¹ Sabayana Daud. Patididi katillu-Mu, oh MUORI, mono walewa, oronage baku milla mono baku dengo. ² Dawa gani diewagu oronage baku dessa, Yo'u dona Marobba Allahgu, tuluga ata-Mu, a wwai-Gu. ³ Manawaraga, oh Muori, oronage baku kawula barra-Mu ne iyya loddo. ⁴ Pamaringa gani diewa-Gu oronage barra-Mu, oh Muori, baku keketaua diewagu. ⁵ Oronage Yo'u dona, oh Muori, a dessa ate mono a idda diekugamadi sala ma, na luage manawara-Mu barrada ngara dukkada ata a kawula barra-Mu. ⁶ Rengewe, oh MUORI, sabayagu, pa atege ne li'igu baku ma dengi. ⁷ Ne loddo mayillagu, ku kawula-Gu, oronage bou beige walewa. ⁸ Da'ima a linna wa'ina Yo'u barrada yidda allah a ieka, oh Muori, mono yidda papayilli a linna wa'ina papayilli-Mu. ⁹ Ngara dukkada kadukka tana parawi-Mu, da mai mono da deikawu aro-Mu, oh Muori, mono da deikaguge ngara-Mu. ¹⁰ Oronage, Mu kaladana mono Mu rawige ne tada, Yo'u kadona Marobba Allah. ¹¹ Bowo gadi yidda lara-Mu, oh MUORI, ku kako ne'e bia dana-Mu, pabolo gage ategu ga'i ka madauta guge ngara-Mu. ¹² Ku beige pamalangi-Wu waige ategu, oh Muori Marobba Allahgu, ku deika guge ngara-Mu dukki murri wali murri wali. ¹³ Oronage, na kaladage manawara-Mu, Mu pasella gani diewagu walina padou ata mate dana. ¹⁴ Oh Marobba Allah, yidda ata a padeika wekkina da kedde bada gobbaga, yidda ata a bani, a idda tauga padou, da ngaddo gani diewagu. ¹⁵ Takka Yo'u, oh Muori, Marobba Allah a pamanawara mono a dessa ate, dou ngetta mana bou bani mono ne manawara-Mu na kaladage. ¹⁶ Bieli-Wu barragu mono manawaraga, yawe kullisa-Mu barragu ne ata-Mu, mono tuludi yidda ana kabanina na mawinne pelayan-Mu. ¹⁷ Patingoge barragu ne tada a dessa, ga'i yidda a idda beiga kada ietawe mono ka pamakkeyi, oronage Yo'u oh MUORI, a tuluga mono a pakadennawa.