¹ Geilena Etan, ata Ezrahi. Ku geilege tubanage manawarana MUORI dukki murri wali murri wali, ku tekkiwe ne manawara-Mu barrada ngara dukkada wolla murrida waige ngadagu. ² Oronage, ba luggu, 'Manawara-Mu na keddewe dukki murri wali murri wali, manawara-Mu na dedewe togo langita'. ³ Ku kettege ne paparasi-Gu dugguda yidda ata papede-Gu, Ku aura barrana Daud, ata-Gu : ⁴ 'Ku pamaddudi ubbu aibamu dukki murri wali murri wali, mono pakeddewe madi'imu walina wolla murri dukki wolla murri'. ⁵ Oh MUORI, ne langita na deikaguge ne tada-Mu, linna alla dowe ne manawara-Mu ne'e pakassa danada yidda ata a bisa. ⁶ Oronage, garra ne'e togo kawuta a pamiera dengani MUORI? Garra a linna wa'ina MUORI tilluda yidda ana Surgawi? ⁷ Marobba Allah pamadautaya ne'e pakassa danada yidda ata a bisa, mono louka pa akani dugguda ngara dukkada a wa'ina ne'e pa barra. ⁸ Oh MUORI, Marobba Allah a rawige ponnu tana, garrani a kullisa mirrika Yo'u na? Mu kullisa, oh MUORI, mono ne manawara-Mu na woleta-Gu. ⁹ Mu paresawe kullisanage bonnu. Ne ngallungu na bana pennewe, Mu pakadennawe. ¹⁰ Mu pubbukaya Rahab mirrika ata papamateya, Mu siebayi kamuka-Mu waige lako-Mu a kullisa. ¹¹ Ne langita dou-Mu ge, ne tana dou dommo-Mu ge . Yo'u a tauwe pu'u nage ne tana mono ngara dukkanage i nage. ¹² Utara mono selatan, Yo'u a rawige, Tabor mono Hermon da maringa oronage ngara-Mu. ¹³ Na kullisa na lako-Mu, na kullisa limma-Mu, mono na madieta limma kawana-Mu. ¹⁴ Ne a bia mono a didara ngiadowe pu'u nage madi'i-Mu, ne manawara na kakowe aro-Mu. ¹⁵ Maringina yidda ata a padde pamaringa, Oh MUORI, a kako ne'e mangiewala mata dana-Mu. ¹⁶ Da maringa ne'e ngara dana-Mu ne iyya loddo, ne'e bia dana-Mu da pamadietadi. ¹⁷ Oronage, ba Yo'u dona sangadi mono kullisada, oro pabei-Mu ge, yidda kaduma ma pamadietadi. ¹⁸ Oronage, yidda tuodama dounadi MUORI, tokko ma tubanadi A Bisa Israel. ¹⁹ Wa'ige ne sadekka, Mu panewe ne'e pa ieta dana, barrada yidda ata padde-Mu :'Ku tuluni na ata a kullisa, Ku pamadietadi yidda ata a bo'una walina ne'e padou. ²⁰ Ku koleni Daud, ata-Gu, waige minya bisa-Gu, Ku uobaraya. ²¹ Limma-Gu na rukkaya, lako-Gu na pakullisani. ²² Yidda kamukana dada malengo waimani, yidda ata a buokala dada pamayilla maya. ²³ Ku pubbukayi yidda kamukana arona, mono na gobbadi yidda ata a buttu ateni. ²⁴ Ne manawara-Gu na diekudi, mono oronage ngara-Gu, kaduna na pamadietani. ²⁵ Ku tauya na limmana ponnu bonnu, mono limma kawanana ponnu loko. ²⁶ Na pa ou-Ga, 'Yo'o dona Amagu, Marobba Allahgu, padou manumaragu'. ²⁷ Ku wai ana kawungnga ni, a louka madieta barrada yidda tokko ponnu tana. ²⁸ Ne manawara-Gu na dawaya dukki murri wali murri wali, mono ne paparasi-Gu na madduge barrana. ²⁹ Ku yadi ubbu aibada dukki murri wali murri wali, monon madi'ina mirrika umur nage langita. ³⁰ Yidda anana bada duddaka koge ne ukku-Gu, mono dada waimage ne patekki-Gu, ³¹ bada lawi kowe ne patekki-Gu mono ba dada dieku koge ne paparesa-Gu, ³² Ku ukkudi ne sala da waige tokko, mono ne sala da waige palu. ³³ Takka, Daku pubbuka mawe ne dessa ate-Gu, mono Daku mapodetama tubanage manawara-Gu. ³⁴ Daku tullara mage paparasi-Gu, mono Daku tullara mage ne papamaddu-Gu. ³⁵ Sadekka baku aura tubanage ne sangadi-Mu, Daku akkala maya Daud. ³⁶ Yidda ubbu aibana ienga doudi dukki murri wali murri wali, ne madi'ina ne ba wa'i poni mata loddo aro-Gu. ³⁷ Ienga douge dukki murri wali murri wali mirrika wulla ya, saksi a ienga pakitana togo langita'. ³⁸ Takka, Mu letodi mono Mu tullaradi, Mu banidi yidda ata pa uobara-Mu. ³⁹ Mu tullarage ne paparasi dengamudi yidda ata-Mu, Mu pametteni na ladona ne'e tana dana. ⁴⁰ Mu pubbukayi ngara dukkada tembokna, Mu tauya na benteng ne'e a mubbuka dana. ⁴¹ Ngara dukkada a liwe da pamarimani, da pamakkeya ole atana. ⁴² Mu pamadieta dani limma kawanada yidda kamukana, mono ngara dukkada kamukana da maringa. ⁴³ Yo'u dommo dona a kabaliwe ne mata beddilana, mono dou tulumani ne'e patau dana. ⁴⁴ Mu rawige ne sangadina bana dukkage, mono Mu letoge ne padouna togo tana. ⁴⁵ Mu pakawuddi kadage rapa bo'una, Mu pa ingngi waini makke. ⁴⁶ Pirra gai kiapowe mado'i nage, oh MUORI? appa Mu pakabunni wekki pakitana dukki murri wali murri wali? Appa ne bani-Mu na wiegarawe mirrika apai we? ⁴⁷ Lolowe, rapanage muorikagu! Oronage, ba da'i larage bou rawidi yidda ngara dukkada ana ata. ⁴⁸ Garradi yidda ata a muorika mono a idda ietawe ne mate? Garra a padde pasellaya diewana walina padou ata mate dana? ⁴⁹ Gie douge ne manawara-Mu nettina, oh Muori, tubanage manawara-Mu paparasi-Mu a madduna barrana Daud? ⁵⁰ Lolowe, oh Muori, pei wa'i dani na ata-Mu ba pamakkeya, mono pei wa'igu baku deitowe ne makke ne'e ate danagu walina yidda kadukka tan, ⁵¹ oroda yidda kamuka-Mu bada pamakke, oh Muori, da pamakkeyi pagada yidda ata pa uobara-Mu. ⁵² Deikaya MUORI dukki murri wali murri wali! Amin mono Amin!