¹ Tubada ata a geile : linna Gitit. Lawitida anana Korah. Na beige padou madaka-Mu, oh Muori a rawige tana! ² Diewagu na ridduwe padouna Muori, mono da dukkage ategu mono kana'agu bada maringa dengani Marobba Allah a muorika. ³ Dukki, yidda keila pipit bada kolege ummada, mono kaliewara bada kolege yobbu douna, padou taunadi anana, ne'e ponnu kabubbu-Mu, oh Muori a rawige ponnu tana, tokko-Gu mono Marobba Allahgu. ⁴ Maringina yidda ata a madaka ne'e umma-Mu, da deika pakita-Wu. ⁵ Maringi malalana yidda a madaka ne'e umma-Mu, ne atena ngiadowe kamuotu tana a sagana Sion. ⁶ Bada li kowe lembah Baka, na tauwe mata we'e tuba douda, mono urra rapa a ullu bada tuodi waige ne maringi malala. ⁷ Da kako waige kullisada, bada reggaya Marobba Allah ne'e Sion. ⁸ Oh Muori Marobba Allah a rawige ne ponnu tana, rengewe sabayagu, rengewe, oh Marobba Allahna Yakub. ⁹ Ietawe perisai ma yamme, oh Marobba Allah, gillakage matada ata pa uopi-Mu. ¹⁰ Oronage, iyya loddo ne'e padou-Mu na dessa powe, mono rata loddo ne'e padou waddeka. Ku pede powe baku dadi ata a dawa binna ne'e umma Marobba Allahgu, mono ba madaka ne'e karieka danada yidda ata a buokala. ¹¹ Oronage, Muori Marobba Allah ba ngiadona mata loddo mono perisai, Muori na yawe maringi malala mono sangadi, Dana pattumawe a dessa barrada yidda ata a kako ne'e dessa dana. ¹² Oh Muori A Madieta A Majaga, maringina yidda ata a wai-Gu!