¹ Tubada ata a geile : Bada waige Mut-Laben. Geilena Daud. Ku pamalangiya Muori, walina ate dana takkagu, ku padukkige ngara dukkada parawi-Mu, a kaladana. ² Ku maringa mono ege ate barra-Mu, ku geileni a geile tubana ngara-Mu, oh A Madieta. ³ Yidda kamuka bada bali lira, da katullura mono da modda aro-Mu. ⁴ Oronage, Bou tuluge a didara tubana palakaragu, You a madi'i ne'e padou-Mu mono Mu paresawe a bia. ⁵ Mu tegur yi yidda kadukka tana, ,u pamoddayi ata a buokala. Mu uopi dadi ngarada dukki murri wali murri wali. ⁶ Kamuka da dukkana ne'e a mubbuka dana dukki murri wali murri wali, Mu batudi yidda padouda. Na dukkage ba loloyi yidda. ⁷ Takka, Muori na madi'i dukki murri wali murri wali. Na padedewe padou-Na gai kana paresa. ⁸ Mono, Na paresawe ponnu tana waige a didara, Na paresayi yidda kadukka tana waige a bia. ⁹ Muori ngiadona padou mawogu a madieta tubada a mayilla, padou mawo ne ba mayilla ko. ¹⁰ Mono, yidda a padde guge ngara-Mu, da waige barra-Mu. Oronage, You, oh Muori, dou duddakamadi yidda a ngaddo-Wu. ¹¹ Geileni a iyya geile tubana Muori, a madi'i ne'e Sion! Tekkidage yidda kadukka tana ne parawi-Na. ¹² Oronage, Ngia a pabali dage ne pamate ata, ba loloyi. Dana denga madi a kawula, ata a mayilla. ¹³ Manawaraga, oh Muori. Ietawe mayillagu oronage yidda a idda beiga, You a keketawa walina binna kalada pamate denga, ¹⁴ ga'i kaku padukkige ngara dukkanage sangadi-Mu, ne'e binna kalada dana mawinne Sion, ku maringa, ne'e manumara dana-Mu. ¹⁵ Yidda kadukka tana na tadanena ne'e kaliena dana parawi douda. wa'ida da masirru, ne'e sirru dana pa kabunnida. ¹⁶ Muori na padukki wekki dou-Na, Na padadiwe ne paresa. Yidda ata a buokala da masirru, ne'e parawi douda limmada. Sela ¹⁷ Ata a buokala da bali ne'e ata mate dana, mono ngara dukkada ata a dengadi Marobba Allah. ¹⁸ Oronage, na ata a milla, dapa denga pakita mawa, mono ne pamenneda ata a milla, dana dada mawe. ¹⁹ Kedde, oh Muori, Dou ga'i kadi yidda ata pi'a bada kullisa. Ga'i yidda kadukka tana, ka paresayi aro-Mu. ²⁰ Taudage ne madauta barrada, oh Muori. Ga'i yidda kadukka tana kada paddege ne yidda ba ata pi'a kadoyi.Sela