1
Tubada ata a geile : Lawitida anana Korah. Oh Muori, Mu beige ne tana-Mu, Mu pabalige pa parimana Yakub.
2
Mu uopiyi sala da ata-Mu, Mu tuodiyi ngara dukkada doku dengada!
3
Mu tengi baliwe ne bani-Mu, Mu bali lira walina ne bani-Mu a wiegara.
4
Pabali gama yamme, oh Marobba Allah manumarama, kai balige ne bani-Mu barrama.
5
Mu banigama dukki murri wali murri wali ? Mu tengi baliwe ne bani-Mu walina iyya ata iyya ata?
6
Dou beimage Bou pamuorika balima, ga'i yidda ata-Mu kada maringa barra-Mu?
7
Patingo barrama ne manawara-Mu, oh Muori, mono yagama manumara-Mu.
8
Ku beige baku rengewe appana patekkina Marobba Allah. Oronage, bana tekkiwe ne muoli tubada ata-Na, tubada ata-Na a bisa, takka dDou ga'ikadi bada bali ne'e kabangnga dana.
9
Ne a linna, manumara-Na da barrage yidda ata a madauta-Ni, ga'i ne sangadi ka iengage ne'e padou da.
10
Ne manawara mono a bia da pa reggana, ne didara mono muoli da padekki wakkina.
11
Ne manawara na tubbuwe walina tana dana, mono ne a bia na gillakage bawa walina togo langita.
12
Oh, Muori a yawe ne a dessa, mono ne padou a mangu i na.
13
Ne didara na kakowe aro-Na, mono na tauwe ne oro wa'i-Na ne'e lara dana.