¹ Na iyya geile. Lawitina Korah. Tubada ata a geile : A linnana Mahalat Leanot. Geilena Heman, ata Ezrahi. Oh MUORI, Marobba Allah manumaragu, Ku kawula ne loddo mono gedde aro-Mu. ² Ga'i ne sabayagu kana dukkiwe aro-Mu, patididi katillu-Mu barra kawulagu. ³ Oronage, na diewagu a bonnuna mayilla, mono ne muorikagu na todowe padou ata mate. ⁴ Yauwa da yiepaga tillu ata a burru ne'e liangu uodi dana, yauwa mirrika atawa a idda kullisa. ⁵ Da pasellawa walina tillu ata mate, mirrika atawa a manu'a kalada, a beika ne'e uodi dana, pa dapa lolo kia-Mu, mono da bieta walina limma dana-Mu. ⁶ Mu tauwa ne'e kabu liangu uodi, ne'e kapotta dana, ne'e padou a madalena. ⁷ Ne bani-Mu na tennekaga, mono Mu pamayillawa waige ngara dukkanage ngallungu-Mu. ⁸ Mu pamarroga walina yidda ata papaddegu, Mu wai pamadiggila daga barrada. Ku mapattu mono daku paddema palousona. ⁹ Yidda matagu da rewo oro mayilla. Iyya loddo iyya loddo ku kawula barra-Mu, oh Muori, ku padiemani limmagu barra-Mu. ¹⁰ Appa Mu rawidi yidda tada tubada ata mate? Appa yidda diewa ata mate da kedde mono da deika-Wu bada pamadieta-Wu? ¹¹ Appa ne manawara-Mu da padukkige ne'e uodi dana, mono ne manawara-Mu ne'e padou pubbuka? ¹² Appa yidda tada-Mu da paddedi ne'e kapotta dana, mono ne bia-Mu ne'e padou pa denga? ¹³ Takka yauwa, oh Muori, ku kawula barra-Mu, ne kabu gedde, ne sabayagu na dukkiwe aro-Mu. ¹⁴ Oh MUORI, appa maka Mu tullaragani diewagu? Appa maka Mu kabunnige mata-Mu walina barragu? ¹⁵ Ku mayilla mono tekki pamate ne baku bo'u pona, ku deitowe ne mayilla walina barra-Mu, da mawwo bawe ategu. ¹⁶ Ne bani-Mu na wennawa, ne bani-Mu na padukkawa. ¹⁷ Da woletaga mirrika we'e ne iyya loddo, da pakaiyya na bada woletaga. ¹⁸ Mu pamarrogadi yidda olegu, yidda ata papaddegu ngiadowe kapotta.