¹ Sabayana Musa, ata-Na Marobba Allah. Muori, Yo'u dona padou madakama dukki nemmiya. ² Ne ba dada dadipo yidda letena, mono ba dou paana podi yidda tana mono ponnu tana, wali mono dukki murri wali murri wali, Yo'u dona Muori. ³ Mu pabalidi yidda ata ne'e kobbura dana mono lummu, 'Balimi, ta ana ata!' ⁴ Oronage, ne rata dou ne'e mata dana-Mu mirrika loddo mannanage, ne rapa bana kako paliwe, mono mirrika rapa dawa gedde we. ⁵ Mu pieliyi, mirrika nedi a dura, ne kabu gedde mirrika rutayi a tubbu. ⁶ Ne kabu gedde, na wolla mono na tubbu, ne gedde, na melle mono na marokota. ⁷ Oronage, ma dukkana oro bani-Mu, oro bani-Mu ma katattaka. ⁸ Mu tauyi yidda sala ma ne aro mata-Mu. mono yidda a kabunni ne'e mangiewala dananage mata-Mu. ⁹ Oronage, ngara dukkada loddoma da kako paliwe ne'e bani dana-Mu; ma padukkayi douma mirrika keluhan. ¹⁰ Rapa muorikama yamme pittu kabullu dou, mono ba kullisa ko, dukki paddo kabullu dou, takka pakadaka dengama ngiadowe mayilla, bage ma ngettana bama liwe. ¹¹ Garra a paddege kullisana bani-Mu, a linnana madautama barrana bani-Mu? ¹² Ba linna kowe, bowo gama kama yiepadi loddoma, ga'i ne atema ka ammige a padde. ¹³ Balimi, oh MUORI, pirra gai kiapowe mado'i nage? Manawaradi yidda ata-Mu. ¹⁴ Pabiekuta gama ne kabu gedde waige manawara-Mu ga'i kama maringa ne iyya loddo. ¹⁵ Ga'i kama maringa a linnana ne loddo bou pamayillama, mono a linnana ne dou bama ietawe a buokala. ¹⁶ Ga'i ne papayilli-Mu ka tekkiwe barrada ata-Mu, mono ne sangadi-Mu barrada anada. ¹⁷ Ga'i ne dessana Muori, Marobba Allahda, ka wa'ige barrama, mono pamaddu gamadi yidda papayillida limmama, ngiado, pamaddudi parawida limmama.