedde, ³ waina alat musik kabullu kalerre, gambus mono kecapi. ⁴ Oro ba You dona, oh Muori, a pamaringawa orona papayilli-Mu, ku maringa oronage parawina limma-Mu. ⁵ Na kalada takkadi parawi-Mu, oh Muori! Ne pakabbu-Mu na madaledi. ⁶ Yidda ata a ngade dada padde mage, mono yidda ata a kabangnga dada padde dommo mage. ⁷ Yidda ata a buokala bada tubbuko mirrika rutayi, mono ngara dukkada a rawige a buokala bada mangiedako, da pamoddayi dukki murri wali murri wali. ⁸ Takka ne You, oh Muori, ne'e padou a madieta dukki murri wali murri wali. ⁹ Oronage, ne a linnana, yidda kamuka-Mu, oh Muori, ietayi yidda kamuka-Mu a modda! Ngara dukkada a rawige a buokala da siebayi. ¹⁰ Takka, You Mu pamadieta gani kadugu a linnana karabbo, ba kodduga minya a bou sirrita. ¹¹ Yidda matagu da pa atedi yidda a ata a ietawe, yidda katillugu da rengewe tubada yidda ata a buokala a kedde bada gobbaga. ¹² Ata a bia da wolla mirrika puu wasu kurma yi mono da tubbu mirrika puu wasu aras ne'e Libanon. ¹³ Da taddodi ne'e umma danana Muori, da tubbu ne'e padouna Marobba Allahda. ¹⁴ Wa'ipo wuada lakka da kawieda bana, da morru mono da moro pona, ¹⁵ ga'i ka tekkiwe na Muori bana bia, padou addegu, mono mono da'ima a idda didara barra-Na.