1
Na iyya geile. Lawitina Korah. Tubada ata a geile : A linnana Mahalat Leanot. Geilena Heman, ata Ezrahi. Oh MUORI, Marobba Allah manumaragu, Ku kawula ne loddo mono gedde aro-Mu.
2
Ga'i ne sabayagu kana dukkiwe aro-Mu, patididi katillu-Mu barra kawulagu.
3
Oronage, na diewagu a bonnuna mayilla, mono ne muorikagu na todowe padou ata mate.
4
Yauwa da yiepaga tillu ata a burru ne'e liangu uodi dana, yauwa mirrika atawa a idda kullisa.
5
Da pasellawa walina tillu ata mate, mirrika atawa a manu'a kalada, a beika ne'e uodi dana, pa dapa lolo kia-Mu, mono da bieta walina limma dana-Mu.
6
Mu tauwa ne'e kabu liangu uodi, ne'e kapotta dana, ne'e padou a madalena.
7
Ne bani-Mu na tennekaga, mono Mu pamayillawa waige ngara dukkanage ngallungu-Mu.
8
Mu pamarroga walina yidda ata papaddegu, Mu wai pamadiggila daga barrada. Ku mapattu mono daku paddema palousona.
9
Yidda matagu da rewo oro mayilla. Iyya loddo iyya loddo ku kawula barra-Mu, oh Muori, ku padiemani limmagu barra-Mu.
10
Appa Mu rawidi yidda tada tubada ata mate? Appa yidda diewa ata mate da kedde mono da deika-Wu bada pamadieta-Wu?
11
Appa ne manawara-Mu da padukkige ne'e uodi dana, mono ne manawara-Mu ne'e padou pubbuka?
12
Appa yidda tada-Mu da paddedi ne'e kapotta dana, mono ne bia-Mu ne'e padou pa denga?
13
Takka yauwa, oh Muori, ku kawula barra-Mu, ne kabu gedde, ne sabayagu na dukkiwe aro-Mu.
14
Oh MUORI, appa maka Mu tullaragani diewagu? Appa maka Mu kabunnige mata-Mu walina barragu?
15
Ku mayilla mono tekki pamate ne baku bo'u pona, ku deitowe ne mayilla walina barra-Mu, da mawwo bawe ategu.
16
Ne bani-Mu na wennawa, ne bani-Mu na padukkawa.
17
Da woletaga mirrika we'e ne iyya loddo, da pakaiyya na bada woletaga.
18
Mu pamarrogadi yidda olegu, yidda ata papaddegu ngiadowe kapotta.