¹ Tubada ata a geile : A linnana li'i ' Bunga Bakung Paparasi'. Lawitina Asaf. Rengewe, oh A dawayi Israel, Yo'u dona na dutuya Yusuf mirrika bebe ya, Mu madi'i ne'e ponnu kerubim, mangiewalawu! ² Arona Efraim, Benyamin mono Manasye, pakeddewe kullisa-Mu mono ammi-Gu kou tulugama! ³ Palengama, oh Marobba Allah, ga'i ne mata-Mu kana mangiewalawe, bage ne yamme ma manumara. ⁴ Oh MUORI, Marobba Allah a rawige ne ponnu tana, pirra gai kiapowe mado'i nage bou bani tubada sabayada ata-Mu? ⁵ Mu yadi we'e mata bada wai panga'adi, Mu yadi pa ienuda we'e mata dukki touda wudda. ⁶ Mu wai pa pangangngara denga gama barrada ole atama, mono yidda kamukama da malika gama. ⁷ Palengama, oh Marobba Allah a rawige ponnu tana, pamangiewalage mata-Mu, bage ne yamme ma manumara. ⁸ Mu batuni na pu'u wasu anggura walina Mesir, Mu wudayi yidda kadukka tana mono Mu taddoni na wasu. ⁹ Mu pawarrasa ulluge ne tanan tubana, bage na pu'u wasu na pakalarrita mono na ponnuwe ne luoda. ¹⁰ Yidda letena da matuodi oro mawona, yidda pu'u wasu aras oro kasangngana. ¹¹ Yidda kasangngana na mawallara dukki bonnu dana, mono kara'a na dukki loko dana. ¹² Appa Yo'u maka mu siebaya tembok na, ga'i ngara dukkada ata a kako paliwe kada oppuya? ¹³ Yidda wawi ruta da pubbukaya, mono yidda ranga a kawoddeka ne'e maredda dana da nga'ani. ¹⁴ Oh Marobba Allah a rawige ponnu tana, ga'i ka bali! Gillakage bawa walina Surga dana mono ietawe, pa atekini na pu'u wasu anggura, ¹⁵ na kalarritana pa taddona limma kawana-Mu, yidda anana pa pakullisa-Mu. ¹⁶ Da tunnu baya waini api, da pogo baya, da modda oro banina mata-Mu. ¹⁷ Takka, ga'i na limma-Mu ka wa'ini barrana na iyya ata tuba kawana-Mu, ponnuna na ana ata pi'a pa pakullisa-Mu. ¹⁸ Ba linna kowe, yamme dama bali lirama walina barra-Mu, pamuorikama. bage ne yamme ma pa ouguge ngara-Mu. ¹⁹ Palenga gama, oh MUORI a rawige ponnu tana, pamangiewalage mata-Mu, bage yamme ma manumara.