1
Na iyya geile. Lawitina Asaf. Oh Marobba Allah, dou kadenna kana, dou kawanga kana, mono madaka kadenna, oh Marobba Allah.
2
Oro ietawe, yidda kamuka-Mu da kamussika, yidda ata a idda bei-Gu da kedde bada keketawe katuowada.
3
Da kabbuge ne a buokala bada gobbadi ata-Mu, da woro dobbage bada gobbadi yidda ata pakabunni-Mu.
4
Lidda, 'Maida, kata pamoddayi a linnana kadukka tana, ga'i ngarana Israel ka dada lolo kiakawe!'
5
Oronage, bada woro dobbage bada pakaiyya atena, da parasige bada gobba-Gu.
6
Kariekada Edom mono yidda ata Ismael, Moab mono ata Hagar,
7
Grbal, Amon, mono Amalek, Filistin dugguda a douge Tirus.
8
Ata Asyur da pakassa dommona barrada, ka wai lakodi yidda anana Lot.
9
Pa dadidage barrada a linnana parawi-Mu barrada ata Midian, Sisera, mono Yabin ne'e loko Kishon,
10
papa modda bada ne'e En-Dor, pawai taikona tana.
11
Yidda ata a pote pa dadidi mirrika Oreb mono Zeeb yi, ngara dukkada ata a paresa mirrika Zebah mono Salmuna,
12
a linnana, ' Maida kata dekewe, yidda maredda padawana Marobba Allah!'
13
Oh Marobba Allahgu, rawidi mirrika kobbura yi, mirrika kuwwa yi pa puowida paringngi.
14
Mirrika api a tunnuwe kadawu, mono lomma api a pakarrage letena.
15
Ba linna kowe, ruotiyi waidi paringngi kapote-Mu, pamadautadi waidi kapote-Mu.
16
Ponnu dage matada waige pamakke denga, bage da ngaddo guge ngara-Mu, oh MUORI.
17
Ga'i ka pamakkeyi mono kada madauta dukki murri wali murri wali, ga'i kada makke mono kada modda.
18
Ga'i kada paddege ne Yo'u doudona, a ngarana MUORI, A Madieta ponnu tana.