¹ Na iyya geile. Lawitina Asaf. Oh Marobba Allah, dou kadenna kana, dou kawanga kana, mono madaka kadenna, oh Marobba Allah. ² Oro ietawe, yidda kamuka-Mu da kamussika, yidda ata a idda bei-Gu da kedde bada keketawe katuowada. ³ Da kabbuge ne a buokala bada gobbadi ata-Mu, da woro dobbage bada gobbadi yidda ata pakabunni-Mu. ⁴ Lidda, 'Maida, kata pamoddayi a linnana kadukka tana, ga'i ngarana Israel ka dada lolo kiakawe!' ⁵ Oronage, bada woro dobbage bada pakaiyya atena, da parasige bada gobba-Gu. ⁶ Kariekada Edom mono yidda ata Ismael, Moab mono ata Hagar, ⁷ Grbal, Amon, mono Amalek, Filistin dugguda a douge Tirus. ⁸ Ata Asyur da pakassa dommona barrada, ka wai lakodi yidda anana Lot. ⁹ Pa dadidage barrada a linnana parawi-Mu barrada ata Midian, Sisera, mono Yabin ne'e loko Kishon, ¹⁰ papa modda bada ne'e En-Dor, pawai taikona tana. ¹¹ Yidda ata a pote pa dadidi mirrika Oreb mono Zeeb yi, ngara dukkada ata a paresa mirrika Zebah mono Salmuna, ¹² a linnana, ' Maida kata dekewe, yidda maredda padawana Marobba Allah!' ¹³ Oh Marobba Allahgu, rawidi mirrika kobbura yi, mirrika kuwwa yi pa puowida paringngi. ¹⁴ Mirrika api a tunnuwe kadawu, mono lomma api a pakarrage letena. ¹⁵ Ba linna kowe, ruotiyi waidi paringngi kapote-Mu, pamadautadi waidi kapote-Mu. ¹⁶ Ponnu dage matada waige pamakke denga, bage da ngaddo guge ngara-Mu, oh MUORI. ¹⁷ Ga'i ka pamakkeyi mono kada madauta dukki murri wali murri wali, ga'i kada makke mono kada modda. ¹⁸ Ga'i kada paddege ne Yo'u doudona, a ngarana MUORI, A Madieta ponnu tana.