¹ Appa, oh Muori, maka Mu dede marro? Appa maka Mu pakabunni wekkina ne mayilla dana? ² Baku maringa, ata a sala da ruotiyi a mayilla. Ga'idi ka yoppayi ne'e kabbu danada pakabbuda. ³ Oronage, ata a sala, da padeika wekki dengage ne kabbu ateda, mono ata a kaguola ngau da aura, mono da hina ya Muori. ⁴ Ata a sala, da padeika wekki dengage kalaki korruda, dana ngaddomaya Marobba Allah'. ⁵ Na larada na dessa pakita. Yidda ukku-Mu da madieta, bali pa ietana, ngara dukkada kamukana dana waimadi. ⁶ Linna ne'e ate danana, 'Daku giddukama, oronage ba daku poddage ne mayilla, dukki nemmiya'. ⁷ Ngadana na bonnuge aura, makirri, mono mayilla. Kabu lommana ngiadowe mayilla mono a buokala. ⁸ Na madi'i ne'e padou pa ieta ne'e wanno dana, ne'e padou kabunni, na pamateyi ata a sala. Matana na gillakadi ata a idda kullisa. ⁹ Na pattuyi ne'e padou a kabunni, mirrika singa ne'e yobbu danana. Na pattuyi ga'i ka yoppayi yidda ata a mayilla. Na yoppayi yidda ata a milla, ne bana tengiyi ne'e sirru dana. ¹⁰ Yidda ata a idda kullisa da dangu mono da moko, da guggila ne'e marobba danada. ¹¹ Linna ne'e ate danana, 'Marobba Allah na denga bage, Na kabunnige mata-Na, dana ieta bawe'. ¹² Kedde, oh Muori! Oh Marobba Allah, pajuolani limma-Mu. Dou denga kadi yidda ata a mayilla. ¹³ Appa yidda ata a sala maka da hina waya Marobba Allah? Linna ne'e ate danana, ' Dou tuntut mawe'. ¹⁴ Mu ietawe, oronage Bou ietawe ne mayillada, ata a idda kullisa na ya wekkina barra-Mu. Da wai padou tulu dagu yidda ana lalo. ¹⁵ Patadadi lakoda yidda ata a sala mono a buokala. Tuawe ne sala da, ga'i ka dou regga kiakawe. ¹⁶ Muori ngiadona Tokko dukki murri wali murri wali mono pakitana. Yidda kadukka tana da modda walina tana-Na. ¹⁷ Oh Muori, Mu rengewe, kabubuda ata a mayilla, Mu pakatto dadi ateda, Mu rengewe waige katillu-Mu, ¹⁸ ga'i ka tuludi yidda ana lalo, mono ata a mayilla, ga'i yidda ata ponnu tana ka dada pamadautakayi!